Hubo 46 - Ndebele Bible (iBhayibhili Elingcwele) 1978

UNkulunkulu uyisiphephelo sethu

1UNkulunkulu uyisiphephelo sethu lamandla ethu,

uyafunyaniswa elusizo kakhulu ekuhluphekeni.

2Ngakhoke kasiyikwesaba lanxa umhlaba unyikinyeka,

lanxa izintaba ziphoselwa olwandle,

3lanxa amanzi alo ehlokoma, ekhaphazela,

lezintaba zizamazama ngokukhukhumala kwalo.

4Kukhona umfula omanzi awo athokozisa umuzi kaNkulunkulu,

indawo engcwele yoPhezukonke.

5UNkulunkulu uphakathi kwawo, kawuyikunyikinywa;

uNkulunkulu uzakuwusiza ngovivi lokusa.

6Izizwe ziyaxokozela, lemibuso izamazame;

ukhupha ilizwi lakhe, umhlaba uncibilike.

7INkosi yamabandla ilathi,

uNkulunkulu kaJakobe uyisiphephelo sethu.

8Wozani libone izenzo zeNkosi,

incithakalo ayenzileyo emhlabeni.

9Iyaqeda ukulwa endaweni zonke;

iqamula idandili, yaphule umkhonto,

lezihlangu izitshisa ngomlilo.

10Thulani, lazi ukuba mina nginguNkulunkulu,

ngiphakanyiswa phakathi kwezizwe,

ngiphakanyiswa emhlabeni.

11INkosi yamabandla ilathi,

uNkulunkulu kaJakobe uyisiphephelo sethu.