1UMose wasekhuluma lezinhloko zezizwe zabakoIsrayeli, wathi: Yilokhu iNkosi elaye ngakho ukuthi:
2Nxa umuntu ethembisa isithembiso eNkosini, loba efunga isifungo, ezibopha ngesibambiso, kangephuli ilizwi lakhe; umele ukwenza konke akuthembisileyo ngomlomo wakhe.Dute 23:21–23; Mat 5:33
3Futhi nxa owesifazana efunga isifungo eNkosini, azibophe ngesibambiso esemutsha, esesemzini kayise,
4loyise ezwe ngesifungo sakhe langesibambiso sakhe azibophe ngaso, kodwa engatsho lutho kuye, zonke izifungo zakhe zizakuma, lazo zonke izibambiso azibophe ngazo zizasebenza.
5Kodwake uba uyise, ekuzweni kwakhe lokho, emtshela ukuthi kavumi, kakuyikusebenza lesisodwa sezifungo zakhe lesisodwa sezibambiso azibophe ngazo; leNkosi izakumyekela, ngoba uyise engavumi.
6Uba owesifazana esenda esazibophe ngesifungo sakhe, loba esazibophe ngesithembiso asithembise ngokungananzeleli,
7lendoda yakhe ibisikuzwa, kodwa ingatsho lutho kuye lapho ikuzwa lokho, izithembiso zakhe zizakusebenza, lezibambiso azibophe ngazo zizakusebenza.
8Kodwake uba indoda yakhe imtshela lapho ikuzwa ukuthi kayivumi, izakwenza isifungo asenzileyo sibe yize, lesithembiso asithembise ngokungananzeleli azibophe ngaso, sibe yize; leNkosi izakumyekela.
9Kodwa isifungo somfelwakazi loba isifungo sowehlukene lendoda yakhe, lakho konke azibophe ngakho, kuzakusebenza.
10Uba enzile isithembiso endlini yendoda yakhe, loba efungile isifungo, ezibophile ngesibambiso,
11lendoda yakhe ibisikuzwa, kodwa ingatsho lutho kuye, ingamaleli, zonke izifungo zakhe zizakusebenza, lazo zonke izibambiso azibophe ngazo zizakusebenza.
12Kodwa uba indoda yakhe izala lapho izizwa, konke akutshoyo kakuyikusebenza, loba izithembiso zakhe loba izibambiso zakhe; indoda yakhe izalile, leNkosi izakumyekela.
13Zonke izifungo lazo zonke izithembiso zokuzithoba, indoda yakhe ingazivuma loba izale.
14Kodwa uba indoda yakhe ingatsho lutho kuye ngalolosuku langosuku olulandelayo, lokhu kutsho ukuthi iyazivuma zonke izifungo zakhe lazo zonke izibambiso zakhe; impela izivumile, ngoba kayitshongo lutho lapho izizwa.
15Kodwa uba izala lapho isizizwile, izakuba lomlandu.
16Lezi yizimiso iNkosi eyamlaya zona uMose mayelana lomuntu lomkakhe, loyise lendodakazi yakhe isentsha emzini kayise.
Who We AreWhat We EelieveWhat We Do
2025 by iamachristian.org,Inc All rights reserved.
