Izililo 5 - Ndebele Bible (iBhayibhili Elingcwele) 1978

Umkhuleko wokucela isihawu

1Khumbula, Nkosi, okusehleleyo,

khangela ubone ihlazo lethu.

2Ilizwe lethu selinikwe abezizwe,

lemizi yethu yanikwa abemzini.

3Sesiyizintandane, kasilabo obaba,

labomama sebenjengabafel wakazi.

4Sihlawulela amanzi esiwanathayo,

lenkuni siyazithenga.

5Sifakwe ijogwe entanyeni sisetshenziswa kakhulu,

sidiniwe, kasivunyelwa ukuphumula.

6Sicela iGibithe, sicele iAsiriya,

ukuzuza ukudla.

7Obaba bafa, kabasekho,

thina sithwele izono zabo.

8Izigqili ziyasibusa,

kakho ongasikhulula kuzo.

9Sizuza ukudla kwethu ngokudela ukusila kwethu,

ngenxa yengozi zasenkangala.

10Isigogo sethu sitshisa njengomlilo,

ngokutshisa kwendlala.

11Badlova abesifazana eZiyone,

lezintombi emizini yakoJuda.

12Izikhulu ziphanyekwa ngezandla zazo,

labadala kabahlonitshwa.

13Amajaha asetshenziswa ngamandla ukuchola,

labafana basindwa yiminyaba yenkuni.

14Abadala sebatshiya inkundla,

lensizwa zayekela ukuhlabela.

15Ukuthokoza kwenhliziyo zethu kuphelile,

lokugida kwethu kuphenduke ukukhala.

16Umqhele uwile emakhanda ethu.

Maye thina, ngoba sonile!

17Ngenxa yalokhu inhliziyo zethu zidabukile,

langalezizinto amehlo ethu afiphele,

18ngoba intaba yaseZiyone isisele ize,

ihanjwa ngamakhanka.

19Kodwa wena, Nkosi, ubusa kuze kube nininini,

lesihlalo sakho sobukhosi simi njalo ezizukulwaneni zonke.

20Usikhohlweleni kokuphela na?

Usitshiyeleni isikhathi eside kangaka na?

21Sibuyise kuwe, Nkosi, sizabuya.

Yenza insuku zethu zibe zintsha njengasendulo.

22Ngoba uba usilahlile kokuphela,

kukhulu kakhulu ukusithukuthelela kwakho.