Isa 49 - Ndebele Bible (iBhayibhili Elingcwele) 1978

Inceku yeNkosi

1Ngilalelani, lina mazwe angasolwandle,

lizwe, lani bantu abakhatshana.

INkosi ingibizile ngisesiswini,

yangikhetha ngisemzimbeni kamama.

2Yenza umlomo wami waba njengomkhonto obukhali,

yangifihla emthunzini wesandla sayo;

yangenza ngaba njengomtshoko ololiweyo,

yangifihla esambeni sayo semitshoko.

3Yathi kimi: Uyinceku yami,

wena Israyeli engizazuza udumo ngawe.

4Kodwa mina ngathi: Ngisebenzele ize,

amandla ami ngiwachithele ize;

kanti ilungelo lami liseNkosini,

lomvuzo wami ukuNkulunkulu wami.

5Ngingakazalwa iNkosi yangikhetha,

yangenza inceku yayo yokubuyisa uJakobe kuyo

lokubuthela kuyo uIsrayeli;

iNkosi inginika udumo,

ngizuza amandla kuyo.

6Ithi: Kuyinto elula kakhulu ukuba ube yinceku yami

yokuvusa izizwe zikaJakobe,

lokubuyisa abaseleyo koIsrayeli;

ngizakukubeka ube yikukhanya kwezizwe,

ukuze wenze ukukhulula kwami kufinyelele emhlabeni wonke.

7INkosi, uMhlengi kaIsrayeli loNgcwele wakhe,

ithi kodelelweyo oyisinengiso ezizweni loyinceku yezikhulu:

Amakhosi ezakukubona, asukume;

lezikhulu zikhothame phambi kwakho,

ngenxa yeNkosi ethembekileyo, oNgcwele kaIsrayeli, ekukhethileyo.

UIsrayeli uzakubuyiselwa elizweni lakhe

8INkosi ithi: Lapho sekuyisikhathi esihle, ngizakukuphendula,

ngosuku lokukhululwa ngizakukusiza;

ngizakukulondoloza ngikuvikele,

ngawe ngenze isivumelwano labantu bonke;

ngikubuyisele futhi elizweni lakho eseliyinkangala.

9Ngizakuthi kwababotshiweyo: Phumani;

lakwabasemnyameni: Phumelani obala.

Bazakuba njengezimvu ezidla ngasezindleleni,

lamadlelo abo abe semadundulwini wonke;

10kabayikulamba, bome,

kabayikutshaywa ngumoya otshisayo lelanga,

ngoba yena olesihawu kibo uzakubahola,

abase ngasemithonjeni yamanzi.

11Ngizakudiliza zonke intaba zibe yindlela,

lemigwaqo yami iphakame.

12Nampaya bayeza, bevela khatshana,

abanye bavela enyakatho labanye entshonalanga,

labanye elizweni laseSivene.

13Hlabelani ngokujabula, lina mazulu,

uthokoze, lawe mhlaba,

lihlokome ngokuhlabela, lani zintaba.

Ngoba iNkosi ibaduduzile abantu bayo,

izakuba lesihawu kwabahluphekileyo bayo.

14Kodwa iZiyone lathi: INkosi ingitshiyile,

iNkosi yami ingikhohliwe.

15Kambe owesifazana angamkhohlwa umntanakhe omunyayo,

angabi lasihawu kuyo indodana yesisu sakhe na?

Yebo, mhlawumbe angamkhohlwa;

kodwa mina ngingeke ngikukhohlwe wena.

16Khangela, ngikulobile ezandleni zami,

imithangala yakho ihlala iphambi kwami.

17Abakwakhayo bayeza ngokuphangisa,

abakuchithayo bayaphuma kuwe.

18Phakamisa amehlo akho inxa zonke ubone;

bonke bayabuthana, beze kuwe.

INkosi ithi: Ngiyazifunga,

uzakubagqiza bonke njengamangqongqo,

uzicecise ngabo njengomlobokazi.

19Ilizwe lakho lachithwa laba ngamanxiwa;

kodwa khathesi lizaminyana kakhulu

ngalabo abazehlala kulo.

Laba abakuchithayo bazaxotshwa kuwe babe khatshana.

20Abantwana abazelwe ngesikhathi sokuhlupheka kwakho

bazakuthi kuwe:

Siminyene kakhulu lapha;

sinike enye indawo yokuhlala!

21Ng’khona uzakuthi enhliziyweni yakho:

Ngubani ongizalele laba na?

Ngafelwa ngabantwana, ngasalaze,

ngathunjwa, ngavalelwa;

kodwa ngubani ongikhulisele laba na?

Ngangisele ngedwa;

pho, laba bavelaphi na?

22INkosi uNkulunkulu ithi:

Khangela, ngizaqhweba izizwe,

ngiphakamisele uphawu lwami ebantwini;

bazakuletha amadodana akho, bewagonile,

lamadodakazi akho bewetshete.

23Uzakhuliswa ngamakhosi,

lamakhosikazi awo abe ngabalizane bakho.

Bazakuwa phambi kwakho,

ubuso babo bube semhlabathini,

bakhothe uthuli lwezinyawo zakho.

Laphoke uzakwazi ukuthi ngiyiNkosi,

lokuthi labo abangithembayo kabayikuyangeka.

24Amaqhawe angamukwa impango yini,

labathunjiweyo bangophulwa kubacindezeli na?

25INkosi ithi: Yebo, iqhawe lingamukwa abathunjiweyo,

lempango ingophulwa kubacindezeli;

ngoba ngizakulwa lalabo abalwa lawe,

ngikhulule abantwana bakho.

26Ngizakwenza abacindezeli bakho badle eyabo inyama,

badakwe ngelabo igazi kungathi badakwe liwayini.

Ng’khona bonke abantu bazakwazi ukuthi mina ngiyiNkosi,

loMsilisi wakho, loMhlengi wakho,

uMninimandla kaJakobe.