Jer 25 - Ndebele Bible (iBhayibhili Elingcwele) 1978

Ilizwe lakoJuda lizakuba yinkangala okweminyaka engamatshumi ayisikhombisa

1Ilizwi leNkosi elafika kuJeremiya ngabantu bonke bakoJuda, emnyakeni wesine kaJehoyakimi indodana kaJosiya, inkosi yakoJuda — ngomnyaka wokuqala kaNebukadineza, inkosi yaseBabiloni — 2 Kho 24:1; 2 Lan 36:5–7; Dan 1:1–2

2ilizwi alikhulumayo uJeremiya umprofethi kubo bonke abantu bakoJuda labo bonke abakhileyo eJerusalema esithi:

3Sekuyiminyaka engamatshumi amabili lantathu, kusukela emnyakeni wetshumi lantathu wokubusa kukaJosiya indodana kaAmoni, inkosi yakoJuda, kuze kube lamuhla, ilizwi leNkosi lifikile kimi, ngalikhuluma kini njalonjalo, kodwa kalilalelanga.

4Kalilalelanga, kalizwanga lanxa iNkosi iphikelela ukuthumela kini zonke inceku zayo abaprofethi,

5lapho kuthiwa: Phendukani, lina lonke, ezindleleni zenu ezimbi lasekwenzeni kwenu okubi, lihlale elizweni iNkosi elinike lona lina lokhokho benu kusukela endulo kuze kube nininini,

6lingalandeli abanye onkulunkulu ukubasebenzela lokubakhonza, ukuba lingivuse ulaka ngezithombe elizenzileyo. Kangiyikulenzela okubi.

7Kodwa kalingilalelanga, kutsho iNkosi, ukuba lingivuse ulaka ngezithombe zenu, ukuba lehlelwe ngokubi.

8Ngakho iNkosi yamabandla ithi: Ngenxa yokuba lingawalalelanga amazwi ami,

9ngizabiza izizwe zasenyakatho, kutsho iNkosi, loNebukadineza inkosi yaseBabiloni inceku yami, ngizilethe kulelilizwe lakwabakhileyo kulo, lakuzo zonke izizwe eziseduze lalo, ngibabhubhise, ngibenze babe yinto eyesabekayo, into yokuncifelwa, lehlazo elingapheliyo.

10Ngizaqeda phakathi kwabo umsindo wokuthokoza lowokujabula, lelizwi lomyeni lelomlobokazi, lomsindo wokuchola kwelitshe, lokukhanya kwesibane.Jer 7:34; 16:9; Isam 18:22–23

11Ilizwe lonke leli lizakuba ngamanxiwa lenkangala; lezizizwe zizasebenzela inkosi yaseBabiloni iminyaka engamatshumi ayisikhombisa.2 Lan 36:21; Jer 29:10; Dan 9:2

12Ngemva kweminyaka engamatshumi ayisikhombisa ngizatshaya inkosi yaseBabiloni lesizwe sayo, ngenxa yobubi babo, kutsho iNkosi, ngilenze ilizwe lamaKaladiya libe yinkangala kokuphela,

13ngehlisele phezu kwalelolizwe amazwi wonke engawakhuluma ngalo, lakho konke okulotshiweyo kulolugwalo okwatshunyayelwa nguJeremiya ngazo zonke izizwe.

14Ngoba izizwe ezinengi lamakhosi amakhulu zizakubenza babe yizigqili; ngizaphindisela kibo njengokufanele izenzo zabo lemisebenzi yabo.

Inkezo yewayini egcwele ulaka lweNkosi

15INkosi, uNkulunkulu kaIsrayeli, yathi kimi: Yamukela esandleni sami linkezo yewayini egcwele ulaka lwami, unathise ngayo zonke izizwe engi kuthuma kuzo.

16Zizakunatha zidakwe, zihlanye ngenxa yempi engiyithumela phakathi kwazo.

