Hlu 11 - Ndebele Bible (iBhayibhili Elingcwele) 1978

UJefta ukhulula abakoIsrayeli kumaAmoni

1UJefta waseGileyadi wayeliqhawe elilamandla, wayeyindodana yewule, uyise wayenguGileyadi.

2UmkaGileyadi wamzalela amanye amadodana; kwathi lawomadodana esekhulile amxotsha uJefta, athi kuye: Kawuyikudla ilifa endlini kababa, ngoba uyindodana yomunye umfazi.

3UJefta wabaleka kubafowabo, wayahlala elizweni laseTobi. Abantu abagangileyo babuthana kuye, bamlandela.

4Emva kwesikhathi amaAmoni alwa loIsrayeli.

5Kwathi ekulweni kwawo loIsrayeli abadala baseGileyadi bahamba bayathatha uJefta elizweni laseTobi,

6bathi kuye: Woza ube ngumholi wethu ukuba silwe lamaAmoni.

7Kodwa yena wathi kibo: Kalingizondanga yini, langixotsha endlini kababa na? Pho, lizelani kimi nxa selihlupheka na?

8Bona bathi kuye: Yikho lokhu okusenze seza kuwe khathesi ukuba uhambe lathi siyekulwa lamaAmoni, ube yinduna yabo bonke abaseGileyadi.

9UJefta wathi kibo: Uba lingibuyisa ekhaya ukulwa lamaAmoni, iNkosi iwanikele kimi, ngizakuba yinhloko yenu.

10Abadala baseGileyadi bathi kuye: INkosi izakuba ngufakazi phakathi kwethu; impela sizakwenza lokhu.

11UJefta wasehamba labo, abantu bamenza waba yinhloko yabo lomholi wabo. EMizipa uJefta wabuya wakhuluma zonke izimiso zakhe phambi kweNkosi.

12UJefta wasethumela izithunywa enkosini yamaAmoni esithi: Ungibangisani ukuba uphume uzekulwa lelizwe lami na?

13Inkosi yamaAmoni yaziphendula izithunywa zikaJefta yathi: Ngoba uIsrayeli wathatha ilizwe lami ekuphumeni kwakhe eGibithe kusukela eArinoni kusiya eJaboki laseJordani; ngakhoke libuyiseni ngokuthula.

14UJefta wasethuma izithunywa futhi enkosini yamaAmoni

15esithi: UJefta uthi uIsrayeli kalithathanga ilizwe laseMowabi lelamaAmoni,

16kodwa ekuphumeni kwakhe eGibithe uIsrayeli wadabula enkangala waya oLwandle oluBomvu, wafika eKadeshi.

17UIsrayeli wasethumela izithunywa enkosini yaseEdoma esithi: Akusivumele sidlule elizweni lakho; kodwa inkosi yaseEdoma kayaze yakulalela lokho. Basebethumela izithunywa enkosini yaseMowabi, layo kayivumanga. Ngakho abakoIsrayeli bahlala eKadeshi.Nani 20:14–21

18Basebedabula enkangala, balibhoda ilizwe laseEdoma lelaseMowabi, bafika ngasempumalanga kwelizwe laseMowabi. Bahlala ngaphetsheya kweArinoni, kodwa kabangenanga elizweni laseMowabi ngoba iArinoni lalingumngcele waseMowabi.Nani 21:4

19AbakoIsrayeli basebethuma izithunywa kuSihoni inkosi yamaAmori, inkosi yaseHeshiboni, bathi: Ake usivumele sedlule elizweni lakho siye kwelakithi.Nani 21:21–24

20Kodwa uSihoni kamvumelanga uIsrayeli ukuba adlule elizweni lakhe; wasebutha bonke abantu bakhe, wamisa eJahazi, walwa loIsrayeli.

