1 Kor 12 - Ndebele Bible (iBhayibhili Elingcwele) 1978

Iziphiwo zikaMoya ezehlukeneyo

1Mayelana leziphiwo zokomoya, bazalwane, kangithandi ukuba lingazi.

2Liyazi ukuthi lapho lalisengabezizwe, laholelwa ezithombeni eziyizimungulu, langaziphi indlela elaholelwa ngazo.

3Ngakhoke ngiyalazisa ukuthi kakho umuntu okhuluma ngoMoya kaNkulunkulu ongathi: Kathukwe uJesu. Futhi kakho umuntu ongathi uJesu uyiNkosi; kuphela ngaye uMoya oNgcwele.

4Kukhona iziphiwo ezehlukeneyo, kodwa uMoya munye.Roma 12:6–8

5Kukhona izinkonzo ezehlukeneyo, kodwa iNkosi yinye.

6Kukhona imisebenzi yamandla eyehlukeneyo, kodwa munye uNkulunkulu osebenza konke kibo bonke.

7Kodwa ilowo lalowo uphiwa okubonakalisa uMoya kube ngokokusiza.

8Omunye uphiwa ngoMoya ukukhuluma ngokuhlakanipha, omunye aphiwe ilizwi lokwazi ngaye lowoMoya,

9omunye aphiwe ukukholwa ngalowoMoya, lomunye aphiwe iziphiwo zokusilisa ngaye uMoya lowo,

10omunye aphiwe ukwenza izimangaliso, omunye aphiwe ukutshumayela, omunye aphiwe ukwahlukanisa omoya, lomunye ukukhuluma indimi ngendimi, lomunye ukuchasisa indimi.

11Konke lokho kungumsebenzi walowoMoya munye, ebabela ilowo lalowo njengokuthanda kwakhe.

12Ngoba njengoba umzimba umunye kodwa ulezitho ezinengi, loba zizinengi, zonke zingumzimba munye, kunjaloke loKristu.Roma 12:4, 5

13Ngoba ngoMoya munye thina sonke sabhaphathizwa sibe mzimba munye, loba singabaJuda loba singamaGriki, loba siyizigqili loba singabakhululekileyo. Thina sonke sanathiswa Moya munye.

14Umzimba kawusiso isitho sinye kodwa ungezinengi.

15Uba unyawo lusithi: Lokhu ngingesisandla, kangisikho okomzimba; lokho kungeze kwalwenza ukuba lungabi yikho okomzimba.

16Uba indlebe isithi: Lokhu ngingesilo ilihlo, kangisikho okomzimba; lokho kungeze kwayenza ukuba ingabi yikho okomzimba.

17Uba umzimba wonke ubuyilihlo, ngabe kungaphi ukuzwa na? Uba umzimba wonke ubuyindlebe, ngabe kungaphi ukunuka na?

18Kodwake uNkulunkulu umisile izitho zonke emzimbeni, yileso laleso njengokuthanda kwakhe.

19Uba zonke beziyisitho sinye, umzimba ngabe ungaphi na?

20Kodwake izitho zinengi, kanti umzimba munye.

21Ilihlo kalilakutsho esandleni ukuthi: Kangikudingi wena. Futhi lekhanda kalilakutsho enyaweni ukuthi: Kangikudingi wena.

22Impela lezozitho zomzimba ezikhangeleka zibuthakathaka kulezinye ziyadingeka;

23lalezozitho zomzimba esithi zidelelekile kulezinye, yizo esizazisa kakhulu; lezitho zethu esilenhloni ngazo siziphatha ngokuhlonipheka okukhulu.

24Kanti izitho zethu ezilesimo esihle kazikudingi lokho. Kodwa uNkulunkulu wawuhlanganisa umzimba, enika ingxenye edelelekileyo yomzimba udumo olukhulu,

25ukuze kungabi khona ukwahlukana emzimbeni, kodwa ukuze izitho zonke zomzimba zinanzelelane ngokufananayo.

26Uba kuhlupheka isitho sinye, zonke zihlupheke kanye laso; uba kudunyiswa sibe sinye, zonke zijabule kanye laso.

27Linake lingumzimba kaKristu lezitho zakhe ngamunye.

28UNkulunkulu umisile abathile ebandleni; kuqala abaphostoli, okwesibili abaprofethi, okwesithathu abafundisi, besekusiba abenzi bezimangaliso, besekusiba abasilisayo, labasizayo, labaphathi, labakhuluma ngendimi ezehlukeneyo.Efe 4:11

29Bonke bangabaphostoli na? Bonke bangabaprofethi na? Bonke bangabafundisi na? Bonke bayazenza izimangaliso na?

30Bonke baleziphiwo zokusilisa na? Bonke bakhuluma ngendimi na? Bonke bangachasisa na?

31Kodwa fisani kakhulu iziphiwo ezingcono. Ngizakulitshengisa indlela eyiyona inhle kakhulu.