Eks 19 - Ndebele Bible (iBhayibhili Elingcwele) 1978

AbakoIsrayeli bafika eSinayi

1Ngenyanga yesithathu emva kokuphuma kwabakoIsrayeli eGibithe, bafika enkangala yaseSinayi.

2Sebesukile eRefidimi, baya bafika enkangala yaseSinayi, bamisa enkangala ngasentabeni, bahlala khona.

3UMose wenyukela kuNkulunkulu entabeni. INkosi yambiza isentabeni yathi: Tshono kuyo indlu kaJakobe, ubatshele abakoIsrayeli uthi:

4Likubonile lokho engikwenze kumaGibithe, lokuthi ngalithwala ngempiko zokhozi, ngalisondeza kimi.

5Ngakhoke uba lililalela ilizwi lami, ligcine isivumelwano sami, lizakuba ligugu kimi phakathi kwezizwe zonke; ngoba wonke umhlaba ungowami;1 Pet 2:9 Dute 4:20; 7:6; 14:2; 26:18; Tit 2:14

6lizakuba ngumbuso wabapristi lesizwe esingcwele kimi. Yiwo amazwi ozakuwatsho kwabakoIsrayeli.Isam 1:6; 5:10

7UMose wayabiza abalisa babantu, wabatshela wonke amazwi la emlaye wona iNkosi.

8Bonke abantu baphendula kanyekanye bathi: Konke iNkosi ekukhulumileyo sizakukwenza. UMose wabika eNkosini amazwi abantu.

9INkosi yathi kuMose: Ngiyeza kuwe ngeyezi elimnyama ukuba abantu bezwe nxa ngikhuluma lawe, bakukholwe kuze kube nininini.

UMose wayibikela iNkosi amazwi abantu.

10INkosi yathi kuMose: Hamba uye ebantwini, ubatshele bazihlambulule lamuhla lakusasa, bagezise ingubo zabo,

11babe sebelungile ngosuku lwesithathu; ngoba ngosuku lwesithathu iNkosi izakwehlela entabeni yaseSinayi phambi kwabantu bonke.

12Uzakubamisela abantu umkhawulo inxa zonke uthi: Qaphelani ukuba lingakhweli entabeni, lingafinyeleli ewatheni layo. Lowo othinta intaba uzakubulawa;Heb 12:18–20

13kazukuthintwa ngesandla, kodwa uzakukhandwa ngamatshe loba ahlatshwe ngomkhonto; loba kuyinyamazana loba kungumuntu, kakuyikuphila. Lapho uphondo selukhala okwesikhathi eside bazakuza entabeni.

14UMose wehla entabeni waya ebantwini, wabatshela ukuba bazihlambulule, bagezise ingubo zabo.

15Wathi ebantwini: Libe selilungile ngosuku lwesithathu; lingasondeli kowesifazana.

16Ngosuku lwesithathu sekusile, kwaba khona ukuduma lemibane leyezi elimnyama entabeni, kwezwakala ukukhala okukhulu kophondo; bonke abantu ababesemathenteni bathuthumela.Dute 4:11, 12 Isam 4:5

17UMose wasebakhupha abantu emathenteni ukuyamhlangabeza uNkulunkulu; bema ngaphansi kwentaba.

18Intaba yaseSinayi yayithunqa intuthu, ngoba iNkosi yehlela phezu kwayo ngomlilo; intuthu yayo yenyuka njengentuthu yesithando somlilo; intaba yonke yazamazama kakhulu.

19Ukukhala kophondo kwayakukhula. UMose wakhuluma, uNkulunkulu wamphendula ngokuduma.

20INkosi yehlela entabeni yaseSinayi, yafika engqongeni yentaba; yambiza uMose ukuba eze engqongeni yentaba; uMose wakhwela.

21INkosi yathi kuMose: Yehla, ubaxwayise abantu funa bafohle ukuzabona iNkosi, bafe abanengi.

22Labapristi abasondela eNkosini bazihlambulule funa iNkosi ibadumele.

23UMose wathi eNkosini: Abantu bangekhwele entabeni yaseSinayi, ngoba wena usilayile wathi: Misa umkhawulo entabeni, uyahlukanise ibe ngcwele.

24INkosi yathi kuye: Yehla, ubuye ukhwele uze kimi kanye loAroni; kodwa abapristi labantu ungabavumeli ukuba bafohle beze eNkosini, funa ibadumele.

25UMose wehla waya ebantwini, wabatshela.