Seb 16 - Ndebele Bible (iBhayibhili Elingcwele) 1978

UPawuli useAsiya

1Waya wafika eDerbe laseListra. Kwakukhona lapho umfundi othiwa nguTimothi, indodana yowesifazana ongumJuda okholwayo, kodwa uyise wayengumGriki;

2wayenconywa ngabazalwane baseListra laseIkoniyuma.

3UPawuli wathanda ukuba uTimothi ahambe laye; ngakho wamthatha, wamsoka ngenxa yabaJuda ababekhona kulezondawo; ngoba bonke babemazi ukuthi uyise ungumGriki.

4Kwathi bedabula imizi, babanika izigqibo ezagqitshwa ngabaphostoli labadala eJerusalema ukuba bazilondoloze.

5Ngakhoke amabandla aqiniswa ekukholweni, anda ngobunengi insuku ngensuku.

UPawuli uwelela eMakedoniya

6Basebedabula ilizwe laseFrigiya lelaseGalathiya, balelwa nguMoya oNgcwele ukukhuluma ilizwi eAsiya.

7Sebefikile maqondana leMisiya, balinga ukuya eBithiniya, kodwa uMoya kaJesu kabavumelanga.

8Ngakho bayiceza iMisiya, behlela eTrowasi.

9Kwabonakala kuPawuli umbono ebusuku; indoda yaseMakedoniya yayimi imncenga isithi: Welela eMakedoniya, usisize.

10Esewubonile umbono, safuna masinyane ukuwelela eMakedoniya, sisithi uNkulunkulu usibizele ukutshumayela ivangeli kibo.

UPawuli utshumayela eFiliphi

11Ngakho sasuka eTrowasi ngomkolo, saqonda eSamotrake, ngosuku olulandelayo saya eNeyapholi.

12Sasuka lapho saya eFiliphi, umuzi omkhulu wesigaba saseMakedoniya; lapho kwakuhlala amabutho amaRoma. Kulowomuzi sahlala insuku ezithile.

13Ngosuku lweSabatha saphumela ngaphandle kwesango lomuzi ngasemfuleni, lapho esasisithi kulendawo yokukhuleka khona; sahlala phansi, sakhuluma labesifazana ababebuthene lapho.

14Owesifazana othile othiwa nguLidiya, ongumthengisi wamalembu ayibubende, owemzini othiwa yiTiyathira, okhonza uNkulunkulu, wasizwa, iNkosi yavula inhliziyo yakhe ukuba alalele okwakhulunywa nguPawuli.

15Kuthe esebhaphathiziwe kanye lendlu yakhe, wasincenga esithi: Uba lingibona ukuthi ngithembekile eNkosini, wozani endlini yami lihlale khona. Wasicindezela.

Ukubotshwa kukaPawuli

16Kwathi sisiya endaweni yokukhuleka, sahlangana lentombazana eyisigqili elomoya wokuhlahluba, eyayizuzela abaniniyo inzuzo enengi ngokuvumisa.

17Yona yamlandela uPawuli lathi, isithi: Lababantu bazinceku zikaNkulunkulu oPhezukonke ezisitshumayeza indlela yokusiliswa.

18Lokhu yakwenza insuku ezinengi. Kwathi uPawuli esenengiwe waphenduka, wathi kumoya: Ngiyakulaya ngebizo likaJesu Kristu, phuma kuyo. Wahle waphuma ngalesosikhathi.

19Abaniniyo sebebonile ukuthi ithemba lenzuzo yabo liphelile, babamba uPawuli loSilasi, babadonsela emdangeni bababeka phambi kwababusi.

20Sebebalethile enduneni, bathi: Lababantu bengabaJuda badunga umuzi wethu;

21bafundisa imikhuba esingavunyelwa ukuyamukela, siyenze thina esingamaRoma.

22Lexuku labelekelela, lenduna zabadabulela ingubo zabo, zalaya ukuba batshaywe ngenduku;

23sebebatshayile imivimvinya eminengi, babaphosa entolongweni, balaya umlindintolongo ukuba abalondoloze.

24Yena elayiwe ngokunjalo wabafaka entolongweni ephakathi, wabophela inyawo zabo ezigodweni.

Ukuphenduka komlindintolongo

25Kodwa phakathi kobusuku uPawuli loSilasi babekhuleka bedumisa uNkulunkulu ngamahubo, lezibotshwa zazibalalele.

26Kwathi masinyane kwaba khona ukuzamazama okukhulu, kwaze kwanyikinyeka izisekelo zentolongo; kwavuleka masinyane iminyango yonke, kwathukuluka lezibopho zabo bonke.

27Kwathi umlindintolongo ephaphama, wabona iminyango yentolongo ivulekile; wakhokha umhedla wakhe efuna ukuzibulala, ngoba esithi izibotshwa zibalekile.

28Ngakho uPawuli wamemeza ngelizwi elikhulu, wathi: Ungazilimazi, ngoba sikhona sonke.

29Wasebiza ukuba kulethwe izibane, wagijimela phakathi ethuthumela ngokwesaba, wawela phansi phambi kukaPawuli loSilasi.

30Wasebakhuphela phandle, wathi: Madoda, ngenzeni ukuze ngisiliswe na?

31Bona bathi kuye: Kholwa eNkosini uJesu, uzakusiliswa wena lendlu yakho.

32Basebemtshumayeza ilizwi leNkosi, yena labo bonke ababesendlini yakhe.

33Wabathatha ngalesosikhathi sobusuku, wagezisa amanxeba abo, wabhaphathizwa khona lapho labo bonke abendlu yakhe.

34Wasebesa endlini yakhe, wabeka ukudla phambi kwabo, wathokoza kanye lendlu yakhe yonke ngokukholwa kuNkulunkulu.

35Kwathi sekusile, induna zathumela amanxusa zisithi: Khululani labobantu bahambe.

36Umlindintolongo wabikela uPawuli lawomazwi esithi: Induna zithumele ukuba likhululwe. Ngakhoke phumani, lihambe ngokuthula.

37Kodwa uPawuli wathi kubo: Basitshayile obala singalahlwanga licala, thina singamaRoma, basiphosela entolongweni; khathesi sebefuna ukusikhulula ngensitha na? Atshi, kabeze bona, basikhuphe.

38Amanxusa azibikela izinduna lawomazwi. Zona zesaba sezisizwa ukuba bangamaRoma.

39Ngakho zeza zabancenga; zabakhupha, zabacela ukuba baphume emzini.

40Ngakho basebephuma entolongweni, bangena koLidiya; kwathi sebebabonile abazalwane, bakhuluma amazwi okubaqinisa, basuka bahamba.