Jer 16 - Ndebele Bible (iBhayibhili Elingcwele) 1978

INkosi izakutshaya abakoJuda

1Ilizwi leNkosi lafika kimi lisithi:

2Ungathathi umfazi, ungabi lamadodana lamadodakazi kulindawo.

3Ngoba iNkosi ithi mayelana lamadodana lamadodakazi azalelwe kulindawo, langabonina laboyise ababazalele kulelilizwe:

4Bazabulawa yikufa okwesabekayo; kabayikulilelwa, futhi kabayikungcwatshwa; bazakuba njengamalongwe emhlabathini. Bazabhujiswa yimpi layindlala, lezidumbu zabo zibe yikudla kwenyoni zaphezulu lenyamazana zeganga.

5INkosi ithi: Ungangeni endlini yesililo, ungayi esililweni ukubakhalela; ngoba ngikususile ukuthula kwami kulababantu, lothando lwami olungapheliyo kanye lesihawu, kutsho iNkosi.

6Bazakufa bonke abakhulu labancinyane kulindawo; kabayikungcwatshwa, futhi kakulamuntu ozakubalilela kumbe azisike, loba agele ikhanda lakhe ngenxa yabo.

7Kakho ozakubanika abalilayo isinkwa ukubaduduza ngenxa yabafileyo; futhi kakho ozamnathisa inkezo yokududuza ngoyise langonina.

8Kawuyikungena endlini yedili ukuba uhlale labo, udle unathe.

9Ngoba iNkosi yamabandla, uNkulunkulu kaIsrayeli, ithi: Ensukwini zenu, phambi kwenu, ngizakwenza ukuba umsindo wokuthokoza uphele kulindawo, lowokujabula, lelizwi lomyeni lelomlobokazi.Jer 7:34; 25:10; Isam 18:23

10Kuzakuthi lapho ubatshela lababantu wonke lamazwi, bathi kuwe: INkosi ikhulumelani konke lokhu okubi okukhulu ngathi na? Ububi bethu buyini? Yisiphi isono esisenze eNkosini uNkulunkulu wethu na?

11Wena uthi kibo: Kungoba okhokho benu bangitshiyile, kutsho iNkosi; baye kwabanye onkulunkulu, babasebenzela, babakhonza, bangitshiya mina, kabawugcinanga umlayo wami;

12langoba lina lenze okubi ukwedlula okhokho benu; ngoba lonke lilandela inkani yenhliziyo zenu ezimbi, liyala ukungilalela.

13Ngalokhoke ngizaliphosela ngaphandle kwalelilizwe, liye elizweni elingalazanga lina lokhokho benu; kulapho lizasebenzela abanye onkulunkulu emini lebusuku, ngoba mina kangiyikulihawukela.

14Ngakhoke insuku zizakufika, kutsho iNkosi, lapho kungasayikuthiwa: Ngifunga iNkosi eyabakhupha abakoIsrayeli elizweni laseGibithe;

15kodwa kuzakuthiwa: Ngifunga iNkosi eyabakhupha abakoIsrayeli elizweni lasenyakatho lasemazweni ababexotshelwe kiwo. Ngoba ngizababuyisa elizweni lakibo engalinika okhokho babo.

16Khangelani, ngiyathumela abagoli benhlanzi abanengi, bababambe, kutsho iNkosi; emva kwalokho ngizathumela abazingeli abanengi, babazingele entabeni zonke, lasemaqaqeni wonke, babakhuphe ezimbalwini zamatshe zonke.

17Ngoba ngiyazibona zonke indlela zabo; kazifihlakalanga kimi, lobubi babo kabucatshanga emehlweni ami.

18Ngizaphindisela ngokuphindiweyo ububi babo lezono zabo, ngoba balingcolisile ilizwe lami ngezidumbu zezithombe zabo ezinengekayo, bagcwalisa ilizwe lami ngamanyala abo.

19Nkosi, wena ongamandla ami lenqaba yami,

isiphephelo sami ngosuku lokuhlupheka,

izizwe zizakufika kuwe zivela emikhawulweni yomhlaba, zithi:

Okhokho bethu badlile ilifa lamanga kuphela,

izinto ezingelamsebenzi ezingasizi lutho.

20Kambe umuntu angazenzela onkulunkulu na?

Labo kabayisibo onkulunkulu.

21Ngakhoke ngizabatshengisa lokhu,

ngalesisikhathi ngizabazisa amandla ami lobukhulu bami,

bazakwazi ukuthi ngiyiNkosi.