Jobe 31 - Ndebele Bible (iBhayibhili Elingcwele) 1978

UJobe ucabanga ukuthi ulungile

1Ngazimisela ukuba kangiyikukhangela intombi ngamehlo ami.

2Singaba yini isabelo sami esivela kuNkulunkulu phezulu,

lelifa lami elivela kuSomandla phezulu na?

3Izinhlupheko kazimehleli omubi,

lengozi kayibehleli abenza okubi na?

4Kanti uNkulunkulu kaziboni indlela zami,

abale zonke izinyathelo zami na?

5Ngiyafunga ukuthi kangizanga ngiqambe amanga,

kangizanga ngihambe ngendlela yenkohliso.

6— Kangilinganiswe ngesilinganiso esilungileyo,

ukuze uNkulunkulu azi ubuqotho bami —

7Uba izinyathelo zami ziphambukile endleleni,

lenhliziyo yami yalandela amehlo ami,

uba kunamathele icwatshana ezandleni zami,

8kangihlanyele, kudle omunye,

lokuhlanyelelwe mina kusitshulwe.

9Uba inhliziyo yami iyengwe ngowesifazana,

ngacathama ngasemnyango kamakhelwana wami,

10umkami kacholele omunye,

amanye amadoda alale laye.

11Ngoba lokho kungaba licala elibi,

kungaba yibubi bokuthonisiswa ngabathonisisi;

12kungaba ngumlilo otshisa uqothule amabele ami.

13Uba ngalile indaba yenceku yami loba eyencekukazi yami,

nxa ziletha ukusola kwabo ngami,

14ngizakwenza njani lapho uNkulunkulu evuka na?

Lalapho engibuza, ngizaphendula ngithini na?

15Lowo owangenza esiswini kabenzanga labo na?

Kamunye yini owasibumba esiswini na?

16Uba ngigodlile lokho okufiswa ngumyanga,

ngenza amehlo omfelwakazi ukuba afiphazwe zinyembezi,

17ngadla ukudla kwami ngedwa,

ngayincitsha intandane,

18— kusukela ebutsheni bayo ngayikhulisa njengoyise,

ngayiqondisa kusukela ekuzalweni kwayo —

19uba ngabona omunye ebhubha ngenxa yokuswela isigqoko,

loba umyanga engelazambatho,

20uba umzimba wakhe ungathokozanga ngami,

ngoba engakhudunyezwanga yiboya bezimvu zami,

21uba ngaphakamisela isandla sami phezu kwezintandane,

ngoba abantu bezakungisekela enkundleni,

22kalikhumuke ihlombe lami esiphangeni,

lengalo yami ingcomuke endaweni yayo.

23Ngoba ngesaba inhlupheko ezivela kuNkulunkulu,

ngingelakho ukukhangelana lobukhulu bakhe.

24Uba ngenzile igolide laba lithemba lami,

ngathi igolide elihle lilithemba lami,

25uba ngithokozile ngoba inotho yami inengi,

lesandla sami sizuzile okunengi,

26uba ngikhangele ilanga lapho likhanya,

lenyanga ehamba ekukhazimuleni kwayo,

27ngayengwa enhliziyweni yami,

ngaphakamisa isandla sami ukuzikhonza,

28lalokho kungaba yibubi bokuthonisiswa ngabathonisisi,

ngoba ngizabe ngingathembekanga kuNkulunkulu ophezulu.

29Uba ngithokozile ngokuchitheka kongizondayo,

ngajabula lapho esehlelwa yibubi,

30— lanxa ngingavumelanga ulimi lwami ukuba lone,

ngokucela ukuphila kwakhe ngenhlamba —

31uba abantu bendlu yami bengatshongo ukuthi:

ngubani ongasuthanga ukudla kwakhe na?

32— kakukho owasemzini oke walala phandle;

iminyango yami ngiyivulele izihambi —

33uba ngifihlile iziphambeko zami ebantwini,

ngokufihla isono sami esifubeni sami,

34ngoba ngisesaba ukunyeya phakathi komuzi,

ingabe ukuhlekwa ngabantu bakithi,

ngakhoke ngathula, kangizanga ngiphume endlini.

35Kungathi ngabe uNkulunkulu angangizwa!

Kungathi ngabe uSomandla uyangitshela icala lami!

Kungathi ngabe isitha sami siyaloba incwadi yecala lami!

36Ngingayithwala ehlombe lami,

ngiyibophele kimi ibe ngumqhele wami;

37ngimlandisele uNkulunkulu ngazo zonke izinyathelo zami,

ngisondele kuye njengesikhulu.

38Uba umhlaba wami ukhalile ngami,

lemifolo yawo ililile,

39uba ngidlile izithelo zawo ngingazihlawulelanga,

ngabulala abanini bawo,

40kakuhlume ameva endaweni yamabele,

lokhula olubi endaweni yebhali.

Amazwi kaJobe asephelile.