2 Sam 24 - Ndebele Bible (iBhayibhili Elingcwele) 1978

UDavida ubala abantu

1Lwabuya lwamvuthela uIsrayeli ulaka lweNkosi, wabavusela uDavida ngokuthi: Hamba uyebala uIsrayeli loJuda.1 Lan 21:1–27

2Ngakho inkosi uDavida yathi kuJowabi lakubaphathi bempi ababelaye: Hambani ezizweni zonke zakoIsrayeli, kusukela koDani kuze kube seBerisheba, libale abantu ukuba ngazi ukuthi banganani.

3Kodwa uJowabi wasesithi enkosini: Loba iNkosi uNkulunkulu wakho ingabandisa abantu baphindwe ngokulikhulu, lenkosi uDavida iphile ize ikubone lokhu, lokho kungayithokozisa ngani na?

4Kodwa inkosi yamlaya uJowabi lezinduna zempi ukuba balalele ilizwi layo. Ngakhoke uJowabi lezinduna zempi baphuma enkosini ukuba babale abantu bakoIsrayeli.

5Bachapha iJordani, baqalisa eAroweri, lasemzini ophakathi kwesihotsha, baqonda koGadi, badlulela eJazeri.

6Basebefika eGileyadi laseKadeshi elizweni lamaHethi; bayafika koDani, basuka koDani baqonda eSidoni,

7bayafika enqabeni yaseTire lasemizini yonke yamaHivi lamaKanani; baphuma baya eNegebi yakoJuda eBerisheba.

8Sebedabule lonke ilizwe, bafika eJerusalema ekupheleni kwenyanga ezificamunwemunye lensuku ezingamatshumi amabili.

9UJowabi waseyinika inkosi inani labantu abangaphuma impi; koIsrayeli kwakukhona amadoda ayizinkulungwane ezingamakhulu aficaminwembili; amadoda akoJuda ayeyizinkulungwane ezingamakhulu amahlanu.

10UDavida wahlabeka enhliziyweni emva kokubala kwakhe abantu. Wathi eNkosini: Ngonile kakhulu ngalokho engikwenzileyo. Ngakho, Nkosi, ngiyakuncenga, akuthethelele ububi benceku yakho, ngoba ngenzile ubuthutha obukhulu.

11Kwathi uDavida esevukile ekuseni, kwafika ilizwi leNkosi kumprofethi uGadi, umboni kaDavida, lathi:

12Hamba uyetshela uDavida ukuthi iNkosi ithi: Ngikubekela izinto ezintathu; khetha enye kuzo ukuba ngiyenze kuwe.

13UGadi wasefika kuDavida, wamtshela wathi: Kufike kuwe yini iminyaka emithathu yendlala elizweni lakini, loba ubalekele izitha zakho inyanga ezintathu zixotshana lawe; ingabe kube khona umkhuhlane okwensuku ezintathu elizweni lakini na? Ake ucabange, ubone ukuba yimpendulo bani engizayibuyisela kongithumileyo.

14UDavida wasesithi kuGadi: Ngisebunzimeni obukhulu; kungcono ukuba ngiwele esandleni seNkosi, ngoba umusa wayo mkhulu, kulokuba ngiwele esandleni somuntu.

15Ngakho iNkosi yasithumela umkhuhlane kuIsrayeli, kusukela ekuseni kwaze kwaba sesikhathini esimisiweyo; kwafa abantu abayizinkulungwane ezingamatshumi ayisikhombisa kusukela koDani kwaze kwaba seBerisheba.

16Lapho isithunywa siselulela isandla eJerusalema ukulibhubhisa, iNkosi uNkulunkulu yazisola ngalobobubi, yathi kuso isithunywa esasibhubhisa abantu: Yekela! Sekwanele. Isithunywa seNkosi sasisesizeni sikaAruwana waseJebusi.

17UDavida wasekhuluma eNkosini lapho ebona isithunywa esasibulala abantu, wathi: Khangela, yimi engonileyo, isono ngesami; pho, lezizimvu zenzeni na? Isandla sakho kasibe phezu kwami laphezu kwendlu kababa.

18UGadi wafika kuDavida ngalolosuku, wathi kuye: Hamba, wakhele iNkosi ialtare esizeni sikaAruwana waseJebusi.

19UDavida wasehambake njengokutsho kukaGadi, lanjengokulaya kweNkosi.

20Kwathi lapho uAruwana elunguza, wabona inkosi uDavida lenceku zayo besiza kuye; waphuma, wakhuleka kuyo ethe mbo ngobuso phansi.

21UAruwana wathi: Kungani ukuba inkosi yami ize encekwini yayo na? UDavida wathi: Ukuba ngithenge kuwe isiza, ngiyakhele iNkosi ialtare, ukuze umkhuhlane udede ebantwini.

22UAruwana wasesithi kuDavida: Inkosi yami ingathatha inikele ngalokho ekubona kufanele; nanzi inkabi zeminikelo yokutshiswa, nanzi lezimbulo lamajogwe enkabi kube zinkuni.

23UArawana wayinika inkosi konke lokhu; wathi kuyo: INkosi uNkulunkulu wakho kayikwamukele.

24Kodwa inkosi yathi kuAruwana: Atshi bo, ngizakukuthenga kuwe ngenani elithile; kangiyikunikela iminikelo yokutshiswa eNkosini uNkulunkulu wami engangibizanga lutho. UDavida wasesithenga isiza lenkabi ngamashekeli esiliva angamatshumi amahlanu.

25UDavida wayakhela khona iNkosi ialtare, wanikela iminikelo yokutshiswa leminikelo yokuthula. INkosi yakuzwa ukukhulekelwa kwelizwe, umkhuhlane waphela koIsrayeli.