uNehimiya 9 - Ndebele Bible (iBhayibhili Elingcwele) 1978

UEzra uyakuvuma ukona kwabakoIsrayeli

1Ngosuku lwamatshumi amabili lane lwaleyonyanga abakoIsrayeli babuthanela ukuzila ukudla, begqoke izambatho zokulila, begcwele uthuli emakhanda.

2AbakoIsrayeli bazahlukanisa labo bonke abezizweni, bema bavuma izono zabo lobubi babokhokho babo.

3Bema endaweni yabo, bafunda ugwalo lomlayo weNkosi uNkulunkulu wabo okwama‐awa amathathu; bavuma izono zabo okwama‐awa amathathu futhi bekhonza iNkosi uNkulunkulu wabo.

4Ethaleni lamaLevi kwakumi oJeshuwa loBani loKadimiyeli loShebaniya loBuni loSherebiya loBani loKenani; bamemeza ngelizwi elikhulu eNkosini uNkulunkulu wabo.

5Kwasekusithi amaLevi oJeshuwa loKadimiyeli loBani loHashabineya loSherebiya loHodiya loShebaniya loPethahiya bathi:

Sukumani libonge iNkosi uNkulunkulu wenu lithi:

Kusukela endulo kuze kube nininini liyadumiseka ibizo lakho elilodumo leliphakemeyo

phezu kwakho konke okudunyiswayo lokubongwayo.

6Nguwe wedwa oyiNkosi owenza izulu eliphezulu kakhulu lakho konke okukulo,

lomhlaba lakho konke okukuwo,

lezinlwandle lakho konke okukuzo,

wena uyakulondoloza konke;

lakho konke okusezulwini kuyakukhonza.

7Wena uyiNkosi,

uNkulunkulu owakhetha uAbrama,

wamkhupha eUri elamaKaladiya,

wambiza ngokuthi nguAbrahama;

8wamfumanisa ethembekile kuwe,

wenza laye isivumelwano sokunika inzalo yakhe ilizwe lamaKanani lamaHethi lamaAmori lamaPerizi lamaJebusi lamaGirigashi;

usigcwalisile lesisithembiso sakho,

ngoba wena ulungile.

9Wakubona ukuhlupheka kwabokhokho eGibithe,

wezwa ukukhala kwabo ngasoLwandle oluBomvu,

10wenza izibonakaliso ezimangalisayo kuFaro

lakuzo zonke inceku zakhe lakubo bonke abantu belizwe lakhe,

ngoba wazi ukuba benza okubi kubokhokho;

wazenzela ibizo njengalamhlanje.

11Wahlukanisa amanzi olwandle phambi kwabo

ukuba baluchaphe emhlabathini owomileyo,

waphosela ababaxotshayo enzikini njengelitshe liphoselwa emanzini amanengi.

12Wabahola ngensika yeyezi emini langensika yomlilo ebusuku

ukubakhanyisela indlela abazahamba ngayo.

13Wehlela phezu kwentaba yaseSinayi,

wakhuluma labo usezulwini,

wabanika imithetho eqondileyo,

lemilayo eqotho, lezimiso ezinhle, lemilayezelo elungileyo,

14wabazisa iSabatha lakho elingcwele,

wabanika imilayezelo lezimiso lomlayo ngenceku yakho uMose.

15Wabanika ukudla okuvela ezulwini lapho sebelambile,

lamanzi aphuma edwaleni lapho sebomile;

wabatshela ukuba bayelithumba ilizwe owawufunge ukubanika lona.

16Kodwa okhokho bazikhukhumeza,

baba lenkani, kabayilalelanga imilayo yakho.

17Bala ukulalela, bakhohlwa izimangaliso owazenza phakathi kwabo;

baba lenkani, bazikhethela umkhokheli ukuba babuyele ebugqilini babo eGibithe.

Kodwa wena unguNkulunkulu othanda ukuthethelela,

olumusa lesihawu, ophuza ukuthukuthela,

lolothando olungapheliyo, kawubalahlanga.

18Lalapho sebezenzele ithole elibunjiweyo bathi:

Nangu unkulunkulu wakho, Israyeli, okukhuphe elizweni laseGibithe.

Ngalamazwi bakuhlambaza kakhulu, Nkosi.

19Kodwa wena ngesihawu sakho esikhulu kawubalahlanga enkangala;

insika yeyezi eyayibahola endleneni kayisukanga phambi kwabo emini,

lensika yomlilo eyabahola ebusuku,

ibakhanyisela indlela abazahamba ngayo, kayisukanga.

