Jer 11 - Ndebele Bible (iBhayibhili Elingcwele) 1978

UJeremiya lesivumelwano

1Ilizwi leNkosi elafika kuJeremiya lathi:

2Zwana amazwi alesisivumelwano, ukhulume ebantwini bakoJuda labaseJerusalema.

3Uthi kibo: INkosi, uNkulunkulu kaIsrayeli, ithi: Uqalekisiwe umuntu ongalaleli amazwi alesisivumelwano,

4engalaya ngawo okhokho benu lapho ngibakhupha elizweni laseGibithe, esithandweni sokuncibilikisa insimbi, ngathi: Lalelani ilizwi lami, lenze konke engilitshela khona, libe ngabantu bami, lami ngibe nguNkulunkulu wenu,

5ukuba ngigcwalise isifungo engasifunga kubokhokho benu ukubanika ilizwe eligcwele uchago lenyosi, njengoba kunjalo lalamhla. Ngasengiphendula ngisithi: Yebo, Nkosi.

6INkosi yathi kimi: Tshumayela wonke lamazwi emizini yakoJuda lasezindleleni zaseJerusalema, uthi: Zwanini amazwi alesisivumelwano, liwagcine.

7Ngoba ngabalayisisa okhokho benu ekubakhupheni kwami eGibithe, ngisalilaya lalamhla ngisithi: Lalelani ilizwi lami.

8Kodwa kabezwanga, kabalalelanga; kodwa benza kwaba yilowo lalowo ngokwenkani yenhliziyo yakhe. Ngasengisehlisela phezu kwabo wonke lamazwi alesisivumelwano engabalaya ukuwagcina, kodwa kabawagcinanga.

9INkosi yabuya yathi kimi: Kukhona ukuhlamuka phakathi kwabantu bakoJuda labakhileyo eJerusalema.

10Sebebuyele ebubini babokhokho babo abala ukuzwa ilizwi lami; balandela abanye onkulunkulu ukuba babakhonze; indlu yakoIsrayeli leyakoJuda zisaphulile isivumelwano sami engasenza lokhokho babo.

11Ngakhoke ngizabehlisela okubi, kabayikukuphepha; lanxa bekhala kimi, kangiyikubalalela, kutsho iNkosi.

12Imizi yakoJuda labaseJerusalema bangahamba bayekhala kubonkulunkulu ababatshisela impepha, kodwa kabayikubasiza ngesikhathi sokuhlupheka kwabo.

13Ngoba onkulunkulu bakho banengi njengemizi yakho, wena Juda, lamaaltare owakhele into elehlazo manengi njengezindlela zeJerusalema amaaltare okutshisela uBali impepha.

14Ngakhoke ungabakhulekeli lababantu, ungaphakamisi ilizwi lakho ukuba ubakhulekele, ngoba kangiyikubalalela mhla bekhale kimi ngesikhathi sokuhlupheka kwabo.

15Othandekayo wami ufunani endlini yami lokhu wenza okubi na? Izifungo lenyama yemihlatshelo kungakuvikela yini ekuhluphekeni okuzayo na? Ungathokoza ngakho na?

16INkosi yake yakubiza ngokuthi: Uyisihlahla seoliva esiluhlaza, esilezithelo ezinhle; kodwa ngomdumo wesiphepha esikhulu izakusithungela ngomlilo lengatsha zaso zitshiswe.

17INkosi yamabandla eyakuhlanyelayo ikhulumile okubi ngawe, ngenxa yobubi obenziwe yindlu yakoIsrayeli leyakoJuda, bangicunula ngokutshisela uBali impepha.

Icebo lokubulala uJeremiya

18INkosi yangitshengisa, lami ngakwazi.

Wena wangitshengisa izenzo zabo ezimbi.

19Kodwa mina nganginjengewundlu elasiwa ekuhlatshweni.

Ngangingazi ukuba benza amacebo amabi ngami besithi:

Asisiqume isihlahla sisemanzi;

asimsuse elizweni labaphilayo,

lebizo lakhe lingabe lisaziwa.

20Kodwe, Nkosi yamabandla, owahlulela ngokulunga,

ohlolayo inhliziyo lengqondo,

kangibone ukuphindisela kwakho kibo,

ngoba nginikele indaba yami kuwe.

21Ngakhoke iNkosi ithi ngabantu baseAnathothi abafuna ukuphila kwakho besithi: Ungatshumayeli ngebizo leNkosi funa sikubulale;

22iNkosi yamabandla ithi: Ngizabatshaya; insizwa zabo zizabulawa empini, amadodana lamadodakazi abo abulawe yindlala;

23kakuyikusala muntu; ngoba ngizabehlisela okubi abantu baseAnathothi ngomnyaka wokutshaywa kwabo.