Hubo 39 - Ndebele Bible (iBhayibhili Elingcwele) 1978

Ukuphila komuntu kuyadlula

1Ngathi: Ngizakuqaphelisa izindlela zami,

ukuba ngingoni ngolimi lwami;

ngizakunqanda umlomo wami

lapho omubi ekhona phambi kwami.

2Ngathula ngathi zwi;

ngathula, kakwaze kwasiza lutho;

ukuhlupheka kwami kwakhula,

3inhliziyo yami yavutha phakathi kwami,

yavutha njengomlilo ngisacabanga;

ngasengikhuluma ngolimi lwami,

4ngathi: Nkosi, ngitshengisa ukuphela kwami

lensuku zami ukuba zingakanani,

ukuba ngazi ukuthi ukuphila kwami kuyadlula.

5Khangela, insuku zami wazenza zaba ngangobubanzi besandla,

lensuku zokuphila kwami kazisilutho kuwe;

impela ilowo lalowomuntu ungumoya nje.

6Umuntu uhamba njengesithunzi nje;

uyahlupheka ngeze;

ubutha imfuyo,

kodwa kazi ukuthi ngubani ozakuyidla.

7Phoke, Nkosi, ngingathembani na?

Ithemba lami likuwe.

8Ngikhulula kuzo zonke iziphambeko zami.

Ungangenzi ngibe yinhlekisa yezithutha.

9Ngiyathula, kangivuli umlomo wami,

ngoba nguwe okwenzileyo.

10Ungabe usangitshaya,

ngoba ngibulewe yizidutshulo zesandla sakho.

11Lapho ulaya umuntu umkhuza ngenxa yesono,

okuligugu kuye uyakuqeda njengenondo;

impela ilowo lalowomuntu ungumoya nje.

12Zwana ukukhuleka kwami, Nkosi,

ulalele ukucela kwami;

ungathuli ngezinyembezi zami,

ngoba ngiyisethekeli sakho lesihambi

njengabo bonke okhokho.

13Ungangihwaqeli ukuze ngijabule,

ngingakasuki lapha, ngingabe ngisaba khona.