Jer 34 - Ndebele Bible (iBhayibhili Elingcwele) 1978

UJeremiya uxwayisa uZedekiya

1Ilizwi leNkosi elafika kuJeremiya, lapho uNebukadineza inkosi yaseBabiloni layo yonke impi yakhe, lemibuso yonke yomhlaba eyayibuswa nguye, labo bonke abantu bakhe, babesilwa leJerusalema layo yonke imizi yalo,2 Kho 25:1–11; 2 Lan 36:17–21

2lathi: INkosi, uNkulunkulu kaIsrayeli, ithi: Hamba uyekuthi kuZedekiya inkosi yakoJuda: INkosi ithi: Khangela, ngizanikela lumuzi esandleni senkosi yaseBabiloni, izakuwutshisa ngomlilo.

3Kawuyikuphunyuka esandleni sayo, kodwa uzabanjwa impela, unikelwe ezandleni zayo; uzabonana lenkosi yaseBabiloni, likhulumisane; futhi uzakuya eBabiloni.

4Zwana ilizwi leNkosi, wena Zedekiya, nkosi yakoJuda. INkosi ithi ngawe: Kawuyikufela empini.

5Kodwa uzakufa ngokuthula. Njengoba impepha yatshiselwa oyihlo, amakhosi ayephambi kwakho, ngokunjalo abantu bazakukutshisela lawe impepha, bakulilele lawe, bathi: Maye ngenkosi! Ngoba ngilitshilo lelolizwi, kutsho iNkosi.

6UJeremiya umprofethi wasewakhuluma wonke lamazwi kuZedekiya inkosi yakoJuda eJerusalema,

7lapho impi yenkosi yaseBabiloni ihlasela iJerusalema layo yonke imizi yakoJuda eyayisisele, iLakishi leAzeka: ngoba yiyo imizi ebiyelweyo eyakoJuda eyayisisele.

Mayelana lezigqili ezazingakhululwanga

8Ilizwi elafika kuJeremiya livela eNkosini, emva kokuba uZedekiya inkosi esenzile isivumelwano labo bonke abantu eJerusalema ukubamemezela ukukhululeka,

9ukuthi wonke umuntu akhulule izigqili zakhe ezingamaHeberu, ezesilisa lezesifazana, ukuba kungabi khona umuntu owenza umfowabo umHeberu abe yisigqili.

10Bonke balalela, izikhulu zonke labantu bonke abenze lesosivumelwano sokuthi wonke umuntu akhulule isigqili sakhe lesigqilikazi sakhe ukuba zihambe, zingaphindi zenziwe zibe yizigqili futhi; balalela, bazikhulula.

11Kodwa emva kwalokho baphenduka, bazibuyisa izigqili lezigqilikazi zabo ababezikhulule, babuya bazenza zaba yizigqili futhi.

12Ilizwi leNkosi lafika kuJeremiya lisithi:

13INkosi, uNkulunkulu kaIsrayeli, ithi: Mina ngenze isivumelwano lokhokho benu mhla ngabakhupha elizweni laseGibithe, endaweni yobugqili, ngathi:

14Ekupheleni kweminyaka eyisikhombisa lonke lizakhulula izihlobo zenu amaHeberu ezithengiswe kini, zalisebenzela iminyaka eyisithupha, lizikhulule ekulisebenzeleni kwazo. Kodwa okhokho benu kabangilalelanga, kabangizwanga.Eks 21:2; Dute 15:12

15Linake seliphendukile lamhla, lenza okulungileyo emehlweni ami, lamemezela ukukhululeka kubomakhelwana benu, lenza isivumelwano phambi kwami endlini lapho ibizo lami lidunyiselwa khona;

16kodwake seliphendukile futhi, lalingcolisa ibizo lami lapho ilowo lalowo wenu ebuyisa isigqili sakhe lesigqilikazi sakhe ebelizikhululile njengokufisa kwazo, lazibuyisa futhi, zaba yizigqili zenu.

17Ngakhoke kutsho iNkosi: Kalingilalelanga, kalimemezelanga inkululeko, kube yilowo lalowo kumhlobo wakhe lakumakhelwana wakhe; khangelani, sengizavumela impi lomkhuhlane lendlala ukuba kulehlele. Ngizalenza libe yinto eyesabekayo kuyo yonke imibuso yomhlaba.

18Abantu abaseqileyo isivumelwano sami, abangagcinanga amazwi esivumelwano ababesenze phambi kwami, ngizabenza babe njengethole lesivumelwano abalidabula kabili, badlula phakathi kwalo,

19ngitsho izikhulu zakoJuda lezikhulu zeJerusalema, abathenwa labapristi, labo bonke abantu belizwe abadabula phakathi kwenhlangothi zethole.

20Ngizabanikela ezendleni zezitha zabo lezandleni zalabo abafuna ukubabulala. Izidumbu zabo zizakuba yikudla kwenyoni zaphezulu lenyamazana zeganga.

21LoZedekiya inkosi yakoJuda lezikhulu zakhe ngizabanikela ezandleni zezitha zabo, lezandleni zalabo abafuna ukubabulala, lesandleni sempi yenkosi yaseBabiloni esisukile kini.

22Khangelani, ngizakulaya, kutsho iNkosi, ngibabuyise kulumuzi; bazakulwa lawo, bawuthumbe, bawutshise ngomlilo, ngichithe imizi yakoJuda ibe yinkangala engelamuntu.