Mat 26 - Ndebele Bible (iBhayibhili Elingcwele) 1978

Icebo lokumbulala uJesu(Mark 14:1, 2; Luka 22:1, 2)

1Kwathi uJesu eseqedile wonke lamazwi, wathi kubafundi bakhe:

2Liyazi ukuthi emva kwensuku ezimbili kuzakuba liPhasika; iNdodana yomuntu izakunikelwa ukuba ibethelwe.

3Kwasekubuthana abapristi abakhulu labadala besizwe egumeni lompristi omkhulu othiwa nguKayafasi.

4Bacebisana ukuba bambambe uJesu ngobuqili, bambulale.

5Kodwa bathi: Kakungabi ngesikhathi somkhosi, funa kube khona isiphithiphithi ebantwini.

UJesu ugcotshwa eBethani(Mark 14:3–9; Joha 12:1–8)

6Kwathi uJesu eseBethani endlini kaSimoni owayelobulephero,

7kwafika kuye owesifazana ephethe umfuma wamagcobo abiza imali enengi, wawathela ekhanda lakhe ehlezi ekudleni.Luka 7:37, 38

8Kodwa abafundi bebona lokhu bathukuthela, bathi: Achithelwani lamagcobo na?

9Ngoba ngabe athengisiwe ngemali enengi, kwanikwa abayanga.

10Kodwa uJesu ekwazi lokhu wathi kibo: Limhluphelani owesifazana na? Ngoba wenzile umsebenzi omuhle kimi;

11ngoba abayanga lihlala lilabo, kodwa mina kalihlali lilami.Dute 15:11

12Ngoba ngokuthela amagcobo emzimbeni wami, wenzela ukungilungisela ukumbelwa.

13Ngiqinisile ngithi kini: Loba ngaphi emhlabeni wonke lapho okuzatshunyayelwa khona ivangeli, lokho akwenzileyo kuzakukhulunywa ngakho, kube yisikhumbuzo ngaye.

Umvuzo wokumnikela uJesu(Mark 14:10, 11; Luka 22:3–6)

14Omunye wabalitshumi lambili othiwa nguJudasi Iskariyothi waya kubapristi abakhulu,

15wathi: Lizakunginikani aluba ngimnikela kini na? Basebemnika inhlamvu zesiliva ezingamatshumi amathathu.

16Kusukela ngalesosikhathi wafuna ithuba lokumnikela.

Ukumiswa kwesidlo esingcwele(Mark 14:12–26; Luka 22:7–23; Joha 13:21–30; 1 Kor 11:23–25)

17Ngosuku lokuqala lomkhosi wesinkwa esingelamvubelo abafundi beza kuJesu bathi: Uthanda ukuba sikulungisele ngaphi ukuba udle iPhasika na?

18Wathi: Hambani liye emzini kumuntu othile, lithi kuye: UMfundisi uthi: Isikhathi sami sesiseduze; ngizakwenza iPhasika kwakho kanye labafundi bami.

19Benzake abafundi njengokuba uJesu ebalayile; balungisa iPhasika.

20Kwathi sekuhlwile, wayehlezi ekudleni labafundi abalitshumi lambili.

21Besadla, wathi: Ngiqinisile ngithi kini: Omunye wenu uzakunginikela.

22Badabuka kakhulu, bathi kuye ngamunye: Kungaba yimi, Nkosi na?

23Waphendula wathi: Otshebe kanye lami emganwini nguye ozakunginikela.Hubo 41:9

24INdodana yomuntu ihamba njengokulotshiweyo ngayo, kodwa maye kulowomuntu enikelwa nguye iNdodana yomuntu! Bekungangcono aluba wayengazalwanga lowomuntu.

25Wasephendula uJudasi owamnikelayo, wathi: Impela kungebe yimi, Mfundisi? Wathi kuye: Kutsho wena.

26Besadla uJesu wathatha isinkwa, wabonga, wasihlephula, wabanika abafundi bakhe wathi: Thathani lidle; lokhu kungumzimba wami.

