uAmosi 4 - Ndebele Bible (iBhayibhili Elingcwele) 1978

1Zwanini lelilizwi, lina mankomokazi aseBashani,

elisentabeni yaseSamariya,

elicindezela abayanga, linyathezela phansi abaswelayo,

elithi kubomkenu: Lethani sinathe.

2INkosi uNkulunkulu ifungile ngebizo layo elingcwele, yathi:

Khangelani, insuku zizalifikela lapho bazalihudula ngezingwegwe,

labokucina kini ngengwegwe zokubamba inhlanzi.

3Lizakukhutshwa ngezikhala kube yilowo lalowo ngesiqondene laye,

lilahlelwe ngaphandle; kutsho iNkosi.

UIsrayeli kaphendukelanga eNkosini

4Wozani eBetheli, lizekona,

laseGiligali, lizekwandisa izono zenu,

lilethe imihlatshelo yenu ekuseni insuku zonke,

lokwetshumi kwenu kanye ngensuku ezintathu!

5linikele umhlatshelo wenu wokubonga ngokuwutshelweyo,

limemezele iminikelo yesihle liyizwakalise!

ngoba lithanda ukwenza njalo lina bakoIsrayeli,

kutsho iNkosi uNkulunkulu.

6Yimi engalethela indlala emizini yenu yonke,

lokusweleka kokudla kuzo zonke indawo zenu;

kanti kaliphendukelanga kimi, kutsho iNkosi.

7Futhi ngalincitsha izulu kusasele inyanga ezintathu ukuba kuvunwe;

ngalinisa komunye umuzi, kangaze ngalinisa komunye,

esinye isiqinti sanethwa,

kwathi leso esinganethwanga satsha.

8Kwasekuhamba imizi emibili loba emithathu,

yayanatha amanzi emzini owodwa,

kodwa kayikholwanga;

kanti kaliphendukelanga kimi, kutsho iNkosi.

9Ngalitshaya ngalilethela ukutshisa lengumane,

ngatshisa izivande zenu lezivini zenu,

izihlahla zenu zemikhiwa lezihlahla zenu zamaoliva zadliwa zintethe;

kanti kaliphendukelanga kimi, kutsho iNkosi.

10Ngathumela phakathi kwenu isifo esifana lesaseGibithe,

ngabulala insizwa zenu empini,

ngathumba amabhiza enu;

ngenza ukuba isihonqo senu sinuke kakhulu;

kanti kaliphendukelanga kimi, kutsho iNkosi.

11Ngachitha abanye benu njengalokho uNkulunkulu achitha iSodoma leGomora,

lalinjengesikhuni esophulwe eziko;

kanti kaliphendukelanga kimi, kutsho iNkosi.

12Ngakhoke ngizakwenza lokhu kuwe, Israyeli;

ngoba ngizakwenza lokhu kuwe,

zilungiselele ukuhlangana loNkulunkulu wakho, Israyeli.

13Ngoba lowo owabumba izintaba, wadala umoya,

lotshela umuntu ukuba imicabango yakhe iyini,

owenza ukusa kube mnyama,

onyathela ezindaweni eziphakemeyo zomhlaba,

yiNkosi, uNkulunkulu wamabandla, ibizo lakhe.