Hubo 115 - Ndebele Bible (iBhayibhili Elingcwele) 1978

Udumo kalube eNkosini yodwa

1Kakungabi yithi, Nkosi, kakungabi yithi,

kodwa kakube libizo lakho elinikwa udumo,

ngenxa yothando lwakho olungapheliyo lobuqotho bakho.

2Izizwe zizakutsho ngani ukuthi:

Ungaphi uNkulunkulu wabo na?

3Owethu uNkulunkulu usezulwini,

wenza konke akuthandayo.

4Izithombe zabo ngezesiliva legolide,

umsebenzi wezandla zabantu.

5Imilomo zilayo, kodwa kazikhulumi;

lamehlo zilawo, kodwa kaziboni;

6zilendlebe, kodwa kazizwa;

impumulo zilayo, kodwa kazinuki.

7Zilezandla, kodwa kaziphathi;

lenyawo zilazo, kodwa kazihambi;

kazikhulumi.

8Abazenzayo bafana lazo,

kanye labo bonke abathemba kuzo.

9Israyeli, themba eNkosini.

Yona ilusizo lwakho lesihlangu sakho.

10Wena ndlu kaAroni, themba eNkosini.

Yona ilusizo lwakho lesihlangu sakho.

11Lina elesaba iNkosi, thembani eNkosini.

Yona ilusizo lwenu lesihlangu senu.

12INkosi isikhumbule, izakusibusisa;

izakubusisa indlu kaIsrayeli,

ibusise indlu kaAroni;

13izakubusisa labo bonke abayesabayo,

abancinyane labakhulu.

14INkosi kayilandise lina

labantwana benu;

15kalibe ngababusisiweyo yiNkosi

eyenza izulu lomhlaba.

16Amazulu ngaweNkosi,

kodwa umhlaba iwunikile abantu.

17Abafileyo kabayidumisi iNkosi,

kakho loyedwa wabo abehlela elizweni labafileyo oyidumisayo.

18Kodwa thina sizakuyibonga iNkosi

kusukela kulesisikhathi kuze kube nininini.

Dumisani iNkosi!