Roma 15 - Ndebele Bible (iBhayibhili Elingcwele) 1978

1Thina esilamandla sifanele ukuthwala ubuthakathaka babangelamandla, singazithokozisi thina.

2Yilowo lalowo wethu kathokozise umakhelwana wakhe, amenzele okuhle lokuzakumakha.

3Ngoba uKristu kazithokozisanga yena, kodwa kunjengokuba kulotshiwe ukuthi: Ukuthuka kwabakuthukayo kwehlela phezu kwami.

4Ngoba konke okwalotshwa ngaphambili kwalotshelwa ukufundiswa kwethu, ukuze ngokubekezela langenduduzo yemibhalo sibe lethemba.

5Kungathi uNkulunkulu wokubekezela lenduduzo angalipha ukuba libe nhliziyonye njengoKristu Jesu,

6ukuze nganhliziyonye lomlomo munye limdumise uNkulunkulu uYise weNkosi yethu uJesu Kristu.

7Ngakhoke yamukelanani njengalokhu uKristu wasamukela, ukuze kudunyiswe uNkulunkulu.

8Ngoba ngithi uKristu waba yinceku yabasokileyo ukubonakalisa iqiniso likaNkulunkulu, ukuba aqinise izithembiso ezanikwa okhokho,

9lokuba abezizwe bamdumise uNkulunkulu ngenxa yesihawu sakhe; njengokulotshiweyo ukuthi:

Ngakhoke ngizakukudumisa phakathi kwabezizwe ngihubele ibizo lakho.

10Lokuthi:

Thokozani lina bezizwe kanye labantu bakhe.

11Lokuthi:

Dumisani iNkosi lina bezizwe lonke;

abantu bonke kabayidumise.

12Futhi uIsaya uthi:

Kuzakuba khona impande kaJese,

yena owaphakanyiswa ukubusa abezizwe,

abezizwe bazakuthembela kuye.

13Kungathi uNkulunkulu wethemba angaligcwalisa ngentokozo yonke langokuthula konke ekukholweni kwenu, ukuze ngamandla kaMoya oNgcwele likhule ethembeni.

UPawuli uchasisa umsebenzi wakhe

14Mina ngokwami nganelisiwe ngani, bazalwane, ukuthi lina ligcwele okuhle, ligcwalisiwe yikwazi konke, lilamandla futhi okwelulekana.

15Kodwa ngililobele ngesibindi ukulikhumbuza ngezinto ezinye ngenxa yomusa engiwuphiweyo nguNkulunkulu,

16wokuba ngibe yisikhonzi sikaKristu Jesu kwabezizwe, ngikhonze ngevangeli likaNkulunkulu njengompristi, ukuze ukunikela kwami abezizwe kwamukeleke, kwenziwe kube ngcwele nguMoya oNgcwele.

17Ngakhoke kuKristu Jesu ngilokuzincoma ngomsebenzi wami engiwenzela uNkulunkulu.

18Kangilasibindi sokukhuluma ngolutho, kuphela ngezinto uKristu azisebenza ngami ukuze kube khona ukulalela kwabezizwe ngelizwi langesenzo,

19langamandla ezibonakaliso lezimangaliso, langamandla kaMoya oNgcwele. Ngalokho ngitshumayele ivangeli likaKristu ngokupheleleyo kusukela eJerusalema kwaze kwafika eIliriku.

20Ngokunjalo ngiqonde ukutshumayela ivangeli lapho angakaziwa khona uKristu, ukuze ngingakhi phezu kwesisekelo somunye;

21kodwa njengokulotshiweyo ukuthi:

Abangatshelwanga ngaye bazakubona,

labangezwanga bazakuqedisisa.UPawuli ukhuluma ngokuya eRoma

22Ngenxa yalokho ngavinjelwa kanengi ukuza kini.Roma 1:13

23Kodwa khathesi, lokhu ngingaselandawo kulamazwe, futhi sekuyiminyaka eminengi ngilangatha ukuza kini,

24ngizadlula kini lapho ngisiya eSpaniya; ngoba ngithemba ukuthi ngizakulibona ekudluleni kwami, lokuthi, sengithokozile kanye lani okwesikhatshana, lizakungidlulisela phambili ukuya eSpaniya.

25Kodwa khathesi, ngisaya eJerusalema ukusa okokusiza abangcwele.1 Kor 16:1–4

26Ngoba kwaba kuhle kwabaseMakedoniya labaseAkaya ukwenzela abayanga kwabangcwele baseJerusalema umnikelo othile.

27Yebo, kwaba kuhle kibo; ngoba lembala balomlandu kibo; ngoba uba abezizwe behlanganyela kanye labo ezintweni zabo zokomoya, abezizwe balomlandu futhi wokubasebenzela ezintweni zokomzimba.1 Kor 9:11

28Ngakho nxa sengikuqedile lokhu, ngibanikile leziphiwo, ngizakusuka ngiye eSpaniya, ngidlule ngakini;

29ngiyazi ukuthi nxa ngisiza kini ngizakufika ngilesibusiso esipheleleyo sikaKristu.

30Ngiyalincenga, bazalwane, ngayo iNkosi yethu uJesu Kristu langothando lukaMoya, ukuba lizame kanye lami ngokungikhulekela kuNkulunkulu,

31ukuze ngiphephe kwabangakholwayo baseJudiya lokuba umsebenzi engiya ngawo eJerusalema wamukeleke kibo abangcwele,

32ukuba ngentando kaNkulunkulu ngize kini ngokuthokoza, ngivuseleleke phakathi kwenu.

33Kungathi uNkulunkulu wokuthula angaba lani lonke. Ameni.