20Wabanika umoya wakho omuhle ukubafundisa;

kawubancitshanga imana yakho,

wabanika lamanzi okunatha.

21Iminyaka engamatshumi amane wabalondoloza enkangala,

kabaswelanga lutho;

izigqoko zabo kaziguganga,

lenyawo zabo kazivuvukanga.

22Wabanika imibuso lezizwe,

wababela khona konke;

bathumba ilizwe likaSihoni inkosi yaseHeshiboni lelikaOgi inkosi yaseBashani.

23Wandisa inzalo yabo, yaba ngangezinkanyezi zaphezulu,

wabangenisa elizweni owawutshele okhokho babo ukuba balihlasele balithumbe.

24Isingenile inzalo yabo yalithumba ilizwe;

wahlula phambi kwayo abakhileyo elizweni, amaKanani,

wabanikela ezandleni zabo,

amakhosi labantu belizwe,

ukuba benze abakuthandayo kibo.

25Bathumba imizi ebiyelweyo lelizwe elinothileyo,

lezindlu ezigcwele zonke izinto ezinhle,

imithombo egejiweyo lezivini lezihlahla zamaoliva

lezihlahla ezilezithelo ezinengi.

Badla basutha, bazimuka,

bazithokozisa ngezinto ezinhle owabapha zona.

26Kodwake kabalalelanga, bakuvukela wena,

bafulathela umlayo wakho,

babulala abaprofethi bakho ababebaxwayisa ukuze babuyele kuwe,

bakuhlambaza kakhulu.

27Ngakho wabanikela ezitheni zabo ezabahluphayo;

ngesikhathi sokuhlupheka kwabo sebekhala kuwe,

wabezwa usezulwini.

Ngomusa wakho omkhulu wabanika abakhululi ababakhulula ezitheni zabo.

28Lapho sebelokuthula benza okubi futhi phambi kwakho,

wabanikela ezitheni zabo ezabanqobayo;

kanti nxa sebebuyile bakhala kuwe,

wena wabezwa usezulwini;

izikhathi ezinengi wabakhulula ngomusa wakho.

29Wabaxwayisa ukuze babuyele emlayweni wakho;

kodwa bazikhukhumeza,

kabayilalelanga imilayo yakho;

bayephula imithetho yakho umuntu aphila ngokuyilalela;

baqinisa amakhanda, baba lenkani,

kabaze balalela.

30Wababekezelela iminyaka eminengi,

wabaxwayisa ngomoya wakho ngabaprofethi bakho;

kodwa kabalalelanga.

Ngakhoke wabanikela ebantwini bezizwe.

31Kanti ngomusa wakho omkhulu kawubaqedanga,

kawubatshiyanga;

ngoba wena unguNkulunkulu olomusa lesihawu.

32Ngakhoke, Nkulunkulu wethu omkhulu,

wena olamandla lowesabekayo,

ogcina isivumelwano lolothando olungapheliyo,

ungadeleli ubunzima bonke obusehleleyo thina sonke,

lamakhosi ethu lezikhulu zethu labapristi bethu labaprofethi bethu

labokhokho bethu labo bonke abantu bakho,

kusukela esikhathini samakhosi aseAsiriya kuze kube lamhla.

33Wena ubulungile kukho konke okusehleleyo,

wena ubuthembekile,

thina senza okubi;

34amakhosi ethu lezikhulu zethu labapristi bethu

labokhokho bethu kabawugcinanga umlayo wakho,

kabalalelanga lemilayezelo yakho lokuxwayisa kwakho obaxwayise ngakho.

35Kabakukhonzanga embusweni wabo besakholisa ukuphumelela okukhulu owabanika khona lamazwe abanzi avundileyo owabanika wona;

kabazitshiyanga izenzo zabo ezimbi.

36Sesiyizigqili lamhla elizweni owalinika okhokho

ukuba badle izithelo zalo lenotho yalo;

yebo, siyizigqili kulo.

37Izithelo zalo ezinengi zingezamakhosi osibekele wona ngenxa yezono zethu;

alamandla phezu kwethu

laphezu kwenkomo zethu azenzela ngokuthanda,

sisosizini olukhulu.

Abantu benza isivumelwano loNkulunkulu

38Ngenxa yakho konke lokhu senza isivumelwano esiqinileyo, siyasigcwalisa, izikhulu zethu lamaLevi ethu labapristi bafake uphawu lwabo.