21Kodwa iNkosi, uNkulunkulu kaIsrayeli, yamnikela uSihoni labo bonke abantu bakhe esandleni sikaIsrayeli, babahlula. Ngakho abakoIsrayeli balithatha lonke ilizwe lamaAmori ayehlala kulelolizwe.

22Balithatha lonke ilizwe lamaAmori kusukela eArinoni kusiya eJaboki, kusukela enkangala kusiya eJordani.

23Ngalokhoke iNkosi, uNkulunkulu kaIsrayeli, yawaxotsha amaAmori phambi kwabantu bayo uIsrayeli. Wena uzakusithathela ilizwe na?

24Kawuyikuthatha lokhu uKemoshi unkulunkulu wakho akunika khona na? Konke lokho iNkosi uNkulunkulu wethu eyakuthathela abanye kungokwethu.

25Wenake ungcono yini kuloBalaki indodana kaZipori inkosi yaseMowabi na? Yena wake waxabana yini loIsrayeli na? Wake walwa labo na?Nani 22:1–6

26Lapho uIsrayeli esehlala eHeshiboni lasemizini yalo, laseAroweri lasemizini yalo, lakuyo yonke imizi esokhunjini lweArinoni iminyaka engamakhulu amathathu, kungani ungalithathanga lelolizwe kulesosikhathi na?

27Ngakhoke mina kangilonanga ngalutho, uyangona wena ngokulwa lami; iNkosi uMahluleli izakwahlulela yona phakathi kwabakoIsrayeli lamaAmoni.

28Kodwa inkosi yamaAmoni kayiwalalelanga lamazwi kaJefta.

29UMoya weNkosi wasumehlela uJefta, wadabula iGileyadi lakoManase, wadlulela eMizipa laseGileyadi; wasuka lapho wadlulela kumaAmoni.

30UJefta wafunga eNkosini wathi: Uba unikela amaAmoni esandleni sami,

31kuzakuthi loba yikuphi okuphuma endlini yami ukungihlangabeza ekubuyeni kwami senginqobile amaAmoni, kuzakuba ngokweNkosi, ngizakukunikela kube ngumnikelo wokutshiswa.

32Ngakho uJefta wasecaphela kumaAmoni ukulwa lawo; iNkosi yawanikela esandleni sakhe.

33Wawachitha kusukela eAroweri kwaze kwaba seduze leMinithi, wathatha imizi engamatshumi amabili, waze wayafika eAbeli‐Keramimi, wawabulala wawaqothula. UIsrayeli wawanqoba ngokunjalo amaAmoni.

Indodakazi kaJefta

34UJefta wayafika emzini wakhe eMizipa. Kwaphuma indodakazi yakhe ukumhlangabeza, itshaya ichacho igida; yayinguye yedwa umntanakhe; ngaphandle kwayo wayengelandodana lendodakazi.

35Kwathi lapho eyibona wadabula izigqoko zakhe wathi: Maye mntanami! ungidabule inhliziyo, wangilethela ukuhlupheka okukhulu, ngoba ngifungile eNkosini, ngingeke ngisaphule isifungo sami.Nani 30:2

36Yona yathi kuye: Baba, uba ufungile eNkosini, yenza kimi njengokufunga kwakho, lokhu iNkosi isikuphindisele ezitheni zakho amaAmoni.

37Ngicela ungenzele lokhu ukuthi ungiyekele inyanga ezimbili ngizule ezintabeni, ngikhalele ubuntombi bami mina labangane bami.

38Yena wathi: Hamba. Waseyiyekela ihamba okwenyanga ezimbili. Yasihambake, yona labangane bayo, yakhalela ubuntombi bayo ezintabeni.

39Ekupheleni kwenyanga ezimbili yabuyela kuyise owenza kuyo njengokufunga kwakhe. Yayingazanga ihlangane lendoda. Kwaba ngumkhubo koIsrayeli.

40ukuba amadodakazi akoIsrayeli ahambe yonke iminyaka ukukhalela indodakazi kaJefta owaseGileyadi insuku ezine ngomnyaka.