Hubo 84 - Ndebele Bible (iBhayibhili Elingcwele) 1978

Ukulangatha indlu kaNkulunkulu

1Nkosi yamabandla,

yeka ubuhle bendlu yakho!

2Umphefumulo wami uyalangatha,

yebo, uyomela amaguma ethempeli leNkosi.

Inhliziyo yami lomzimba wami

kuyahlabelela ngokuthaba kuNkulunkulu ophilayo.

3Ngitsho lentaka iyafumanisa indlu,

lenkonjane ilaso isidleke lapho ingazalela khona abantwana bayo,

ema‐altareni akho, Nkosi yamabandla,

Nkosi yami loNkulunkulu wami.

4Babusisiwe abahlala endlini yakho,

bazakuhlala bedumisa wena.

5Babusisiwe abantu abamandla abo akuwe,

okukhona enhliziyweni zabo isifiso sokuya eZiyone.

6Lapho bedabula isihotsha saseBaka

basenza sibe yindawo yemithombo;

lezulu lokusewula liyasigcwalisa ngamachibi.

7Bayakhula emandleni,

baze babonakale phambi kukaNkulunkulu eZiyone.

8Nkosi Nkulunkulu wamabandla, zwana umkhuleko wami,

ulalele, wena Nkulunkulu kaJakobe.

9Nkulunkulu, khangela inkosi yethu,

ube lomusa kogcotshiweyo wakho.

10Ngoba usuku olulodwa emagumeni akho

luhle ukwedlula eziyinkulungwane ezikwenye indawo.

Kungcono ukuba ngihlale emnyango wendlu kaNkulunkulu wami

kulokuba ngihlale emathenteni ababi.

11Ngoba iNkosi uNkulunkulu ililanga lesihlangu,

iyaphana ngomusa lodumo;

kayibancitshi labo abahamba ngobuqotho.

12Nkosi yamabandla,

ubusisiwe umuntu othemba kuwe!