17Ngasengiyamukela inkezo esandleni seNkosi, nganathisa ngayo zonke izizwe iNkosi engithume kizo,

18ngitsho iJerusalema lemizi yakoJuda, amakhosi alo lezikhulu zalo, ukuba kuchitheke, kube yinkangala, lento yokuncifelwa leyokuthukwa, njengoba kunjalo lalamhla;

19loFaro inkosi yaseGibithe, lenceku zakhe, lezikhulu zakhe, labantu bakhe bonke,

20kanye labo bonke abezizwe abaphakathi kwabo, lamakhosi wonke aselizweni leUzi, lawelizwe leFilistiya — eAshikeloni leGaza leEkroni lengcosana eAshidodi —

21iEdoma leMowabi, lamaAmoni,

22wonke amakhosi aseTire lawaseSidoni, lamakhosi asemazweni angasolwandle,

23eDedani leTema leBuzi, labo bonke abagela inwele zabo emaceleni,

24lamakhosi wonke aseArabiya, lamakhosi ezizwe ezixubeneyo ezihlala enkangala,

25lamakhosi wonke aseZimri, lawaseElamu lawaseMede,

26lawo wonke amakhosi asenyakatho akhatshana laseduze ngokulandelana, lemibuso yonke yomhlaba ekhona emhlabeni. Ngemva kwabo inkosi yaseBabiloni izakunatha.

27Ubususithi kibo: INkosi yamabandla, uNkulunkulu kaIsrayeli, ithi: Nathani lidakwe, lihlanze, liwe, lingaphindi livuke futhi, ngenxa yempi engiyithumela phakathi kwenu.

28Kuzakuthi lapho besala ukuyamukela inkezo esandleni sakho, ukuba banathe, uthi kibo: INkosi yamabandla ithi: Limele ukunatha impela.

29Ngoba sengiqalile ukwenza okubi emzini lapho ibizo lami lidunyiselwa khona; lizayekelwa ukutshaywa na? Atshi, kaliyikuyekelwa, ngoba ngibiza impi ezabehlela bonke abakhileyo emhlabeni, kutsho iNkosi.

30Ngakhoke wena uzatshumayela kibo wonke lamazwi engikutshela wona, uthi:

INkosi izakuduma iphezulu,

iliphumise ilizwi layo endlini yayo engcwele;

izakuduma kakhulu phezu kwesibaya sayo,

imemeze njengalabo abakhama izithelo zevini,

kubo bonke abakhileyo emhlabeni.

31Umsindo uzafinyelela emikhawulweni yomhlaba,

ngoba iNkosi iyamelana lezizwe,

iyabagweba bonke abantu,

ababi izakubanikela ekubulaweni, kutsho iNkosi.

32INkosi yamabandla ithi:

Khangelani, ububi buphuma kwesinye isizwe busiya kwesinye,

isiphepha esikhulu siyavunguza, sisuka endaweni ezikhatshana zomhlaba.

33Ngalolosuku ababulewe yiNkosi bazasukela komunye umkhawulo womhlaba baze bafike komunye; kabayikukhalelwa, kabayikubuthwa bangcwatshwe, bazakuba ngamalongwe emhlabathini.

34Lilani, lina belusi, likhale,

zibhuqeni emlotheni, lina zikhulu zomhlambi,

ngoba insuku zokuhlatshwa kwenu lezokuhlakazeka sezifikile,

lizakuwa njengenqama ezinhle.

35Abelusi kabayikuba lesiphephelo,

lezikhulu zomhlambi kaziyikuphunyuka.

36Zwanini ukukhala kwabelusi lokulila kwezikhulu zomhlambi:

ngoba iNkosi izachitha idlelo labo,

37lezibaya ezilokuthula zidilikile,

ngenxa yokuvutha kolaka lweNkosi.

38Iphumile esikhundleni sayo njengesilwane,

ngoba ilizwe labo seliyikangala ngenxa yabachithi,

langenxa yolaka lwayo oluvuthayo.