Hos 10 - Ndebele Bible (iBhayibhili Elingcwele) 1978

1UIsrayeli ulivini elihle kakhulu elithelayo izithelo.

Ngokwanda kwezithelo zakhe wandisa ama‐altare akhe;

langokwanda kobuhle belizwe lakhe wenza insika zakhe zokukhonzela zibe zinhle.

2Inhliziyo yabo ikhohlakele,

khathesi sebezakuthwala icala labo.

INkosi izabhidliza ama‐altare abo,

idilize lensika zabo ezingcwele.

3Ngoba khathesi sebezakuthi: Kasilankosi thina,

ngoba kasiyesabi iNkosi uNkulunkulu;

inkosike ingasenzelani na?

4Bakhuluma amazwi nje,

benze izivumelwano ngezifungo zamanga;

ukwahlulela sekunjengokhula olubulalayo olukhula emifolweni yensimu.

5Abakhileyo eSamariya bayathuthumela ngethole laseBeti‐Aveni.

Abantu balo bazalililela, labapristi bezithombe balikhalele,

bekhalela ubuhle balo osebususiwe kulo.

6Yebo, lona lizathwalelwa eAsiriya,

libe ngumthelo enkosini enkulu.

UEfrayimi uzayangeka,

loIsrayeli abe lenhloni ngokungalaleli kwakhe.

7ISamariya lenkosi yalo kuzanyamalala njengebazelo elindendayo emanzini.

8Indawo eziphakemeyo zokukhonzela ezilize eziyisono sikaIsrayeli zizachithwa;

ameva lokhula kuzamila emaaltareni abo.

Bazakuthi ezintabeni: Sisibekeleni;

bathi lasemaqaqeni: Welani phezu kwethu.

9INkosi ithi: Kusukela ensukwini zaseGibeya wonile, Israyeli,

kulokhu kusenjalo lalamhla.

Impi kayiyikubafica eGibeya na?

10Ngizakubasukela abantu abahlamukayo, ngibatshaye;

izizwe zizakubabuthanela nxa betshayelwa izono zabo ezinengi.

11UEfrayimi ulithokazi elithambileyo elithanda ukubhula amabele;

ngilibophele ejogweni;

ngambophela uEfrayimi, ukuba alime,

loJakobe wambulalela amagade.

12Zihlanyeleleni ukulunga,

livune izithelo zothando olungapheliyo;

qhathani ingqatho yenu, ngoba kuyisikhathi sokuyidinga iNkosi,

ukuba ifike, ithele ukulunga phezu kwenu.

13Lilime ububi, lavuna ukungalungi,

lidlile izithelo zamanga.

Ngoba lithembile inqola zenu zempi,

lobunengi bamaqhawe enu;

14ngalokho kuzakuba khona ukuxokozela kwempi

phakathi kwabantu bakini,

kudilizwe lenqaba zenu zonke,

njengalokhu uShalimani wachitha iBeti‐Aribeli ngosuku lwempi,

kwachotshozwa onina labantwana babo.

15Kuzakuba njalo kuwe, Israyeli,

ngenxa yobubi bakho obukhulu;

njengoba ilanga lingaphuthi ukuphuma,

kunjaloke lenkosi kuIsrayeli izachithwa.