1INkosi yathi: Hamba uyethenga inqayi; uthathe abanye abadala babantu labanye abapristi abadala,
2uye esihotsheni seBeni‐Hinomu eSangweni leziNdengezi, utshumayele khona amazwi engikutshela wona.2 Kho 23:10; Jer 7:30–32; 32:34–35
3Uzakuthi: Zwanini ilizwi leNkosi, lina makhosi akoJuda labakhileyo eJerusalema. INkosi yamabandla, uNkulunkulu kaIsrayeli, ithi: Khangelani, ngizaletha okubi okukhulu kulindawo, kuthi labo bonke abakuzwayo kubabande indlebe.
4Ngoba abantu bangitshiyile, bayingcolisa lindawo ngokutshisela kiyo impepha kwabanye onkulunkulu abangabaziyo bona labokhokho babo kanye lamakhosi akoJuda; futhi bayigcwalisa lindawo ngegazi labangelacala,
5bakha izindawo eziphakemeyo zikaBali ukutshisa amadodana abo ngomlilo abe ngumnikelo wokutshiswa kuBali, into engingabalayanga yona ngayimisa, lengafikanga engqondweni yami.Levi 18:21
6Ngakhoke insuku ziyeza, kutsho iNkosi, lapho lindawo ingasayikuthiwa yiTofethi, loba isihotsha seBeni‐Hinomu, kodwa izathiwa yisiHotsha sokuBulala.
7Ngizakuchitha kulindawo amacebo akoJuda laweJerusalema, ngenze ukuba abantu babo babulawe empini phambi kwezitha zabo, langesandla salabo ababazingelayo; nginike izidumbu zabo zibe yikudla kwenyoni zaphezulu lenyamazana zeganga.
8Ngenze lumuzi ube yinto eyesabekayo, into yokuncifelwa; bonke abadlula khona bazatshaqeka, bancife ngenxa yazo zonke inhlupheko zawo.
9Ngizakubenza badle inyama yamadodana leyamadodakazi abo; bonke bazakudla inyama yabomakhelwana babo ngesikhathi sokuvinjezelwa lesokuhlupheka okuzalethwa yizitha zabo lalabo ababazingelayo.
10Ubusuyibulala inqayi phambi kwamadoda ohamba lawo;
11ubususithi kibo: INkosi yamabandla ithi: Ngokunjalo ngizabulala lababantu lalumuzi, njengalokho umuntu ebulala imbiza yombumbi, ingaphindi ilungiswe futhi. Abantu bazangcwatshela eTofethi, ngoba kungasekho enye indawo lapho bengangcwatshelwa khona.
12Ngizakwenza njalo kulindawo lakubo abakhileyo kiyo, ngenze lumuzi ufanane leTofethi, kutsho iNkosi.
13Izindlu zaseJerusalema lezamakhosi akoJuda, zonke izindlu okwatshiselwa phezu kwazo impepha kuzo zonke inkanyezi, okwachithelwa kuzo leminikelo yokuthululwa kwabanye onkulunkulu, zizangcoliswa njengendawo yaseTofethi.
14Wabuyake uJeremiya evela eTofethi, lapho iNkosi yayimthume ukutshumayela khona, wema egumeni lendlu yeNkosi, wathi ebantwini bonke:
15INkosi yamabandla, uNkulunkulu kaIsrayeli, ithi: Khangelani, ngizakwehlisela kulumuzi lakuyo yonke imizana yawo konke okubi engikutshiloyo, ngoba balenkani, bala ukuzwa amazwi ami.
Who We AreWhat We EelieveWhat We Do
2025 by iamachristian.org,Inc All rights reserved.
