Hez 24 - Ndebele Bible (iBhayibhili Elingcwele) 1978

Umfanekiso wembiza ebilayo

1Ngomnyaka wesificamunwemunye, ngosuku lwetshumi enyangeni yetshumi, ilizwi leNkosi lafika kimi lathi:

2Ndoda, bhala ibizo lalolusuku, lona lolusuku kanye, ngoba inkosi yaseBabiloni isivimbezele iJerusalema ngalona lolusuku.2 Kho 25:1; Jer 52:4

3Utsho umfanekiso ebantwini abahlamukayo uthi: INkosi uNkulunkulu ithi:

Beka imbiza eziko, ibeke,

uthele lamanzi futhi,

4uqobele inyama kiyo,

wonke amaqatha amahle, ithebe lesiphanga,

uyigcwalise ngamathambo amahle.

5Thatha okuhle emhlanjini,

ukuthelele inkuni ngaphansi kwayo,

ukuze imbiza ibile iphuphume,

kuze kuvuthwe lamathambo.

6Ngakhoke iNkosi uNkulunkulu ithi:

Maye kuwo umuzi ogcwele igazi,

kuyo imbiza ethombileyo,

ukuthomba kwayo okungelakususwa!

Khupha kiyo iqatha ngeqatha, ungakhethi.

7Ngoba igazi umuzi olichithileyo lisekhona kuwo,

ulithululele phezu kwedwala,

kawulichithelanga phansi ukuligqibela ngomhlabathi.

8Ukuba kuvuswe ukuthukuthela kwami, ukuba kuphindisele,

ngichithele phezu kwedwala igazi olichithileyo

ukuze lingagqitshelwa.

9Ngakho iNkosi uNkulunkulu ithi:

Maye kuwo umuzi ogcwele igazi!

Lami ngizabasa umlilo omkhulu.

10Faka izigodo, uwuphembe umlilo,

uyipheke kuhle inyama,

uthulule umhluzi,

uyekele amathambo atshe.

11Ubusuyibeka phezu kwamalahle ingelalutho,

ukuba itshise,

kutshe ithusi layo,

kuncibilike ingcekeza yayo,

kuphele lokuthomba kwayo.

12Ngizidinise ngeze,

ukuthomba kwayo okunengi kakusasuki ngomlilo.

13Ukuthomba kwayo kungamanyala enu angcolileyo.

Ngoba bengithanda ukulihlambulula,

kodwa kalihlambulukanga ekungcoleni kwenu,

kalisayikuhlanjululwa ngize ngikholise ukuthukuthela kwami phezu kwenu.

14Mina Nkosi ngikhulumile. Kuzakwenzeka, ngizakukwenza. Kangiyikukuyekela, kangiyikuba lesihawu, kangiyikuphenduka. Ngizakukuthonisisa ngokufanele indlela zakho lezenzo zakho, kutsho iNkosi uNkulunkulu.

Ukufa komkaHezekeli

15Ilizwi leNkosi lafika futhi kimi lathi:

16Ndoda, sengizakususa othandekayo kuwe ngokuphangisa; kodwa ungalili, ungakhali, ungehlisi inyembezi.

17Bubula, ungakhali, ungalileli abafileyo. Thwala iqhiye lakho, ufake amanyathelo enyaweni zakho, ungagubuzeli umlomo wakho, ungadli ukudla kwabalilayo.

18Ngakho ngakhuluma labantu ekuseni, kusihlwa umkami wafa. Kwathi kusasa ngenza njengokulaywa kwami.

19Abantu bathi kimi: Kawuyikusitshela yini ukuba lezizinto zitshoni kithi ukuba wenze nje na?

20Ngasengisithi kibo: Ilizwi leNkosi lafika kimi,

21lathi: Tshono kuIsrayeli ukuthi iNkosi uNkulunkulu ithi: Ngizangcolisa indlu yami engcwele, eligugu lamandla enu, ethandekayo emehlweni enu, efiswa ngumoya wenu. Amadodana enu lamadodakazi enu eliwatshiyileyo azakubulawa yimpi.

22Lizakwenza njengami, kaliyikugubuzela imilomo yenu, lidle ukudla kwabakhalayo.

23Lizathwala amaqhiye enu, lifake amanyathelo enu enyaweni zenu, lingalili likhale, kodwa lizaphela amandla ezonweni zenu, libubule omunye komunye.

24Ngalokho uHezekeli uzakuba yisibonakaliso kini, lizakwenza njengokwenza kwakhe. Lapho sekufika lokhu, lizakwazi ukuba ngiyiNkosi uNkulunkulu.

25Ndoda, ngizakususa kibo ithempeli labo eliyinqaba yabo, eliyintokozo yabo lodumo lwabo, lelithandekayo emehlweni abo, lelifiswe zinhliziyo zabo, ngisuse amadodana abo lamadodakazi abo.

26Ngalolosuku kuzafika kuwe ophunyukileyo ukukubikela izindaba.

27Ngalolosuku umlomo wakho uzavuleka kophunyukileyo, ukhulume laye, ungabe usaba yisimungulu, ube yisibonakaliso ebantwini; bazakwazi ukuba ngiyiNkosi.