27Wathatha inkezo, wabonga, wabanika, wathi: Nathani lonke kuyo;

28ngoba lokhu kuligazi lami lesivumelwano elichithelwa abanengi ukuthethelelwa kwezono.Eks 24:8; Jer 31:31–34

29Ngithi kini: Kusukela khathesi kangiyikunatha lesisithelo sevini kuze kufike lolosuku lapho ngizakusinatha lani sisitsha embusweni kaBaba.

30Kwathi sebehlabele ingoma baphuma baya entabeni ethiwa iOliveti.

Ukuxwayiswa kukaPetro(Mark 14:27–31; Luka 22:31–34; Joha 13:36–38)

31UJesu wasesithi kibo: Lina lonke lizakukhubeka ngami ngalobubusuku, ngoba kulotshiwe ukuthi: Ngizakutshaya umalusi, izimvu zomhlambi zichitheke.Zek 13:7

32Kodwa ngemva kokuvuswa kwami ngizakulandulela ukuya eGalili.Mat 28:16

33UPetro wathi kuye: Lanxa bezakhubeka bonke ngawe, mina angisoze ngikhubeke.

34UJesu wathi kuye: Ngiqinisile ngithi kuwe: Ngalobubusuku, lingakakhali iqhude, wena uzakungilandula kathathu.

35UPetro wathi kuye: Loba ngingaze ngife lawe, kangiyikukulandula. Batsho njalo bonke abafundi.

EGetsemane(Mark 14:32–42; Luka 22:39–46)

36UJesu wasefika labo endaweni ethiwa yiGetsemane; wathi kubafundi: Hlalani lapha, ngisayakhuleka laphaya.

37Wathatha uPetro lamadodana amabili kaZebediya, waqala ukudabuka lokukhathazeka kakhulu.

38Wasesithi kibo: Umoya wami udabukile kakhulu kungathi ngingaze ngife; hlalani lapha, lilinde lami.

39Waqhubeka ingcosana, wawa phansi ngobuso bakhe, wakhuleka wathi: Baba, uba kungenzeka, kakudlule kimi linkezo; kodwa kungabi njengokuba ngithanda mina, kodwa njengokuba uthanda wena.

40Weza kubafundi, wabafumana belele; wathi kuPetro: Kanti belingelinde lami iawa ibenye na?

41Lindani, likhuleke ukuze lingangeni ekulingweni; umoya uyavuma, kodwa inyama ibuthakathaka.

42Wabuya wasuka ngokwesibili, wakhuleka wathi: Baba, uba inkezo le ingedlule kimi ngingayinathanga, kayenziwe intando yakho.

43Wabuya futhi, wabafumana belele, ngoba amehlo abo ayenzima.

44Wabuya wabatshiya, wahamba, wakhuleka ngokwesithathu esitsho wona lawomazwi.

45Weza kubafundi, wathi kibo: Lisalele liphumula na? Khangelani, isikhathi sesisondele, iNdodana yomuntu iyanikelwa ezandleni zezoni.

46Sukumani sihambe. Khangelani, onginikelayo useseduze.

Ukubotshwa kukaJesu lokuthethwa kwecala lakhe(Mark 14:43–50; Luka 22:47–53; Joha 18:1–11)

47Kwathi esakhuluma, kwafika uJudasi, omunye wabalitshumi lambili, elexuku elikhulu liphethe imihedla lezinduku, livela kubapristi abakhulu labadala besizwe.

48Omnikelayo wayebanike isiboniso sokuthi: Lowo engizakumanga, nguye, limbambe.

49Wasondela kuJesu masinyane wathi: Okuhle, Mfundisi! Wamanga.

50UJesu wathi kuye: Mngane, yenza lokho oze ukukwenza. Basebesondela, bamdumela uJesu, bambamba.

51Khangela, omunye walabo ababeloJesu welula isandla, wakhokha umhedla wakhe, wageca inceku yompristi omkhulu, wayiquma indlebe.

