Jobe 11 - Ndebele Bible (iBhayibhili Elingcwele) 1978

Inkulumo yokuqala kaZofari: uthi uJobe wonile

1Wasephendula uZofari waseNama esithi:

2Kambe kawayikuphendulwa amazwi amanengi kangaka na?

Umuntu okhulumayo kakhulu wanda ukuba ngoqondileyo na?

3Ukulawula kwakho kuzathulisa abantu na?

Lalapho ukloloda, kakho ongakukhuza na?

4Ngoba uthi: Ukufundisa kwami kulungile,

ngihlambulukile emehlweni kaNkulunkulu.

5Kungathi uNkulunkulu angakhuluma,

avule umlomo wakhe kuwe,

6ukuba akutshele imfihlakalo yokuhlakanipha!

Ngoba ukwazi kwakhe kunenginengi.

Yazike ukuba uNkulunkulu ukutshaya

ngokungalingananga icala lakho.

7Kambe ungayihlola yini imfihlakalo kaNkulunkulu,

ungakuhlola ukuphelela kukaSomandla na?

8Kuphakeme kulezulu, ungenzani na?

Kutshonile kulendawo yabafileyo, ungazini na?

9Isilinganiso sakho side kulomhlaba,

sibanzi kulolwandle.

10Uba ekwedluleni kwakhe ebopha umuntu,

amthonisise, ngubani ongamkhalimela na?

11Ngoba uyabazi abantu ababi;

lapho ebona ububi kayikubuqaphelisa na?

12Umuntu oyisiphukuphuku angaba lokuqedisisa kuphela

nxa ubabhemi weganga engazala umuntu!

13Uba ulungisa inhliziyo yakho,

ungelulela izandla zakho kuye.

14Uba uphethe ububi, bulahle,

ungavumeli buhlale emathenteni akho.

15Ng’khona ungaphakamisa ubuso bakho ungelanhloni,

uqine, ungesabi.

16Uzakhohlwa ukuhlupheka kwakho,

ukukhumbule njengamanzi asedlulile.

17Lokuphila kwakho kuzakhanya kulemini,

lomnyama wakho ube njengasekuseni,

18Uzakuba lethemba ngoba ithemba likhona;

uzahlala kuhle, uvikelekile.

19Uzalala engethuswa muntu,

abanengi bazincengele kuwe.

20Kodwa amehlo ababi azafiphala,

baswele indawo yokuphephela,

ithemba abalalo libe yikufa kuphela.