Mat 27 - Ndebele Bible (iBhayibhili Elingcwele) 1978

UJesu unikelwa kuPilatu umbusi(Mark 15:1; Luka 23:1, 2; Joha 18:28–32)

1Kwathi sekusile, bonke abapristi abakhulu labadala babantu bacebisana ngoJesu ukuba bambulale;

2bambopha, bamqhuba, bamnikela kuPilatu umbusi.

Ukuzibulala kukaJudasi

3Kwathi uJudasi owamnikelayo, esebonile ukuthi ulahliwe, wazisola, wabuyisela inhlamvu zesiliva ezingamatshumi amathathu kubapristi abakhulu labadala,Seb 1:18, 19

4wathi: Ngonile lokhu nginikele igazi elingelacala. Kodwa bona bathi: Kasilandaba lalokho thina. Zibonele wena.

5Wasephosela inhlamvu zesiliva ethempelini, wasuka, wayaziphanyeka.

6Abapristi abakhulu bathatha inhlamvu zesiliva, bathi: Kakuvunyelwa ukuzifaka emnikelweni wethempeli, ngoba ziyimali yegazi.

7Bacebisana, bathenga ngazo isiqinti sombumbi ukuba sibe yindawo yokumbela abemzini.

8Ngakho lesosiqinti sathiwa yisiqinti segazi, kuze kube lamuhla.

9Kwasekugcwaliseka okwakhulunywa ngumprofethi uJeremiya ukuthi: Bathatha inhlamvu zesiliva ezingamatshumi amathathu, intengo eyamiselwa othengiswayo, ngoba yayinjalo emadodaneni kaIsrayeli;Zek 11:12, 13

10bathenga ngazo insimu yombumbi, njengokuba iNkosi ingilayile.

UJesu uphambi kukaPilatu(Mark 15:1–15; Luka 23:3–5, 13–25; Joha 18:33—19:16)

11Wema uJesu phambi kombusi; umbusi wambuza wathi: Wena uyiNkosi yabaJuda na? UJesu wathi: Kutsho wena.

12Kwathi nxa abapristi abakhulu labadala bemmangalela, kaphendulanga lutho.

13UPilatu wasesithi kuye: Kawuzwa yini lezizinto ezingaka abazifakaza ngawe na?

14Kodwa kamphendulanga lakwelilodwa ilizwi, waze wamangala kakhulu umbusi.

15Ngomkhosi wePhasika umbusi wayejwayele ukukhululela ixuku isibotshwa sibe sinye elisifunayo.

16Ngalesosikhathi babelesibotshwa esidumileyo esithiwa nguBarabasi.

17Ngakho sebebuthene, uPilatu wathi kibo: Lithanda ukuba ngilikhululele bani, uBarabasi ingabe uJesu othiwa nguKristu na?

18Ngoba wayekwazi ukuthi bamnikele uJesu ngomona.

19Kwathi esahlezi esihlalweni sokuthetha amacala, umkakhe wathumela kuye, wathi: Ungabi landaba kulowomuntu olungileyo, ngoba lamuhla ngihluphekile kakhulu ngaye ephupheni.

20Kodwa abapristi abakhulu labadala bavumelana lamaxuku ukuba bacele uBarabasi, ambulale uJesu.

21Wasebaphendula umbusi, wathi: Lithanda ukuba ngilikhululele bani kulaba ababili na? Bathi: UBarabasi.

22UPilatu wathi kibo: Pho, lithi ngimenze njani uJesu othiwa nguKristu na? Bonke bathi kuye: Kabethelwe.

23Wathi: Ngoba wenze ububi bani? Kodwa bamemeza kakhulu bathi: Kabethelwe!

24UPilatu esebonile ukuthi kakusizi lutho lokuthi kwasekuqala ukuba lesiphithiphithi, wathatha amanzi, wageza izandla zakhe phambi kwexuku, wathi: Angilacala ngegazi lalumuntu; ziboneleni lina.Dute 21:6–9

25Bonke abantu baphendula bathi: Igazi lakhe kalibe phezu kwethu laphezu kwabantwana bethu.

26Wasebakhululela uBarabasi, kodwa esemtshayile uJesu wamnikela ukuba abethelwe.

Abebutho bamenza uJesu inhlekisa

27Abebutho bombusi basebemthatha uJesu, bamngenisa endlini yombusi, baqoqela kuye ibutho lonke.

28Bamhlubula, bamambathisa ingubo ebomvu,

29baluka umqhele wameva, bamethwesa wona ekhanda, bamphathisa loluthi esandleni sakhe sokunene, baguqa phambi kwakhe, bamenza inhlekisa, bathi: Bayethe, Nkosi yabaJuda!

30Bamkhafulela ngamathe, bathatha uluthi bamtshaya ekhanda.

31Sebemenze inhlekisa, bamhlubula ingubo, bamambathisa ingubo zakhe, bamqhuba ukuba bambethele.

32Kwathi bephuma bafumana umuntu waseKureni othiwa nguSimoni; bambamba ngamandla lowo ukuba athwale isiphambano sakhe.

