uEsta 9 - Ndebele Bible (iBhayibhili Elingcwele) 1978

AbaJuda babulala izitha zabo

1Ngosuku lwetshumi lantathu lwenyanga yetshumi lambili ethiwa nguAdari safika isikhathi sokuba umlayo lomthetho wenkosi kwenziwe. Lolosuku izitha zabaJuda ezazithemba ukubanqoba ngalo kwaba yilo usuku abaJuda abanqoba ngalo labo ababebazonda.

2Ngalolosuku abaJuda bahlangana emizini yabo kuwo wonke amazwe enkosi uAhasuweru ukuba babulale labo ababebenzele icebo lokubachitha; kwakungekho loyedwa owayengamelana labo, ngoba bonke abantu babesaba.

3Zonke izikhulu zamazwe lezikhulu lababusi lezinceku zenkosi basiza abaJuda, ngoba babemesaba uMoridekayi.

4UMoridekayi wayesengumuntu omkhulu esigodlweni, lodumo lwakhe lwaselugcwele wonke amazwe ngokukhula kwamandla akhe.

5Ngakho abaJuda bazibulala izitha zabo zonke ngomhedla, bazibhubhisa baziqeda, bazenzela ngokuthanda kulabo ababebazonda.

6ESusa umuzi omkhulu abaJuda babulala baqeda abantu abangamakhulu amahlanu,

7babulala loParishani‐Datha loDalifoni loAsiphatha

8loPoratha loAdaliya loAridatha

9loParimashita loArisayi loAridayi loVayizatha,

10amadodana alitshumi kaHamani indodana kaMamedatha, isitha sabaJuda; kodwa kabayithathanga impango.

11Ngalona lolosuku inani lababulawayo eSusa umuzi omkhulu labikwa enkosini.

12Yathi kuEsta: ESusa umuzi omkhulu abaJuda sebebulele baqeda abantu abangamakhulu amahlanu lamadodana alitshumi kaHamani. Sebenzeni kwamanye amazwe enkosi na? Ngoba loba kuyini okunye okucelayo uzakukunikwa. Loba kuyini okunye okufunayo kuzakwenziwa.

13UEsta wasephendula esithi: Uba kuyithokozisa inkosi lakusasa abaJuda abaseSusa kabavunyelwe ukwenza lokho okuvunywa ngumthetho lamhla; izidumbu zamadodana alitshumi kaHamani kazilengiswe ogodweni.

14Inkosi yasikhupha ilizwi lokuthi lokhu kakwenziwe; kwasekukhutshwa umthetho eSusa, izidumbu zamadodana alitshumi kaHamani zalengiswa ogodweni.

15AbaJuda baseSusa bahlangana futhi ngosuku lwetshumi lane lwenyanga ethiwa nguAdari, babulala abantu abangamakhulu amathathu eSusa; kodwa kabathathanga impango.

Umkhosi wePurimi

16Abanye abaJuda basemazweni enkosi babehlangene ukuba bazivikele, bakhululwa ezitheni zabo, babulala abazinkulungwane ezingamatshumi ayisikhombisa lanhlanu kulabo ababazondayo; kodwa kabathathanga impango.

17Lolo lwalulusuku lwetshumi lantathu lwenyanga ethiwa nguAdari; ngosuku lwetshumi lane baphumula, balwenza lwaba lusuku lwedili lokuthokoza.

18Kodwa abaJuda baseSusa bahlangana ngosuku lwetshumi lantathu langosuku lwetshumi lane lwenyanga, baphumula ngosuku lwetshumi lanhlanu, balwenza lwaba lusuku lwedili lokuthokoza.

19Yilokhu okwenza ukuba abaJuda abahlala emizini engabiyelwanga bagcine usuku lwetshumi lane lwenyanga ethiwa nguAdari, benze idili lokuthokoza, lube lusuku lokuphumula, banikane izipho zokudla.

20UMoridekayi waseziloba lezizinto, wathumela izincwadi kubo bonke abaJuda ababekiwo wonke amazwe enkosi uAhasuweru, abaseduze labakhatshana,

21ebalayisisa ukuba bagcine usuku lwetshumi lane losuku lwetshumi lanhlanu lwenyanga ethiwa nguAdari iminyaka ngeminyaka,

22ngoba ngalezonsuku abaJuda bazuza ukukhululwa ezitheni zabo, langaleyonyanga usizi lwabo lwaphendulwa lwaba yikuthokoza, lezikhathi zokulila zaba yizikhathi zokuphumula; bazigcine zibe zinsuku zedili lokuthokoza, lensuku zokuphana izipho zokudla, lezokupha abayanga.

23AbaJuda bakuvuma ukwenza lokho abasebekuqalile njengokutsho kwencwadi kaMoridekayi.

24Bakwenza lokho ngoba uHamani indodana kaHamedatha waseAgagi, isitha sabo bonke abaJuda, wayenze icebo lokubhubhisa abaJuda, wenza inkatho ethiwa yiPurimi eqonde ukubachoboza ababhubhise.Esta 3:7

25Kodwa kwathi lapho lindaba ifika enkosini, yaloba umthetho ukuba icebo elibi likaHamani ayelenzele abaJuda lehlele phezu kwakhe; yena lamadodana akhe balengiswa ogodweni.

26Ngalokhoke lezinsuku zabizwa ngokuthi iPurimi ngebizo lenkatho ethiwa yiPurimi. Ngakhoke ngenxa yakho konke lokho okwakulotshiwe kulincwadi, langenxa yakho konke ababekubonile lalokho okwakubehlele ngalindaba,

27abaJuda bazimisela ukuba bona labantwana babo labo bonke abazihlanganisa labo kabayikuyekela ukugcina lezinsuku ezimbili, zibe ngumkhosi weminyaka ngeminyaka ngendlela emisiweyo langesikhathi esimisiweyo,

28lokuba lezinsuku zizakhunjulwa zigcinwe izizukulwana ngezizukulwana kuzo zonke izindlu lakuwo wonke amazwe lakuyo yonke imizi, lokuba lezinsuku zePurimi zingakhohlakali kibo bonke abaJuda, lokukhunjulwa kwazo kungapheli ebantwaneni babo.

29Inkosikazi uEsta, indodakazi kaAbihayili, yamnika amandla wonke uMoridekayi umJuda ngokugwala lincwadi ukuba aqinise incwadi yayo yesibili mayelana lePurimi.

30Incwadi ezifisela abaJuda ukuthula lenhlalo enhle zathunyelwa kubo bonke abaJuda emazweni enkosi uAhasuweru alikhulu lamatshumi ayisikhombisa,

31ukuba lezinsuku zePurimi zigcinwe ngezikhathi zazo ezimisiweyo njengokumisa kukaMoridekayi umJuda; ngendlela efananayo bazimisela bona labantwana babo imithetho yokuzila leyokulila.

32Umlayo kaEsta waqinisa limithetho mayelana lePurimi, walotshwa encwadini.