1 Kho 21 - Ndebele Bible (iBhayibhili Elingcwele) 1978

UAhabi lesivini sikaNabothi

1UNabothi waseJezereli wayelesivini eJezereli phansi kwesigodlo sikaAhabi inkosi yaseSamariya.

2Ngolunye usuku uAhabi wathi kuye: Ngipha isivini sakho ukuba ngenze isivande sami semibhida, ngoba siseduze lendlu yami; mina ngizakukunika isivini esingcono kulaso, loba uba uthanda ngizakukunika imali.

3Kodwa uNabothi wathi kuAhabi: INkosi uNkulunkulu ingeke ikuvume ukuba ngikunike ilifa lakwethu.

4UAhabi wasengena endlini yakhe esezondile enyukumele ngenxa yamazwi kaNabothi waseJezereli, ngoba wayethe kuye: Ngingeze ngakunika ilifa lakwethu. Walala embhedeni wakhe, wakhangelisa ubuso bakhe emdulini, wala ukudla.

5UJezebeli umkakhe wafika kuye wathi: Usinameleni ukuba ungadli na?

6Yena wathi: Ngikhulume loNabothi waseJezereli ngathi kuye: Ngithengisela isivini sakho, loba uba uthanda ngizakukunika esinye; waphendula wathi: Kangiyikukunika isivini sami.

7UJezebeli wathi kuye: Kakusuwe yini obusa uIsrayeli na? Vuka udle, uthokoze; ngizakukunika mina isivini sikaNabothi waseJezereli.

8Waseloba izincwadi ngebizo likaAhabi, wazidinda ngesidindo sakhe, wazithumela kwabadala lakuzo izikhulu ezihlala loNabothi emzini wakibo.

9Waloba ezincwadini ukuthi: Yenzani izilo, linike uNabothi isihlalo esihloniphekayo ebantwini;

10beselihlalisa abantu ababili ababi maqondana laye ukuba bammangalele bathi: Wena uthuke uNkulunkulu kanye lenkosi. Beselimkhuphela phandle, limkhande ngamatshe aze afe.

11Abadala lezikhulu zomuzi wakibo kaNabothi ababehlala laye benza njengokutsho kukaJezebeli encwadini ayebathumele zona,

12benza izilo, banika uNabothi isihlalo esihloniphekayo phakathi kwabantu.

13Basebengena abantu ababili ababi, bahlala maqondana laye, bammangalela phambi kwabantu bathi: UNabothi uthuke uNkulunkulu kanye lenkosi. Basebemkhuphela ngaphandle komuzi, bamkhanda ngamatshe waze wafa.

14Basebethumela ilizwi kuJezebeli besithi: UNabothi usekhandwe ngamatshe waze wafa.

15Kwathi uJezebeli esezwile ukuba uNabothi usekhandwe ngamatshe wafa, wahle wathi kuAhabi: Vuka uyezithathela isivini sikaNabothi waseJezereli ala ukukuthengisa sona, ngoba uNabothi kasekho, usefile.

16UAhabi esezwile ukuba uNabothi usefile, wasuka waya esivinini sikaNabothi waseJezereli, wasithatha.

17Kwasekufika ilizwi leNkosi kuElija waseTishibi lathi:

18Hamba uye kuAhabi inkosi yakoIsrayeli, oseSamariya esivinini sikaNabothi, uyezithathela sona.

19Uzakuthi kuye: INkosi ithi: Ubulele umuntu futhi, wazithathela insimu yakhe. Uphinde uthi kuye: INkosi ithi: Endaweni lapho izinja zikhothe khona igazi likaNabothi zizakhotha igazi lakho.

20UAhabi wathi kuElija: Ungificile, wena sitha sami na? Yena wathi: Ngikuficile, ngoba uzinikele ukwenza okubi phambi kweNkosi.

21Khangela, ngizakukwehlisela okubi, ngikukhukhule, ngiqede koIsrayeli bonke abesilisa endlini yakho, abayizigqili labakhululekileyo.

22Ngizakwenza indlu yakho ifanane lekaJerobowamu indodana kaNebati lekaBahasha indodana kaAhija, ngoba ungithukuthelisile, wenza abakoIsrayeli bone.

23NgoJezebeli laye iNkosi ithi: Izinja zizamudla uJezebeli emimangweni yaseJezereli.2 Kho 9:36

24OwakoAhabi ofela phakathi komuzi uzadliwa yizinja, ofela egangeni adliwe ngamanqe.

25Kakubanga khona umuntu owazinikela ukwenza okubi phambi kweNkosi njengoAhabi owayekhwezelwa ngumkakhe uJezebeli.

26Wenza amanyala amabi ekukhonzeni kwakhe izithombe esenza konke okwenziwa ngamaAmori iNkosi eyawaxotsha phambi kwabakoIsrayeli,

27Kwathi uAhabi esizwa lamazwi wadabula izigqoko zakhe, wagqoka izambatho zokulila, wazila ukudla, walala ngezambatho zokulila, wahamba edanile.

28Ilizwi leNkosi lafika kuElija waseTishibi lathi:

29Ubonile yini ukuthi uAhabi uzithobe njani phambi kwami na? Ngoba ezithobile phambi kwami kangiyikwehlisa lobobubi ensukwini zakhe, kodwa ensukwini zomntanakhe.