Isa 12 - Ndebele Bible (iBhayibhili Elingcwele) 1978

Ingoma yokubonga

1Wena ngalolosuku uzakuthi:

Ngizakukubonga, Nkosi, ngoba lanxa wawungithukuthelele,

ukuthukuthela kwakho kwadeda, wangiduduza.

2UNkulunkulu ungumkhululi wami,

ngizakuthemba ngingesabi;

ngoba iNkosi uNkulunkulu ingamandla ami lengoma yami,

isingumkhululi wami.

3Ngokuthokoza uzakukha amanzi emithonjeni yokukhululwa.

4Uzakutsho ngalolosuku uthi:

Bongani iNkosi, lidumise ibizo layo;

lidumise izenzo zayo phakathi kwezizwe,

limemezele ukuthi ibizo layo liphakeme.

5Hlabelelani eNkosini ngoba yenzile izinto ezinkulu;

lokhu kwaziwe emhlabeni wonke.

6Memezani, lihlabele ngokuthokoza, lina baseZiyone,

ngoba mkhulu phakathi kwenu oNgcwele kaIsrayeli.