Hubo 145 - Ndebele Bible (iBhayibhili Elingcwele) 1978

Ukubonga iNkosi ngobukhulu bayo langesihawu sayo

1Ngizakukudumisa wena, Nkulunkulu wami leNkosi yami,

ngibonge ibizo lakho kuze kube nininini.

2Insuku zonke ngizakukubonga,

ngidumise ibizo lakho kuze kube nini lanini.

3INkosi yinkulu, ifanele ukudunyiswa kakhulu,

lobukhulu bayo bungehlolisiswe.

4Esinye isizukulwana sizakubabaza imisebenzi yakho kwesinye,

sitshumayele imisebenzi yakho elamandla.

5Ngizakunakana ngodumo lwakho lobukhosi bakho,

langemisebenzi yakho emangalisayo.

6Abantu bazakutshumayela amandla ezenzo zakho ezesabekayo,

mina ngibabaze ubukhulu bakho.

7Bazakwandisa udumo lokulunga kwakho okukhulu,

bahlabele kakhulu ngokulunga kwakho.

8INkosi ilomusa lesihawu,

iyaphuza ukuthukuthela, igcwele uthando olungapheliyo.

9INkosi ilungile kubo bonke,

lesihawu sayo siphezu kwakho konke ekwenzayo.

10Imisebenzi yakho yonke izakukudumisa, Nkosi,

labangcwele bakho bazakukubonga.

11Bazakukhuluma ngobukhosi bombuso wakho,

balandise ngamandla akho,

12ukuba bazise abantu izenzo zakho zamandla,

lobukhulu bobukhosi bombuso wakho.

13Umbuso wakho ungumbuso ongapheliyo,

lobukhosi bakho bumi kuzo zonke izizukulwana.

INkosi ithembekile emazwini ayo wonke,

igcwele umusa ezenzweni zayo zonke.

14INkosi iyabasekela bonke abawayo,

ibavuse bonke asebewile.

15Amehlo abo bonke akhangele kuwe,

uyabanika ukudla kwabo ngesikhathi esifaneleyo.

16Wena uvula isandla sakho,

ukholise ukufisa kwezinto zonke eziphilayo.

17INkosi ilungile endleleni zayo zonke,

ilomusa ekwenzeni kwayo konke.

18INkosi iseduze labo bonke abakhuleka kuyo,

bonke abakhuleka kuyo ngeqiniso.

19Iyakholisa isifiso sabo bonke abayesabayo;

iyezwa lokukhuleka kwabo, ibakhulule.

20Inkosi iyabalondoloza bonke abayithandayo;

kodwa ababi izakubabhubhisa.

21Umlomo wami uzayidumisa iNkosi,

labantu bonke kababonge ibizo layo elingcwele kuze kube nininini.