Levi 2 - Ndebele Bible (iBhayibhili Elingcwele) 1978

Iminikelo yempuphu

1Lapho umuntu enikela eNkosini umnikelo wempuphu, umnikelo wakhe kawube yimpuphu ecolekileyo; uzathela amafutha kuwo, abeke inhlaka kuwo,

2awulethe kumadodana kaAroni angabapristi, acuphe kuwo impuphu ecolekileyo lamafutha, kanye lenhlaka yawo yonke; umpristi akutshise lokhu ealtareni kube yisikhumbuzo, umnikelo owenziwe ngomlilo, olephunga elimnandi eNkosini.

3Okuseleyo komnikelo wempuphu kuzakuba ngokukaAroni lokwamadodana akhe; yikhu okungcwele kakhulu eminikelweni eyenzelwe iNkosi ngomlilo.

4Nxa uletha umnikelo wempuphu ephekwe eziko, kawube ngowamaqebelengwana angelamvubelo empuphu ecolekileyo ahlanganiswe lamafutha, loba izinkwa ezincinyane ezingelamvubelo ezigcotshwe ngamafutha.

5Uba umnikelo wakho ungumnikelo wempuphu ephekwe ngomganu wensimbi, kawube ngowempuphu ecolekileyo engelamvubelo, ixubene lamafutha.

6Uwuhlephune ube yizihlephu, uthele amafutha kuzo; kungumnikelo wempuphu.

7Uba umnikelo wakho ungumnikelo wempuphu ephekwe ngembiza, kawube ngowempuphu ecolekileyo kanye lamafutha.

8Letha eNkosini umnikelo wempuphu owenziwe ngalezizinto, uwunike umpristi ozakuwuletha ealtareni.

9Umpristi uzathatha emnikelweni wempuphu okuyisikhumbuzo, akutshise ealtareni, kube ngumnikelo owenziwe ngomlilo, olephunga elimnandi eNkosini.

10Okuseleyo komnikelo wempuphu kuzakuba ngokukaAroni lokwamadodana akhe; yikhu okungcwele kakhulu eminikelweni eyenzelwe iNkosi ngomlilo.

11Iminikelo yempuphu oyinikela eNkosini kayifakwa imvubelo, ngoba kawuyikutshisa imvubelo loba inyosi kube ngumnikelo owenzelwe iNkosi ngomlilo.

12Ungakunikela eNkosini kube ngumnikelo wezithelo zokuqala, kodwa kakunikelwa ealtareni kube liphunga elimnandi.

13Lungisa yonke iminikelo yakho yempuphu uyitshwaye; ungavumeli ukuba umnikelo wakho wempuphu uswele itshwayi elesivumelwano sikaNkulunkulu wakho. Nikela yonke iminikelo yakho iletshwayi.

14Uba unikela umnikelo wempuphu owezithelo zokuqala zakho eNkosini, uzanikela ngamabele amatsha ayizikhwebu ezosiweyo;

15uthele amafutha kuwo, ubeke inhlaka phezu kwawo; lokhu kungumnikelo wempuphu.

16Umpristi atshise ingxenye yamabele leyamafutha layo yonke inhlaka yawo, kube yisikhumbuzo; kungumnikelo owenzelwe iNkosi ngomlilo.