Dute 26 - Ndebele Bible (iBhayibhili Elingcwele) 1978

Izithelo zokuqala

1Kuzakuthi lapho usufikile elizweni iNkosi uNkulunkulu wakho ekunika lona ukuba libe ngelakho, usuwakhile kulo,

2uthathe ingxenye yezithelo zonke zokuqala zomhlaba ozakuzivuna elizweni lakho iNkosi uNkulunkulu wakho ekunika lona, uyifake esitsheni, uye endaweni iNkosi uNkulunkulu wakho ezakuyikhetha ukuba idunyiselwe kiyo.Eks 23:19

3Uzakuya kumpristi ozakuba ekhona ngalesosikhathi uthi kuye: Ngiyabika eNkosini uNkulunkulu wakho lamuhla ukuthi sengifikile elizweni iNkosi eyafunga kubokhokho bethu ukusinika lona.

4Umpristi uzakwamukela isitsha esandleni sakho, asibeke phambi kwealtare leNkosi uNkulunkulu wakho.

5Wena uzakutsho phambi kweNkosi uNkulunkulu wakho uthi: Ubaba wayengumAramu ozulayo, wehlela eGibithe, wahlala khona labantu abalutshwana; lapho waba yisizwe esikhulu esilamandla, esilabantu abanengi.

6AmaGibithe asiphatha kubi, asihlupha, asiphatha ngobugqili obunzima.

7Sasesikhala eNkosini uNkulunkulu wabokhokho; yalizwa ilizwi lethu, yabona ukuhlupheka kwethu, lokutshikatshika kwethu, lokucindezelwa kwethu;

8yasikhupha eGibithe ngesandla esilamandla lengalo elamandla, langezenzo ezesabekayo, langezibonakaliso lezimangaliso;

9yasiletha kulindawo, yasinika lelilizwe eligcwele uchago lenyosi.

10Khathesi ngiyaletha izithelo zokuqala zomhlaba onginike wona, Nkosi. Uzasibeka phansi isitsha phambi kweNkosi uNkulunkulu wakho, uyidumise;

11uthokoze ngakho konke okuhle iNkosi uNkulunkulu wakho ekunike khona wena labendlu yakho, uthabe kanye lomLevi lowemzini ohlala lawe.

Okwetshumi

12Lapho usuqedile ukunika okwetshumi kwezithelo zakho ngomnyaka wesithathu, ongumnyaka wokunika okwetshumi, usukunike umLevi lowemzini lentandane lomfelwakazi ukuba badle basuthe emizini yakho,Dute 14:28, 29

13uzakuthi phambi kweNkosi uNkulunkulu wakho: Sengikhuphile endlini yami okwetshumi okwahlukaniselwa wena, ngakunika lowemzini lentandane lomfelwakazi njengayo yonke imilayo yakho ongitshele yona; kangiweqanga lowodwa umlayo wakho, futhi kangiyikuyikhohlwa.

14Kangidlanga lokukodwa okwetshumi lapho bengilila, kangikuthathanga lapho bengingcolile, kangikunikelanga kofileyo; ngililalele ilizwi leNkosi uNkulunkulu wami, ngenzile njengokungilaya kwakho.

15Khangela phansi usendaweni yakho engcwele esezulwini, ubusise abantu bakho uIsrayeli lomhlaba osinike wona, njengokufunga kwakho kubokhokho bethu, ilizwe eligcwele uchago lenyosi.

Abantu abangcwele beNkosi

16Lamhla iNkosi uNkulunkulu wenu iyalilaya ukuba lenze lezizimiso lezahlulelo; ngakhoke zigcineni kuhle ngenhliziyo yenu yonke langomphefumulo wenu wonke.

17Lamhla livumile ukuthi iNkosi inguNkulunkulu wenu, lokuthi lizakuhamba endleleni zayo, ligcine izimiso zayo lemilayo yayo lezahlulelo zayo, lilalele ilizwi layo.

18Futhi iNkosi ilamukele lamhla ukuthi lina lingabantu abaligugu layo njengokulithembisa kwayo, lokuthi lifanele ukugcina yonke imilayo yayo,Eks 19:5; Dute 4:20; 7:6; 14:2; Tit 2:14; 1 Pet 2:9

19ukuba iliphakamise phezu kwezizwe zonke ezenzileyo ngokubongwa, langodumo langokudunyiswa, libe ngabantu abangcwele eNkosini uNkulunkulu wenu njengokutsho kwayo.