UJesu esiphambanweni(Mark 15:16–32; Luka 23:26–43; Joha 19:17–27)

33Sebefikile endaweni ethiwa yiGolgotha, okuyikuthi iNdawo yokhakhayi,

34bamnika iwayini elixutshaniswe lenyongo; kodwa kuthe ukuba alizwe, kaze athanda ukulinatha.

35Sebembethele, babelana ingubo zakhe, benza inkatho ngazo;Hubo 22:18

36bahlala phansi bamlinda khona.

37Babeka ngaphezu kwekhanda lakhe incwadi yecala lakhe ilotshiwe ukuthi: LO NGUJESU INKOSI YABAJUDA.

38Kwabethelwa kanye laye abaphangi ababili, omunye ngakwesokunene lomunye ngakwesokhohlo.

39Abadlulayo bamhlambaza benikina amakhanda abo,Hubo 22:7; 109:25

40besithi: Wena odiliza ithempeli, ubuye ulakhe ngensuku ezintathu, zisilise; uba uyiNdodana kaNkulunkulu, yehla esiphambanweni.Mat 26:61; Joha 2:19

41Ngokunjalo labapristi abakhulu labo bahlekisana ngaye kanye lababhali labadala, bathi:

42Wasilisa abanye, angezisilise yena. UyiNkosi yakoIsrayeli; kehle khathesi esiphambanweni, sikholwe kuye.

43Wathemba uNkulunkulu; kamkhulule khathesi, uba emthanda, ngoba wathi: NgiyiNdodana kaNkulunkulu.Hubo 22:8

44Labaphangi ababebethelwe kanye laye bamklolodela ngokunjalo.

Ukufa kukaJesu(Mark 15:33–41; Luka 23:44–49; Joha 19:28–30)

45Kusukela emini kwaba mnyama emhlabeni wonke kwaze kwaba yiawa yesithathu ntambana.

46Ngeawa yesithathu uJesu wamemeza ngelizwi elikhulu wathi: “Eli, eli, lama sabaktani?” okuyikuthi ngokuphendulelwa: Nkulunkulu wami, Nkulunkulu wami, ungitshiyeleni na?Hubo 22:1

47Abanye kwababemi khona bekuzwa lokho bathi: Ubiza uElija.

48Omunye wabo wagijima masinyane, wathatha uzipho, walugcwalisa ngewayini elimunyu, waluhloma oluthini, wamnika ukuba anathe.Hubo 69:21

49Kodwa abanye bathi: Yekelani, sibone ukuba uElija uzakuza amsilise.

50UJesu wabuya wamemeza ngelizwi elikhulu, wafa.

51Iveli lethempeli ladabuka kabili, laqala phezulu laze lafika phansi; umhlaba wazamazama, amadwala aqhekezeka;Eks 26:31–33

52lamaliba avuleka, izidumbu ezinengi zabangcwele abasebelele zavuswa;

53sebephumile emalibeni emva kokuvuka kwakhe, bangena emzini ongcwele, babonakala kwabanengi.

54Kwathi induna yekhulu lalabo ababelayo belinde uJesu, sebebonile ukuzamazama komhlaba lalokho okwenzekileyo besaba kakhulu, bathi: Lembala lumuntu ubeyiNdodana kaNkulunkulu.

55Kwakukhona lapho abesifazana abanengi bebukela, bekhatshana, ababemlandele uJesu bevela eGalili, bemsebenzela;Luka 8:2, 3

56kwakukhona phakathi kwabo uMariya Magadalena, loMariya unina kaJakobe loJosefa, lonina wamadodana kaZebediya.

Ukumbelwa kukaJesu(Mark 15:42–47; Luka 23:50–56; Joha 19:38–42)

57Kwathi sekuhlwile, kwafika umuntu onothileyo waseArimathiya, ibizo lakhe nguJosefa, owayengumfundi kaJesu laye;

58yena waya kuPilatu, wacela isidumbu sikaJesu. UPilatu waselaya ukuba asinikwe.

59UJosefa wathatha isidumbu, wasigoqela ngelembu elihlambulukileyo,

60wasibeka elibeni lakhe elitsha elaligujiwe edwaleni, wagiqela ilitshe elikhulu emnyango weliba, wahamba.

61Babekhona lapho uMariya Magadalena lomunye uMariya behlezi maqondana leliba.

62Ngosuku olulandelayo olungasemva kosuku lokulungisela, abapristi abakhulu labaFarisi babuthana kuPilatu,

63bathi: Nkosi, siyakhumbula ukuthi lowomkhohlisi esekhona wathi: Emva kwensuku ezintathu ngizakuvuka.Mat 16:21; 17:23; 20:19; Mark 8:31; 9:31; 10:33, 34; Luka 9:22; 18:31–33

64Ngakho laya ukuba iliba lilindwe kuze kube lusuku lwesithathu, funa abafundi bakhe bafike bamube, bathi ebantwini: Uvukile kwabafileyo; kuthi inkohliso yokucina ibe mbi kuleyokuqala.

65UPilatu wathi kibo: Thathani abalindi, lilinde njengokubona kwenu.

66Bahambake, bathatha abalindi, baliqinisa iliba, babeka uphawu elitsheni.