52UJesu wasesithi kuye: Buyisela umhedla wakho endaweni yawo, ngoba bonke abaphatha umhedla bazakubhubha ngomhedla.

53Kambe uthi ngingencenge uBaba ukuba angithumele masinyane izimpi zezithunywa ezidlula itshumi lambili na?

54Pho, ingagcwaliseka kanjani imibhalo ethi kumele ukuba kube njalo na?

55Ngalesosikhathi uJesu wathi emaxukwini: Liphume lemihedla lezinduku ukuzangibamba kungathi ngingumphangi na? Bengihlezi insuku ngensuku ethempelini ngifundisa, kodwa kalingibambanga.Luka 19:47; 21:37

56Kodwa konke lokhu kwenzakele ukuba kugcwaliseke imibhalo yabaprofethi. Basebemtshiya bonke abafundi, babaleka.

UJesu uphambi kompristi omkhulu(Mark 14:53–65; Luka 22:54, 55, 63–71; Joha 18:12–14, 19–24)

57Ababembambile uJesu bamqhuba bamusa kuKayafasi umpristi omkhulu lapho babebuthene khona ababhali labadala.

58Kodwa uPetro wamlandela ekhatshana, kwaze kwaba segumeni lompristi omkhulu; wangena phakathi, wahlala phansi lezinceku ukuba abone isicino.

59Abapristi abakhulu lomphakathi wonke bafuna ubufakazi bamanga ngoJesu ukuze bambulale;

60kodwa kababufumananga, lanxa kwavela ofakazi abanengi bamanga. Emva kwalokho kwavela ababili,

61bathi: Lumuntu wathi: Ngilamandla okudiliza ithempeli likaNkulunkulu, ngibuye ngilakhe ngensuku ezintathu.Joha 2:19

62Kwasekusukuma umpristi omkhulu, wathi: Kawuphenduli lutho na? Kuyini lokhu abakufakaza ngawe laba na?

63Kodwa uJesu wathula. Umpristi omkhulu wathi kuye: Ngikufungisa uNkulunkulu ophilayo ukuba usitshele uba unguKristu, iNdodana kaNkulunkulu.

64UJesu wathi kuye: Kutsho wena. Kodwa ngithi kini: Kusukela khathesi lizakubona iNdodana yomuntu ihlezi ngakwesokunene saMandla, isiza ngamayezi aphezulu.Dan 7:13

65Umpristi omkhulu wasedabula ingubo zakhe, wathi: Usehlambazile. Sisafunelani ofakazi na? Khangelani, seliyizwile inhlamba.Levi 24:16

66Lithini na? Baphendula bathi: Ufanele ukufa.

67Basebemkhafulela ngamathe ebusweni, bamdutshuza, labanye bammakala,Isa 50:6

68bathi: Sitshele Kristu! Ngubani okutshayileyo na?

UPetro ulandula uJesu(Mark 14:66–72; Luka 22:56–62; Joha 18:15–18, 25–27)

69UPetro wayehlezi ngaphandle egumeni; kweza kuye intombazana, yathi: Lawe ubuloJesu waseGalili.

70Kodwa walandula phambi kwabo bonke, wathi: Kangikwazi lokho okutshoyo.

71Kwathi esephumele esangweni, enye intombazana yambona, yathi kwababemi khona: Lumuntu ubeloJesu waseNazaretha.

72Wabuya walandula wafunga esithi: Kangimazi lumuntu.

73Emva kwesikhatshana labo ababemi khona basondela, bathi kuPetro: Impela ungomunye wabo, ngoba ukukhuluma kwakho kuyakuceba.

74Waseqala ukuthuka lokufunga, wathi: Kangimazi lumuntu. Lahle lakhala iqhude.

75UPetro wasekhumbula ilizwi likaJesu lokuthi: Lingakakhali iqhude, uzakungilandula kathathu. Waphumela ngaphandle, wakhala ngokudabuka okukhulu.