uMika 2 - Ndebele Bible (iBhayibhili Elingcwele) 1978

Ukuxwayiswa kwabacindezeli

1Maye kulabo abenza amacebo obubi,

benze okubi emibhedeni yabo!

Lapho sekusile bazakwenza, ngoba balamandla okukwenza.

2Bahawukela amasimu, bawathathe ngodlakela,

lezindlu bayazithatha;

bathathela umuntu umuzi wakhe,

bamthathele lelifa lakhe.

3Ngakhoke iNkosi ithi: Ngenza amacebo amabi ngalesisizwe,

elingayikukhupha intamo zenu kuwo;

futhi kalisayikuhamba ngokuzikhukhumeza,

ngoba kuzakuba yisikhathi esibi leso.

4Ngalolosuku bazahlabela ingoma eyinhlekisa ngani,

bakhale isililo esikhulu, bathi:

Ilizwe labantu bakithi labiwe;

kakho ongalibuyisa kithi;

labo abasithumbileyo basithathele amasimu ethu;

sichithekile impela!

5Ngenxa yalokhu kakuyikuba khona ozakulenzela inkatho

ngentambo ebandleni leNkosi.

6Abantu batshumayela bathi:

Lingatshumayeli, lingatshumayeli ngalezizinto;

ihlazo kaliyikusehlela.

7Lithi abakoIsrayeli baqalekisiwe na?

INkosi iyaphangisa ukuthukuthela na?

Lezi ziyizenzo zayo na?

Kawamsizi yini amazwi ayo ohamba ngobuqotho na?

8INkosi ithi: Kanti liyizitha zabantu bami,

libahlubule ingubo zabo abathanda ukuthula,

lalabo abadlulayo bevela empini, besithi bavikelekile.

9Lixotshe abesifazana babantu bami ezindlini abazithandayo;

ebantwaneni babo lisuse udumo lwami kokuphela.

10Sukani lihambe, ngoba lapha kakusiyo indawo yokuphumula,

ngenxa yokungcola okuletha ukuchitheka okukhulu.

11Uba kuhambahamba umuntu okhuluma umoya lamanga esithi:

Ngizalitshumayeza ngewayini lotshwala:

uzakuba ngumtshumayeli abamthandayo lababantu.

12Ngizakulibutha lonke, lina bakoJakobe,

ngibuthe abaseleyo bakoIsrayeli,

ngibabuthelele ndawonye njengezimvu esibayeni,

njengomhlambi osedlelweni lawo,

libe lixuku labantu ababanga umsindo.

13Umkhokheli wabo uzabavulela indlela,

bonke bazafohla, bafike esangweni, baphume ngalo.

Inkosi yabo izahamba phambi kwabo,

bekhokhelwa yiyo.