Hubo 83 - Ndebele Bible (iBhayibhili Elingcwele) 1978

Umkhuleko wokuba zichithwe izitha zikaIsrayeli

1Nkulunkulu, ungathuli;

ungazithuleli uthi zwi, Nkulunkulu.

2Ngoba, khangela, izitha zakho ziyaxokozela,

labo abakuzondayo baphakamisile amakhanda abo.

3Benzela abantu bakho ubuqili obubi,

bacebisana ukuba balwe labavikelweyo bakho,

4besithi: Wozani, sibaqothule,

bangabe besaba yisizwe,

lebizo likaIsrayeli lingabe lisakhunjulwa.

5Benza amacebo nganhliziyonye,

besenza isivumelwano ngawe —

6abantu bakoEdoma labakoIshmayeli,

labakaMowabi, lamaHagari,

7lamaGebali, lamaAmoni, lamaAmaleki,

leFilistiya kanye labakhileyo eTire;

8leAsiriya lalo selihlanganise labo;

laba bayingalo elamandla yenzalo kaLoti.

9Yenza kubo njengokwenza kwakho kuMidiyani, lakuSisera,

lakuJabini ngasemfuleni iKishoni,

10ababhubhela eEndori,

baphenduka baba ngumquba womhlabathi.

11Yenza izikhulu zabo zibe njengoOrebi loZeba,

lawo wonke amakhosana abo abe njengoZeba loZalimuna,

12ababesithi: Kasizithathele amadlelo kaNkulunkulu.

13Nkulunkulu wami, benze babe njengezibi eziphephukayo,

njengomule ophetshulwa ngumoya,

14njengomlilo otshisa ihlathi,

njengelangabi elithungela intaba.

15Ngokunjalo baxotshe ngesivunguvungu sakho,

ubethuse ngesiphepho sakho.

16Thela ubuso babo ngehlazo,

ukuze balivume ibizo lakho, Nkosi.

17Kabahlakazeke, baphele kuze kube nininini,

badunyazwe babhubhe.

18Kabazi ukuthi nguwe wedwa oyiNkosi,

ongoPhezukonke emhlabeni wonke.