Jak 1 - Ndebele Bible (iBhayibhili Elingcwele) 1978

Isibingelelo

1Mina Jakobe, inceku kaNkulunkulu leyeNkosi uJesu Kristu, ngiyabingelela kuzo izizwe ezilitshumi lambili ezihlakazekileyo.Ukulaya ngezilingo

2Bazalwane bami, nxa lisehlelwa yizilingo ngezilingo, kalibokuthi kuyikuthokoza kodwa,

3ngoba liyazi ukuthi ukuhlolwa kokukholwa kwenu kuveza ukubekezela;

4ukubekezela kakube lomsebenzi opheleleyo, ukuze libe ngabapheleleyo, lingasweli lutho.

5Uba kukhona kini oswele ukuhlakanipha, kacele kuNkulunkulu ophanayo kibo bonke abantu angabasoli, uzakukunikwa.

6Kodwa kacele ngokukholwa engathandabuzi ngalutho; ngoba othandabuzayo unjengevinqo lolwandle eliqhutshwa, lizuliswe ngumoya.

7Umuntu onjalo kangatsho ukuthi uzakuzuza ulutho eNkosini;

8yena unhliziyombili, uyaphenduphenduka endleleni zakhe zonke.

9Umzalwane ongumyanga kazincome ngokuphakanyiswa kwakhe,

10lonothileyo azincome ngokuthotshiswa kwakhe, ngoba njengamaluba otshani uzakudlula.Isa 40:6, 7

11Ngoba ilanga liphuma litshisa, libunise utshani, amaluba abo awohloke, lobuhle babo bunyamalale; ngokunjalo isinothi sizakudlula emisebenzini yaso.

12Ubusisiwe umuntu obekezelayo ekulingweni; ngoba lapho esehloliwe uzakwamukeliswa umqhele wokuphila othenjiswe nguNkulunkulu kwabamthandayo.

13Umuntu olingwayo kangatsho ukuthi: Ngiyalingwa nguNkulunkulu. Ngoba uNkulunkulu angelingwe ngokubi, laye uqobo kalingi muntu.

14Kodwa ilowo lalowo uyalingwa lapho eyengwa ngezakhe izinkanuko, ehugwa;

15kuthi lapho inkanuko isiyomule, ibelethe isono; lesono lapho sesikhulile, sizala ukufa.

16Lingakhohliswa, bazalwane bami abathandekayo.

17Iziphiwo zonke ezinhle leziphiwo zonke ezipheleleyo zivela phezulu, zehla kuYise wezinkanyezi okungekho kuye ukuphenduka njengemithunzi ephendukayo.

18Ngokuthanda kwakhe wasizala ngelizwi leqiniso, ukuba sibe ngamazibulo ezidalwa zakhe.

Ukulaya ngokukholwa okulezenzo

19Yazini lokhu, bazalwane bami abathandekayo. Kakube yilowo lalowo aphangise ukuzwa, aphuze ukukhuluma, aphuze ukuthukuthela,

20ngoba ukuthukuthela komuntu kakwenzi ukulunga kukaNkulunkulu.

21Ngakhoke lahlani amanyala wonke lokwanda kakhulu kokubi, lamukele ngomoya wobumnene ilizwi elihlanyelweyo, elilamandla okusilisa imiphefumulo yenu.

22Wobani ngabenzi belizwi, lingabi ngabalizwayo kuphela, lizikhohlisa.

23Ngoba uba umuntu engolizwayo ilizwi engesuye olenzayo, ufana lomuntu obuka ubuso bakhe esibukweni;

24ngoba uyazibuka, asuke, abesekhohlwa masinyane ukuthi ube ngonjani.

25Kodwa lowo okhangelisisa emlayweni opheleleyo, umlayo okhululayo, abambelele kuwo, engesuye ozwayo nje akhohlwe kodwa engowenzayo asebenze, uzakuba ngobusisiweyo ekwenzeni kwakhe.

26Uba umuntu esithi uyakholwa, engalunqandi ulimi lwakhe kodwa akhohlise inhliziyo yakhe, ukukholwa kwalowomuntu kuyize.

27Ukukholwa okuhlambulukileyo okungangcolanga phambi kukaNkulunkulu uBaba yilokhu, ukuhambela izintandane labafelwakazi ekuhluphekeni kwabo, lokuzilondoloza kokungcolisayo emhlabeni.