Seb 11 - Ndebele Bible (iBhayibhili Elingcwele) 1978

UPetro ulandisa eJerusalema indaba kaKorneliya

1Abaphostoli labazalwane ababeseJudiya bezwa ukuthi abezizwe labo balamukele ilizwi likaNkulunkulu.

2Ngakho kwathi ukuba uPetro enyukele eJerusalema, abokusoka baphikisana laye,

3besithi: Wena ungene ebantwini abangasokanga, wadla labo.

4Kodwa uPetro waqala ukubalandisela ngokulandelana esithi:

5Mina ngangisemzini weJopha ngikhuleka; ngehlelwa yisiyezi, ngabona embonweni ulutho lusehla lunjengengubo enkulu lusehliswa ngamasondo amane luvela ezulwini, lwafika kimi.

6Kwathi ukuba ngilukhangelisisa, ngabona izidalwa zomhlaba, ezihambayo lezihuquzelayo leziphaphayo.

7Ngezwa ilizwi lisithi kimi: Petro, sukuma, uhlabe, udle.

8Kodwa ngathi: Atshi, Nkosi, ngoba okubi lokungcolileyo kakuzake kungene emlonyeni wami.

9Kwasekuzwakala ilizwi livela ezulwini, laphendula ngokwesibili lathi: Lokho uNkulunkulu akuhlambululeyo, ungatsho wena ukuthi kubi.

10Lokhu kwenzeka kathathu, konke kwabuye kwabuyiselwa ezulwini.

11Ngalesosikhathi kwasekufika amadoda amathathu endlini esasingenise kuyo, ethunyiwe kimi evela eKesariya.

12UMoya wangitshela ukuba ngihambe lawo ngingathandabuzi; lababazalwane abayisithupha labo bahamba lami, sangena endlini yaleyondoda.

13Yasibikela ukuthi yayibone isithunywa simi endlini yayo sisithi: Thumela eJopha, ubize uSimoni othiwa nguPetro

14ozakukhuluma kuwe amazwi ozasiliswa ngawo, wena lendlu yakho yonke.

15Kwathi ngisaqala ukukhuluma, uMoya oNgcwele wehlela phezu kwabo njengakithi ekuqaleni.

16Ngakhumbula ilizwi leNkosi ukuba yathi: UJohane wabhaphathiza ngamanzi, kodwa lina lizakubhaphathizwa ngoMoya oNgcwele.Seb 1:5

17Ngakhoke uba uNkulunkulu ebanikile isiphiwo njengalokhu asinika thina esakholwa eNkosini uJesu Kristu, ngingubani mina ukuba ngimvimbele uNkulunkulu na?

18Bathi sebekuzwile lokhu, bathula, bamdumisa uNkulunkulu besithi: Kanti uNkulunkulu unikile abezizwe labo ukuphendukela ekuphileni.

Amakholwa aseAntiyoki abizwa ngokuthi ngamaKristu

19Labo abahlakazeka ngokuhlupheka okwaqala ngokufa kukaStefane bahamba baze bafika eFenekiya laseKuprosi laseAntiyoki bengalikhulumi ilizwi lakoyedwa kodwa kubaJuda kuphela.Seb 8:1–4

20Kodwa kwakukhona abanye kubo, amadoda aseKuprosi laseKurene abathi befika eAntiyoki bakhuluma lakumaGriki, betshumayela ngeNkosi uJesu.

21Isandla seNkosi sasilabo; kwakholwa abanengi, baphendukela eNkosini.

22Zezwakala indaba zabo endlebeni zebandla laseJerusalema; bathumela uBarnabasi eAntiyoki.

23Kwathi ukuba afike, wabona umusa kaNkulunkulu, wathokoza, wabalaya bonke ukuba babambelele eNkosini ngokuzimisela kwenhliziyo.

24Ngoba wayeyindoda elungileyo, egcwele uMoya oNgcwele lokukholwa; kwengezelelwa eNkosini abantu abanengi.

25UBarnabasi wasesiya eTarsusi ukuba adinge uSawuli;

26kwathi esemfumene, wamletha eAntiyoki. Kwaba ngumnyaka wonke behlangana lebandla, bafundisa abantu abanengi. Kwaqala eAntiyoki ukuba abafundi babizwe ngokuthiwa ngamaKristu.

AmaKristu athumela iziphiwo kubazalwane baseJudiya

27Kwathi ngalezonsuku kwafika eAntiyoki abaprofethi bevela eJerusalema.

28Kwasukuma omunye wabo othiwa nguAgabusi, watshengisa ngoMoya ukuthi kuzakuba khona indlala enkulu emhlabeni wonke, eyaba khona ensukwini zikaKlawudiya.Seb 21:10

29Abafundi bazimisela ukuba ilowo lalowo wabo athumele njengamandla akhe okokusiza abazalwane abahlala eJudiya.

30Bakwenzake, bakuthumela kwabadala ngezandla zaboBarnabasi loSawuli.