Hubo 69 - Ndebele Bible (iBhayibhili Elingcwele) 1978

Ukukhala kohluphekayo

1Ngikhulula, Nkulunkulu,

ngoba amanzi asefike entanyeni yami.

2Ngiyatshona odakeni, lapho kungelandawo yokuma;

ngingene emanzini atshonayo,

lempophoma iyangicwilisa.

3Sengidiniwe yikukhala,

lomphimbo wami womile;

amehlo ayafiphala ekudingeni uNkulunkulu wami.

4Abangizondayo ngeze banengi ukwedlula inwele zekhanda lami;

balamandla abafuna ukungibulala,

bengihlasela ngaphandle kwecala.

Lokho engingakuntshontshanga kumele ngikubuyisele na?

5Nkulunkulu, wena uyabazi ubuthutha bami,

lezono zami kazifihlakalanga kuwe.

6Kabangayangeki ngami labo abathemba kuwe,

Nkosi Nkulunkulu wamabandla,

bangadunyazwa ngami abakudingayo,

Nkulunkulu kaIsrayeli.

7Ngoba ngithelwe lihlazo ngenxa yakho,

ihlazo lisibekele ubuso bami.

8Sengaba ngowasemzini kubafowethu,

lowezizweni kubantwana bakamama.

9Ngoba ukutshisekela indlu yakho kungidlile,

lenhlamba yabakuthukayo yehlele phezu kwami.

10Ngakhathaza umphefumulo wami ngokuzila ukudla,

ngadunyazwa ngalokho.

11Lapho ngisambatha ingubo

yokulila ngaba yisiga kibo.

12Abahlezi enkundleni bakhuluma ngami,

lezidakwa ziyangihaya.

13Kodwa mina ngikhuleka kuwe, Nkosi.

Ngesibanga esifaneleyo, Nkulunkulu,

ngobunengi bothando lwakho olungapheliyo ngiphendula,

ngeqiniso lokusiza kwakho.

14Ungophule, ngingatshoni exhaphozini,

ngikhululwe ezitheni zami

lasemanzini atshonayo.

15Izimpophoma kazingangicwilisi,

lenziki ingangiginyi,

lomgodi ungavali umlomo wawo phezu kwami.

16Ngiphendula, Nkosi, ngoba uthando lwakho olungapheliyo lulungile;

ngobunengi besihawu sakho uphendukele kimi.

17Ungayifihleli ubuso bakho inceku yakho;

ngoba ngiyahlupheka, phangisa ungiphendule.

18Sondela kimi, ungihlenge,

ungikhulule ngenxa yezitha zami.

19Wena uyakwazi ukuthukwa kwami,

lehlazo lami lokudunyazwa kwami;

lezitha zami zonke uyazazi.

20Ukuthukwa kuyidabule inhliziyo yami,

ngakho ngiyagula kakhulu.

Bengilindele ukuhawukelwa, kodwa kangikuzuzanga,

labaduduzayo, kodwa kangibafumananga.

21Bangipha itshefu ibe yikudla kwami,

ekomeni kwami banginathisa iwayini elimunyu.

22Ukudla kwabo kakube ngumjibila kibo,

leminikelo yabo ibabambe.

23Amehlo abo kawafiphale ukuze bangaboni,

inkalo zabo zithuthumele.

24Thela intukuthelo yakho phezu kwabo,

lolaka lwakho oluvuthayo lubafice.

25Umuzi wabo kawube lunxiwa,

kungabi khona ohlala emathenteni abo.

26Ngoba otshaywe nguwe bayamzingela,

laye olinyazwe nguwe bayamengeza amanxeba.

27Yengezelela ukona ekoneni kwabo,

ukuze bangangeni ekulungeni kwakho.

28Kabesulwe encwadini yabaphilayo,

bangabalwa kanye labalungileyo.

29Kodwa mina ngihluphekile, ngiyafuthelwa;

ukukhulula kwakho, Nkulunkulu, kakungiphakamise.

30Ngizakulibonga ibizo likaNkulunkulu ngehubo,

ngimdumise ngokubonga.

31Lokhu kuzakuyithokozisa iNkosi ukwedlula umnikelo wenkabi,

lomnikelo wenkunzi elempondo lamangqina.

32Abacindezelweyo kabakubone lokhu, bathokoze;

lina elidinga uNkulunkulu kazivuseleleke inhliziyo zenu.

33Ngoba iNkosi iyabalalela abahluphekayo,

kayizideleli izibotshwa zayo.

34Izulu lomhlaba kakuyibonge,

izinlwandle lakho konke okuphakathi kwazo.

35Ngoba uNkulunkulu uzakukhulula iZiyone,

akhe futhi imizi yakoJuda;

lezinceku zakhe zizakuhlala khona ibe yilifa lazo.

36Abantwana bezinceku zakhe bazakudla ilifa,

labalithandayo ibizo lakhe bazakuhlala khona.