1 Sam 9 - Ndebele Bible (iBhayibhili Elingcwele) 1978

USawuli ukhethwa ukuba abe yinkosi

1Kwakukhona indoda yakoBenjamini ibizo layo linguKishi, indodana kaAbiyeli, kaZerori, kaBekorathi, kaAfiya, owakoBenjamini; yayiyindoda enothileyo.

2Yayilendodana ibizo layo linguSawuli; ilijaha elihle; kwakungelamuntu omuhle kulayo phakathi kwabakoIsrayeli. Kusukela emahlombe akhe kusiya phezulu wayemude kulabo bonke abantu.

3Obabhemi bakaKishi, uyise kaSawuli, balahleka. Ngakho uKishi wasesithi kuSawuli indodana yakhe: Thatha enye inceku, uhambe uyedinga obabhemi.

4Badabula izintaba zakoEfrayimi, badabula ilizwe laseShalisha, kodwa kabababonanga. Basebedabula ilizwe laseShalima, kodwa babengekho lalapho. Basebedabula ilizwe lakoBenjamini, kodwa kabababonanga.

5Kwathi sebefikile elizweni laseZufi, uSawuli wathi encekwini yakhe eyayilaye: Woza sibuyele, hlezi ubaba ayekele ukucabanga ngabobabhemi abesenqinekela thina.

6Kodwa yona yathi kuye: Kukhona kulumuzi umuntu kaNkulunkulu, ungumuntu ohloniphekayo ngoba konke akutshoyo kuya kwenzeke. Asiye kuye; mhlawumbe angasitshela ngalokho esihamba ngakho.

7USawuli wasesithi encekwini yakhe: Uba sisiya kuye, sizamphathelani lowomuntu na? Ngoba kakuselakudla emigodleni yethu; futhi kasilasipho esingasiphathela lowomuntu kaNkulunkulu. Silani na?

8Inceku yabuya yamphendula uSawuli yathi: Ngilakho lapha okwesine kweshekeli lesiliva, ngizamnika khona lowomuntu kaNkulunkulu ukuba asitshele ngohambo lwethu.

9— Endulo koIsrayeli lapho umuntu esiyabuza kuNkulunkulu, wayesithi: Woza siye kumboni; ngoba lo osethiwa ngumprofethi lamuhla kuqala kwakuthiwa ngumboni. —

10USawuli wasesithi encekwini yakhe: Kuhle lokho; wozake sihambe. Basebehamba besiya emzini lapho kwakukhona lowomuntu kaNkulunkulu.

11Besakhwela umqanso womuzi bahlangana lamantombazana esiyakukha amanzi, bathi kuwo: Umboni ukhona na?

12Aphendula athi: Ukhona, nanguya ngaphambi kwenu. Phangisani kodwa; usand’ukufika ekhaya ngoba abantu balomhlatshelo lamuhla endaweni ephakemeyo yokukhonzela.

13Lizamfumana lisangena nje ngekhaya engakayikudla endaweni ephakemeyo yokukhonzela; abantu kabayikudla engakafiki, ngoba nguye obusisa umhlatshelo, andubana badle abamenyiweyo. Hambanike, lizamfumana masinyane nje.

14Basebesiya emzini; besangena emzini, bambona uSamuweli ehlangabezana labo esiya endaweni ephakemeyo yokukhonzela.

15Ngosuku olungaphambili uSawuli engakafiki, iNkosi yamambulela uSamuweli yathi:

16Kusasa ngalesisikhathi ngizathumela kuwe umuntu ovela elizweni lakoBenjamini, umgcobe abe ngumbusi wabantu bami uIsrayeli; uzakhulula abantu bami ezandleni zamaFilistiya. Ngibonile ukuhlupheka kwabantu bami, lokukhala kwabo kufinyelele kimi.

17Kwathi uSamuweli ebona uSawuli, iNkosi yathi kuye: Nanguke umuntu ebengikhuluma ngaye kuwe. Nguye lo ozabusa abantu bami.

18USawuli wasondela kuSamuweli ngasemnyango wathi: Akungitshele ukuba ingaphi indlu yomboni.

19USamuweli wamphendula uSawuli wathi: Yimi umboni; hamba phambili uye endaweni ephakemeyo yokukhonzela, ngoba lamuhla uzakudla lami; kusasa ngizakukuyekela uhambe ngikutshele konke okusenhliziyweni yakho.

20Mayelana lobabhemi bakho asebelensuku ezintathu belahlekile, ungabe usazihlupha ngabo, ngoba sebebonakele. Kodwa kuyini abakukhalelayo bonke abakoIsrayeli na? Nguwe lendlu yonke yakwenu.

21USawuli waphendula wathi: Kangisuye owakoBenjamini, isizwe esincinyane kulazo zonke izizwe zakoIsrayeli na? Lendlu yakwethu kayincinyane kulazo zonke izindlu zesizwe sakoBenjamini na? Phoke, ukhulumelani kimi ngalindlela na?

22USamuweli wasemthatha uSawuli lenceku yakhe, wabangenisa endlini yokudlela, wabahlalisa endaweni engaphambi kwabamenyiweyo, ababengamatshumi amathathu.

23USamuweli wasesithi kumpheki: Letha isabelo senyama engikunike sona, ngakutshela ukuba usilondoloze.

24Umpheki wasethatha umlenze lesinqe, wakubeka phambi kukaSawuli. USamuweli wathi: Nanku obekelwe khona, kubekwe phambi kwakho. Dlana; ngoba bekubekelwe wena kuze kufike lesisikhathi ukuba udle labamenyiweyo. USawuli wadla loSamuweli ngalolosuku.

25Sebedlile endaweni ephakemeyo yokukhonzela bangena emzini, bamendlalela uSawuli phezulu ophahleni, walala khona.

26Nxa kusayo, uSamuweli wambiza uSawuli ophahleni wathi: Vuka ukuze ngikuqhube. Wasevuka uSawuli, baphumela phandle bobabili, yena loSamuweli.

27Sebesehlela ekucineni komuzi, uSamuweli wathi kuSawuli: Tshela inceku ukuba yedlule. Lapho isiyedlule, uSamuweli wasesithi: Wena akume lapha kancinyane, ukuze ngikutshele ilizwi likaNkulunkulu.