1UNkulunkulu wathi kuMose: Khwela uze eNkosini wena kanye loAroni loNadabi loAbihu labalisa bakoIsrayeli abangamatshumi ayisikhombisa, lingikhonze likhatshana.
2NguMose yedwa ozasondela eNkosini, kodwa bona kabayikusondela; labantu bonke kabayikukhwela kanye laye.
3UMose weza wabatshela abantu wonke amazwi eNkosi lezahlulelo zonke; bonke abantu baphendula ngalizwi linye bathi: Sizakuwenza wonke amazwi iNkosi ewakhulume kithi.
4UMose waseloba wonke amazwi eNkosi. Wavuka ekuseni, wakha ialtare phansi kwentaba kanye lensika zokukhonzela ezilitshumi lambili ezilingana izizwe zakoIsrayeli.
5Wathuma insizwa zabantu bakoIsrayeli ukuba zinikele iminikelo yokutshiswa, zihlabele iNkosi imihlatshelo yokuthula yezinkabi.
6UMose wathatha ingxenye yegazi, wayithela emiganwini; lengxenye wayikhaphazela ealtareni.
7Wathatha incwadi yesivumelwano, wayibala phambi kwabantu. Bathi: Konke iNkosi ekutshiloyo sizakukwenza, silalele.
8UMose wasethatha igazi, walikhaphazela ebantwini, wathi: Khangelani igazi lesivumelwano iNkosi esenze lani ngawo wonke lamazwi.
9Basebekhwelake uMose loAroni loNadabi loAbihu kanye labalisa bakoIsrayeli abangamatshumi ayisikhombisa,
10bambona uNkulunkulu wakoIsrayeli; kwakukhona ngaphansi kwenyawo zakhe okungathi ngamatshe amasafire agandelweyo, acwebileyo njengezulu.
11Kasibekanga isandla sakhe kuzo izikhulu zakoIsrayeli. Sebembonile uNkulunkulu badla, banatha.
UMose usentabeni yaseSinayi12INkosi yasisithi kuMose: Khwela uze kimi entabeni, uhlale khona; ngizakukunika amatshe engilobe kuwo umlayo lemithetho ukuba ubafundise yona.
13Wasukake uMose lenceku yakhe uJoshuwa; uMose wakhwela entabeni kaNkulunkulu.
14Wathi ebaliseni: Silindeleni lapha size sibuye kini; nampo uAroni loHuri; olendaba kaye kubo.
15UMose wasekhwela entabeni, leyezi lasibekela intaba.
16Inkazimulo yeNkosi yahlala entabeni yaseSinayi; iyezi layisibekela insuku eziyisithupha; ngosuku lwesikhombisa yambiza uMose iseyezini.
17Inkazimulo yeNkosi yabonakala engqongeni yentaba, emehlweni abakoIsrayeli, yayinjengomlilo otshisa uqothule.
18UMose wakhwela entabeni, wangena eyezini; wahlala entabeni insuku ezingamatshumi amane lobusuku obungamatshumi amane.
Who We AreWhat We EelieveWhat We Do
2025 by iamachristian.org,Inc All rights reserved.
