2 Sam 20 - Ndebele Bible (iBhayibhili Elingcwele) 1978

Ukuhlamuka kukaSheba

1Kwakukhona lapho umuntu omubi, ibizo lakhe linguSheba indodana kaBikiri wakoBenjamini; wakhalisa uphondo wathi:

Kasilasabelo kuDavida,

kasilalifa endodaneni kaJese;

hambani lonke emathenteni enu, Israyeli.

2Bonke abantu bakoIsrayeli basebemonyuka kuDavida, balandela uSheba indodana kaBikiri; kodwa abantu bakoJuda balandela inkosi yabo kusukela eJordani kwaze kwaba seJerusalema.

3UDavida wafika endlini yakhe eJerusalema; wathatha abanye abafazi bakhe abalitshumi ayebatshiye ukuba balinde indlu, wababeka endlini ukuba balindwe, wabanika ukudla, kodwa kangenanga labo endlini. Bavalelwa kwaze kwaba lusuku lokufa kwabo, behlala njengabafelwakazi.

4Inkosi yasisithi kuAmasa: Ngibuthanisela abantu bakoJuda, ubuye ngensuku ezintathu.

5UAmasa wasehamba ukubuthanisa uJuda, kodwa waphuza kwaze kwadlula isikhathi asimiselweyo.

6UDavida wasesithi kuAbishayi: USheba indodana kaBikiri isizakwenza okubi kakhulu ukudlula okukaAbisalomu; thatha inceku zenkosi yakho, uxotshane laye, funa azuze imizi ebiyelweyo, aphunyuke.

7UAbishayi walandelwa nguJowabi, lamaKerethi lamaPelethi ayengabalindi, lamaqhawe wonke, baphuma eJerusalema ukuxotshana loSheba indodana kaBikiri.

8Lapho sebeselitsheni elikhulu eliseGibeyoni, uAmasa wafika ukubahlangabeza. UJowabi wayegqoke isigqoko sempi, phezu kwaso kukhona ibhanti elilomhedla usesikhwameni sawo, libotshelwe okhalweni lwakhe, umhedla wawa esahamba.

9UJowabi wathi kuAmasa: Usaphila, mfowethu na? UJowabi wabamba uAmasa ngesilevu ngesandla sakhe sokunene ukuba amange.

10Kodwa uAmasa wayengawuboni umhedla owawuphethwe nguJowabi; uJowabi wasemgwaza ngawo emzimbeni, wathululela phansi imibilini yakhe, wafa engamphindanga. UJowabi loAbishayi umfowabo baxotshana loSheba indodana kaBikiri.

11Omunye wabantu bakaJowabi wema phansi kukaAmasa, wathi: Omthandayo uJowabi, longokaDavida, kalandele uJowabi.

12UAmasa walala egazini lakhe phakathi komgwaqo. Wonke umuntu odlulayo, nxa embona, wema; nxa lowomuntu ebona ukuba bonke abantu bayema, wamgiqa uAmasa, wamsusa emgwaqweni, wamusa egangeni, waphosela ingubo phezu kwakhe.

13Esesusiwe emgwaqweni, bonke abantu badlula bamlandela uJowabi ukuba baxotshane loSheba indodana kaBikiri.

14USheba wadabula kuzo zonke izizwe zakoIsrayeli, waze wafika eAbeli laseBeti‐Mahaka; wonke amaBikiri abuthana amlandela ukuyangena emzini.

15Bonke abantu ababeloJowabi bafika, bamvimbezela eAbeli laseBeti‐Mahaka; bawakhela idundulu umuzi, bemba umduli wawo ukuba bawudilizele phansi.

16Kwasekumemeza owesifazana ohlakaniphileyo emi phezu komthangala phakathi komuzi wathi: Zwanini, bo! Ake lithi kuJowabi kasondele lapha, kengikhulume laye.

17Wasesondela; owesifazana wathi: Nguwe uJowabi na? Yena wathi: Nginguye. Wasesithi kuye: Ake uzwe amazwi encekukazi yakho. Yena wathi: Ngilalele.

18Wasesithi: Endulo babejwayele ukuthi: Ake babuze iseluleko eAbeli; besebeyiqeda indaba.

19Umuzi wakithi ulokuthula uthembekile ukwedlula eminye; futhi unjengonina koIsrayeli. Ufunelani ukuwuchitha na? Uzadilizelani okweNkosi uNkulunkulu na?

20UJowabi wasephendula esithi: Atshi bo! kakube khatshana lami ukuba ngidilize loba ngichithe.

21Kakunjalo; kodwa umuntu wasezintabeni zakoEfrayimi, uSheba indodana kaBikiri ibizo lakhe, uphakamisele isandla sakhe enkosini uDavida; nginikani yena kuphela, ngizasuka emzini. Owesifazana wasesithi kuJowabi: Ikhanda lakhe lizaphoselwa kuwe ngaphezu komduli.

22Owesifazana wasesiya ngokuhlakanipha kwakhe ebantwini bonke. Basebemquma ikhanda uSheba indodana kaBikiri, baliphosela ngaphandle kuJowabi. Yena wakhalisa uphondo, impi yonke yahlakazeka kulowomuzi, bonke baya emakhaya abo. UJowabi wabuyela enkosini eJerusalema.

23UJowabi wayephethe yonke impi yakoIsrayeli; uBenaya indodana kaJehoyada wayephethe amaKerethi lamaPelethi ayengabalindi;

24uAdoniramu wayephethe izibhalwa; uJehoshafati indodana kaAhiludi wayengumbhali;

25uSheva wayengumabhalane; uZadoki loAbiyatha babengabapristi;

26uIra waseJayiri laye wayengumpristi kaDavida.