Hubo 24 - Ndebele Bible (iBhayibhili Elingcwele) 1978

INkosi yobukhosi

1Umhlaba ungoweNkosi kanye lakho konke okukuwo,

ilizwe kanye labakhileyo kulo.

2Ngoba yona yawusekela phezu kwezinlwandle,

yawumisa phezu kwamanzi.

3Ngubani olelungelo lokukhwela entabeni yeNkosi na?

Ngubani ongangena ethempelini layo elingcwele na?

4Ngulowo olezandla ezingelacala lenhliziyo ehlambulukileyo,

ongaphakamiseli umphefumulo wakhe kokuyize

longafungeli amanga.

5Yena uzakwamukela isibusiso seNkosi,

lokulunga kukaNkulunkulu umkhululi wakhe.

6Banjalo labo abayifunayo iNkosi,

abafuna ubuso bukaNkulunkulu kaJakobe.

7Vulekani lina masango,

vulekani lina minyango emidala,

ukuba kungene iNkosi yobukhosi.

8Ingubani liNkosi yobukhosi na?

YiNkosi elamandla leliqhawe,

iNkosi elamandla ekulweni.

9Vulekani lina masango,

vulekani lina minyango emidala,

ukuba kungene liNkosi yobukhosi.

10Ingubani liNkosi yobukhosi na?

INkosi yamabandla, yiyo eyiNkosi yobukhosi.