Eks 15 - Ndebele Bible (iBhayibhili Elingcwele) 1978

Ihubo likaMose

1UMose labakoIsrayeli basebehlabelela lelihubo eNkosini, bathi:

Ngizahlabelela iNkosi, ngoba inqobile, ilodumo.

Ibhiza lomgadi walo ikuphosele olwandle.

2INkosi ingamandla ami lehubo lami,

iyikusiliswa kwami.

InguNkulunkulu wami, ngizakuyidumisa,

loNkulunkulu kababa, ngizakuyiphakamisa.

3INkosi iliqhawe,

ithiwa yiNkosi.

4Inqola zikaFaro lempi yakhe ikuphosele olwandle,

induna zakhe ezikhethiweyo zitshone oLwandle oluBomvu.

5Amanzi azikileyo azisibekela;

zatshona enzikini njengelitshe.

6Isandla sakho sokunene, Nkosi, sibe lodumo ngamandla aso,

isandla sakho sokunene, Nkosi, siyaphahlaza isitha.

7Ngobukhulu bobukhosi bakho uyachitha abakuvukelayo.

Lapho uthuma ulaka lwakho, luyabatshisa njengezinhlanga.

8Ngokufutha kwamakhala akho amanzi aba yinqwaba,

amanzi agelezayo ema aba yinqumbi,

amanzi azikileyo aba njengomduli phakathi kolwandle.

9Isitha sathi: Ngizaxotshana labo ngibafice, ngahlukanise impango.

Inkanuko yami izakusutha bona,

ngizahwatsha umhedla wami, isandla sami sizababhubhisa.

10Waphephetha ngomoya wakho, ulwandle lwabasibekela.

Batshona njengomnuso emanzini amakhulu.

11Ngubani onjengawe, Nkosi, phakathi kwabonkulunkulu na?

Ngubani onjengawe olobukhosi ngobungcwele,

owesabekayo ngezenzo ezinkulu, owenza izimangaliso na?

12Lapho uselula isandla sakho sokunene,

umhlaba wabaginya.

13Ngomusa wakho ubaholile abantu obahlengileyo,

ngamandla akho wabaholela endaweni yakho engcwele.

14Izizwe zizwile, ziyathuthumela;

abakhileyo eFilistiya batshaywe luvalo.

15Izinduna zaseEdoma ziyaphaphatheka,

izikhulu zaseMowabi zitshaywa luvalo,

bonke abakhileyo eKanani baphela amandla.

16Behlelwa luvalo lokwesaba;

ngamandla engalo yakho kabanyikinyeki njengelitshe,

baze bachaphe abantu bakho, Nkosi, baze bachaphe labo obathengileyo.

17Uzabangenisa, ubamise entabeni yakho,

indawo ozenzele yona, Nkosi, ukuba uhlale kuyo,

indawo engcwele eziyimisileyo izandla zakho, Nkosi.

18INkosi izakubusa kuze kube nini lanini.

19Kwathi lapho amabhiza kaFaro engena olwandle kanye lenqola zakhe labagadi bamabhiza, iNkosi yabuyisela amanzi olwandle phezu kwabo, kodwa abakoIsrayeli bawela ulwandle behamba emhlabathini owomileyo.

20UMiriyamu umprofethikazi, udadewabo kaAroni, wasithatha isigubhu sakhe; bonke abesifazana baphuma bemlandela, bephethe izigubhu, begida.

21UMiriyamu wabahlabelela wathi:

Hlabelelani iNkosi, ngoba inqobile, ilodumo.

Ibhiza lomgadi walo ikuphosele olwandle.

Amanzi ababayo aseMara

22UMose wasebaholela phambili abakoIsrayeli besuka oLwandle oluBomvu, baya enkangala yaseShuri; bahamba enkangala insuku ezintathu bengafumani manzi.

23Kwathi lapho befika eMara babengelakuwanatha amanzi aseMara ngoba ayebaba; ngakhoke indawo yathiwa yiMara.

24Abantu bamsola uMose besithi: Sizakunathani?

25Wakhala eNkosini. INkosi yamtshengisa isihlahla; kwathi esesiphosele emanzini, amanzi aba mnandi. INkosi yabamisela khona isimiso lomthetho, yabalinga,

26yathi: Uba lilalela ilizwi leNkosi uNkulunkulu wenu ngenhliziyo yenu yonke, lenze okulungileyo emehlweni ayo, lilalele imilayo yayo, ligcine zonke izimiso zayo, kangiyikwehlisela phezu kwenu lasinye sezifo engazehlisela phezu kwamaGibithe; ngoba ngiyiNkosi eliphilisayo.

27Basebefika eElimi lapho kwakukhona imithombo elitshumi lambili yamanzi, lamalala angamatshumi ayisikhombisa; bamisa khona ngasemanzini.