Nani 32 - Ndebele Bible (iBhayibhili Elingcwele) 1978

Ukuhlaliswa kwabakoRubeni labakoGadi labakoManase

1AbakoRubeni labakoGadi babelezinkomo ezinenginengi. Babona ukuthi amazwe aseJazeri lelizwe laseGileyadi ayezindawo zokwalusela.

2Ngakho abakoRubeni labakoGadi beza bakhuluma loMose loEleyazare umpristi lezikhulu zebandla,

3bathi: IAtarothi leDiboni leJazeri leNimra leHeshiboni leEleyale leSebamu leNebo leBeyoni,

4ilizwe iNkosi eyalinqoba phambi kwebandla lakoIsrayeli, liyilizwe lokwalusela; futhi thina zinceku zenu sifuyile.

5Uba sifumene umusa emehlweni enu, ilizwe leli kaliphiwe thina zinceku zenu libe ngelethu; lingasiwezi iJordani.

6Kodwa uMose wathi kubo abakoGadi labakoRubeni: Abakini bazakuphuma impi, lisale lapha lina na?

7Lizadaniselani inhliziyo zabakoIsrayeli ukuba bangaweli ukuya elizweni iNkosi ebanike lona na?

8Yikho lokho abakwenzayo oyihlo mhla ngibathuma besuka eKadeshi‐Barneya ukuyabona ilizwe.Nani 13:17–33

9Ngoba ekuhambeni kwabo ukuya esihotsheni saseEshikoli, babona ilizwe, basebedanisa inhliziyo zabakoIsrayeli ukuze bangangeni elizweni iNkosi eyayibanike lona.

10Ngalolusuku iNkosi yathukuthela, yafunga yathi:Nani 14:26–35

11Impela kulabo abaphuma eGibithe abaleminyaka engamatshumi amabili lengaphezulu kakuyikuba loyedwa ozakubona ilizwe engafunga ukulinika uAbrahama loIsaka loJakobe, ngoba kabangilandelanga ngokupheleleyo;

12kakuyikuba loyedwa ngaphandle kukaKalebi indodana kaJefune umKenizi, loJoshuwa indodana kaNuni, ngoba balandele iNkosi ngokupheleleyo.

13Intukuthelo yeNkosi yabavuthela abakoIsrayeli, yabazulisa enkangala iminyaka engamatshumi amane, kwaze kwaphela lesosizukulwana sonke esasenzile okubi emehlweni eNkosi.

14Khangelani, selilingisa oyihlo, ngoba liyinzalo yabantu abonayo, liyavusa futhi intukuthelo yeNkosi evuthela uIsrayeli.

15Ngoba uba lisala ukuyilandela, izakuphinda ibatshiye enkangala; lizabalethela ukubhujiswa bonke lababantu.

16Basebesondela kuye bathi: Sizakwakhela lapha izimvu zethu izibaya labantwana bethu imizi;

17kodwa thina sizakuhloma ukuba sihole abakoIsrayeli, size sibafikise endaweni yabo, abantwana bethu bangahlala emizini ebiyelweyo bevikelekile ebantwini belizwe.

18Kasiyikubuyela emizini yethu, omunye lomunye wabakoIsrayeli engakazuzi ilizwe libe yilifa lakhe.

19Ngoba kasiyikwamukela kubo ilizwe ngaphetsheya kweJordani langaphambili, ngoba sesiphiwe elethu nganeno kweJordani ngasempumalanga.

20UMose wasesithi kubo: Uba lisenza njengokutsho kwenu lihlome, liphume impi lilwe phambi kweNkosi,

21beselichapha iJordani lina lonke elihlomileyo phambi kweNkosi lihlale khona, ize ixotshe zonke izitha zayo phambi kwayo,

22lelizwe linqotshwe phambi kwayo, ng’khona emva kwalokho lizakubuya, lingabi lamlandu eNkosini lakuIsrayeli; lelilizwe lizakuba yilifa lenu phambi kweNkosi.

23Kodwake uba lingenzi njalo, lizabe lonile eNkosini; yazini ukuthi isono senu sizakuba phezu kwenu.

24Yakhelani abantwana benu imizi lezimvu zenu izibaya, kodwa yenzani lokho elikuthembisileyo.

25AbakoGadi labakoRubeni bathi kuMose: Thina zinceku zakho sizakwenza njengokutsho kwakho.

26Abantwana bethu, labomkenu, lezimvu zethu, lazo zonke inkomo zethu kuzakusala emizini yaseGileyadi;

27kodwa thina zinceku zakho sizakuchapha phambi kweNkosi, thina sonke sizahloma silwe, njengokulaya kwakho.

28UMose waselayezela ngabo uEleyazare umpristi, loJoshuwa indodana kaNuni, lezinhloko zezindlu zezizwe zabakoIsrayeli.Josh 1:12–15

29UMose wathi kubo: Uba abakoGadi labakoRubeni, bonke abahlomileyo phambi kweNkosi, bechapha lani iJordani, lelizwe linqotshwe yini, lizakubanika ilizwe laseGileyadi libe ngelabo.

30Kodwa uba bengahlomi bachaphe lami, bazakunikwa ilizwe phakathi kwenu elizweni laseKanani.

31AbakoGadi labakoRubeni baphendula bathi: Njengalokhu iNkosi itshilo kithi izinceku zakho, sizakwenza njalo;

32sizahloma sichaphe phambi kweNkosi, singene elizweni laseKanani; sizakuba lelizwe lethu ngapha ngaphetsheya kweJordani.

33UMose wasenika abakoGadi labakoRubeni lengxenye yesizwe sakoManase, indodana kaJosefa, umbuso kaSihoni inkosi yamaAmori, lombuso kaOgi inkosi yaseBashani, lelizwe lonke kanye lemizi ephakathi kwalo inxa zonke.

34AbakoGadi bakha iDiboni leAtarothi leAroweri

35leAtirothi‐Shofani leJazeri leJogibeha,

36leBeti‐Nimra leBeti‐Harani, imizi ebiyelweyo, lezibaya zezimvu.

37AbakoRubeni bakha iHeshiboni leElayale leKiriyathayimi

38leNebo leBali‐Meyoni — sekuphendulwe amabizo ayo — leSibima; bayibiza imizi abayakhayo ngamanye amabizo.

39Amadodana kaMakiri indodana kaManase, ahlasela iGileyadi, alinqoba, achitha amaAmori ayekulo.

40UMose wanika uMakiri indodana kaManase iGileyadi, wakha kilo.

41UJayiri indodana kaManase wayahlasela imizi elitshumi, wayithumba, wayibiza ngokuthi yiHavothi‐Jayiri.

42UNoba wayahlasela iKenathi, walithumba lemizana yalo, walibiza ngokuthi yiNoba ngebizo lakhe.