Levi 7 - Ndebele Bible (iBhayibhili Elingcwele) 1978

1Nanku umlayo womnikelo wecala. Ungcwele kakhulu.

2Umnikelo wecala uzakuhlatshelwa endaweni lapho kuhlatshelwa khona umnikelo wokutshiswa, legazi lawo likhatshazelwe ealtareni inxa zonke.

3Wonke amahwahwa awo azanikelwa, umsila ononileyo, ledanga lemibilini,

4izinso zombili lamahwahwa azo angasezinkalweni, lamahwahwa angaphezu kwesibindi azakususwa lezinso;

5umpristi akutshise ealtareni kube ngumnikelo owenzelwe iNkosi ngomlilo; kungumnikelo wecala.

6Bonke abapristi besilisa bangawudla; kawudlelwe endaweni engcwele, ungcwele kakhulu.

7Umnikelo wecala ufanana lomnikelo wesono; umlayo wayo munye, ungowompristi owenza indlela yokubuyisana ngawo.

8Umpristi onikela umnikelo wokutshiswa womuntu uzakuzithathela isikhumba somnikelo wokutshiswa anikele ngawo.

9Yonke iminikelo yempuphu ephekwe eziko, layo yonke elungiswa embizeni loba emganwini wensimbi, izakuba ngeyompristi anikele ngayo.

10Layo yonke iminikelo yempuphu evutshwe ngamafutha laleyo eyomileyo izakuba ngeyamadodana wonke kaAroni, enye indodana izuze njengenye.

11Nanku umlayo womhlatshelo weminikelo yokuthula umuntu angayinikela eNkosini.

12Uba ewunikela ube ngumnikelo wokubonga, kanikele kanye lomnikelo wokubonga amaqebelengwana angelamvubelo ahlanganiswe lamafutha, lezinkwa ezincinyane ezingelamvubelo ezigcotshwe ngamafutha, lamaqebelengwana empuphu ecolekileyo ixubene lamafutha.

13Umnikelo lo kanye lamaqebelengwana esinkwa esilemvubelo uzakukunikela lomhlatshelo weminikelo yokuthula.

14Athathe kulowo lalowo umnikelo iqebelengwana libe linye, alinikele eNkosini; lizakuba ngelompristi okhaphaza igazi leminikelo yokuthula.

15Inyama yomhlatshelo weminikelo yakhe yokuthula ongowokubonga izakudliwa ngosuku lokunikela kwakhe, angatshiyi lutho kuze kube sekuseni.

16Uba umhlatshelo womnikelo wakhe ungumnikelo wokugcwalisa isithembiso loba umnikelo wesihle, uzakudliwa ngosuku anikela ngalo ngomhlatshelo wakhe, okuseleyo kuwo kudliwe kusisa;

17kodwa okuseleyo enyameni yomhlatshelo ngosuku lwesithathu kuzatshiswa ngomlilo.

18Uba inyama yomhlatshelo weminikelo yakhe yokuthula idliwa ngosuku lwesithathu, kayiyikwamukeleka, kayiyikubalelwa kuye; izakuba yisinengiso, lomuntu oyidlayo uzakuthwala ububi bakhe.

19Inyama ethinta into engcolileyo kayiyikudliwa, kodwa izakutshiswa ngomlilo. Bonke abahlambulukileyo bangadla inyama,

20kodwa umuntu odla inyama yomhlatshelo weminikelo yokuthula eyeNkosi esengcolile, uzakukhutshwa ebantwini bakibo.

21Uba umuntu ethinta into engcolileyo, loba umuntu ongcolileyo, loba inyamazana engcolileyo, ingabe into engcolileyo eyisinengiso, abesesidla inyama yomhlatshelo weminikelo yokuthula eyeNkosi, lowo uzakukhutshwa ebantwini bakibo.

22INkosi yathi kuMose:

23Tshono ebantwini bakoIsrayeli uthi: Lingadli amahwahwa enkomo lawemvu lawembuzi.

24Amahwahwa enyamazana ezifeleyo, lamahwahwa aleyo edatshulwe yizilo angasetshenziswa, kodwa lingawadli lakanye.

25Ngoba wonke umuntu odla amahwahwa enyamazana esetshenziselwa ukuba umnikelo wokutshiswa owenzelwe iNkosi, lowomuntu uzakhutshwa ebantwini bakibo.

26Futhi lingadli igazi emizini yenu, loba elenyoni loba elenyamazana.Gen 9:4; Levi 17:10–14; 19:26; Dute 12:16, 23; 15:23

27Odlayo igazi uzakukhutshwa ebantwini bakibo.

28INkosi yathi kuMose:

29Tshono ebantwini bakoIsrayeli uthi: Lowomuntu onikela umhlatshelo weminikelo yakhe yokuthula eNkosini kalethe ingxenye yomhlatshelo wakhe, ibe ngumnikelo wakhe eNkosini.

30Kalethe ngezakhe izandla iminikelo eyenzelwe iNkosi ngomlilo, alethe amahwahwa kanye lesifuba, ukuze isifuba sizunguzwe, sibe ngumnikelo wokuzunguzwa phambi kweNkosi.

31Umpristi katshise amahwahwa ealtareni, kodwa isifuba sibe ngesikaAroni lesamadodana akhe.

32Nikani umpristi umlenze wokunene ube ngumnikelo ovela emhlatshelweni weminikelo yenu yokuthula.

33Leyondodana kaAroni enikela ngegazi leminikelo yokuthula lamahwahwa izakuzuza umlenze wokunene ube yisabelo sayo.

34Ngoba isifuba esizunguzwayo lomlenze onikelwayo ngikuthethe ebantwini bakoIsrayeli, emihlatshelweni yeminikelo yabo yokuthula, ngakunika uAroni umpristi lamadodana akhe; lokhu kuyisimiso esingelakuphela kubantu bakoIsrayeli ezizukulwaneni zabo.

35Lokho kuyisabelo sikaAroni lesamadodana akhe esivela eminikelweni eyenzelwe iNkosi ngomlilo ebahlukaniselwe mhla belethwa eNkosini ukuba babe ngabapristi bayo.

36INkosi yalaya ukuba abakoIsrayeli babanike lokhu ngosuku lokugcotshwa kwabo. Kuyisimiso esingelakuphela ezizukulwaneni zabo zonke.

37Lowo ngumlayo weminikelo yokutshiswa, loweminikelo yempuphu, loweminikelo yesono, loweminikelo yecala, lowokwahlukaniselwa, lowomhlatshelo weminikelo yokuthula,

38iNkosi eyamlaya ngawo uMose entabeni yaseSinayi, ngosuku elaya ngalo abantu bakoIsrayeli ukuba balethe iminikelo yabo eNkosini enkangala yaseSinayi.