Isa 37 - Ndebele Bible (iBhayibhili Elingcwele) 1978

Ukukhululwa kwelizwe lakoJuda

1Kwathi lapho inkosi uHezekiya isizwile, yadabula izigqoko zayo, yagqoka isambatho sokulila, yangena ethempelini leNkosi.2 Kho 19:1–37

2Yamthuma oEliyakimi owayengumgcini wesigodlo, loShebina umabhalane, labapristi abadala, begqoke izambatho zokulila ukuya kumprofethi uIsaya indodana kaAmozi.

3Bathi kuye: UHezekiya uthi: Lolu lusuku lokuhlupheka lolokusolwa lolwehlazo; sinjengowesifazana osezabeletha, kodwa ongaselamandla okubeletha.

4Mhlawumbe iNkosi, uNkulunkulu wakho, iwezwile amazwi enceku enkulu ethunywe yinkosi yayo yaseAsiriya ukuba iklolodele uNkulunkulu ophilayo, lokuthi izakukukhuza yona iNkosi uNkulunkulu wakho lokhu ekuzwileyo. Ngakhoke ake ukhulekele ingcosana eseleyo.

5Kwathi inceku zenkosi uHezekiya sezifikile kuIsaya,

6yena wathi kuzo: Liyitshele inkosi yenu ilizwi leNkosi uNkulunkulu lisithi: Ungesabi ngenxa yamazwi owezwileyo, ezingithuke ngawo inceku zenkosi yaseAsiriya.

7Ngizafaka umoya enkosini yaseAsiriya ukuba izwe amahungahunga, ibisibuyela elizweni layo; ngizayenza ukuba ibulawe ngomkhonto elizweni layo.

8Inceku enkulu yabuyela, yafumanisa inkosi yaseAsiriya isihlasela iLibina; yayisizwile ukuthi inkosi yaseAsiriya isisukile eLakishi.

9Kwathi lapho inkosi isizwile ukuba uTirihaka inkosi yaseEtiyopiya wayesiza ukuyihlasela, yathumela izithunywa kuHezekiya inkosi yakoJuda yathi kuye:

10Ungamvumeli uNkulunkulu wakho othembele kuye ukuba akukhohlise ngokukuthembisa ukuthi iJerusalema kaliyikunikelwa esandleni senkosi yaseAsiriya.

11Usuzwile ukuthi amakhosi aseAsiriya enzeni kuwo wonke amazwe, lokuthi awachithile, aphela nya. Wenake uzakukhululwa na?

12Onkulunkulu bezizwe okhokho bami abazichithayo bazikhulula yini, iGozani leHarani leRezefi, labantu baseBeti‐Edeni abahlala eTelasari na?

13Angaphi amakhosi aseHamathi leArpadi leSefavayimi leHena leIva na?

14UHezekiya wayamukela incwadi ezandleni zezithunywa, wayibala, wasuka waya ethempelini, wayichaya phambi kweNkosi.

15UHezekiya wakhuleka

16esithi: Nkosi yamabandla, Nkulunkulu kaIsrayeli ohlala ngaphezu kwamakherubi, nguwe wedwa onguNkulunkulu wayo yonke imibuso yomhlaba, wenzile izulu lomhlaba.Eks 25:22

17Akubeke indlebe yakho, Nkosi, uzwe, ukhangele, ubone; akuzwe amazwi wonke kaSenakeribi awathumileyo ukuklolodela uNkulunkulu ophilayo.

18Isibili, Nkosi, amakhosi aseAsiriya azichithile zonke izizwe lamazwe azo,

19aphosela onkulunkulu bazo emlilweni, ngoba babengesibo onkulunkulu, kodwa babengumsebenzi wezandla zabantu, beyizigodo lamatshe; ngalokhoke babhujiswa.

20Ngakhoke, Nkosi Nkulunkulu wethu, akusikhulule esandleni sakhe, ukuze yonke imibuso yomhlaba yazi ukuba wena wedwa uyiNkosi.

21UIsaya indodana kaAmozi wasethumela ilizwi kuHezekiya esithi: INkosi, uNkulunkulu wakoIsrayeli, ithi: Ngenxa yokuba ukhulekile ngoSenakeribi inkosi yaseAsiriya,

22nanti ilizwi iNkosi elikhulume ngaye:

IZiyone liyakudelela, liyakuklolodela,

iJerusalema linikina ikhanda lalo ngemva kwakho.

23Ngubani omklolodeleyo wamthuka na?

Uphakamisele bani ilizwi lakho na?

Ukhangele bani ngokuzikhukhumeza na?

NgoNgcwele kaIsrayeli.

24Uklolodele iNkosi ngezinceku zakho,

wathi: Lezinqola zami ezinengi ngikhwele ingqonga zezintaba,

ngaze ngafika ezindaweni ezikhatshana zaseLebanoni.

Ngagamula imikusu yalo emide kakhulu,

lamaphane alo amahle kakhulu.

Ngangena endaweni zalo zokucina,

lasemaguswini alo amnyama.

25Ngemba imithombo, nganatha amanzi,

nganyathela ngenyawo zami,

ngomisa yonke imifula yaseGibithe.

26Kawuzwanga yini ukuthi lokhu ngakumisa endulo na?

Ngakumisa ensukwini zasendulo lokho esengikwenza lamhla,

ukuba udilize imizi ebiyelweyo ibe ngamanxiwa.

27Abahlala kiyo sebephelelwe ngamandla,

sebedanile balenhloni,

bafana lezihlahlana egangeni lemibhida eluhlaza,

banjengotshani ezicholo zezindlu obutshazwa ngumoya wempumalanga.

28Ngiyakwazi ukusuka kwakho lokuhlala kwakho,

ngiyakwazi lokuhamba kwakho konke.

29Ngoba ungithukuthelele,

lokuziqakisa kwakho kufikile endlebeni zami,

ngizakukufaka umkhala emakhaleni akho,

lamatomu emlonyeni wakho,

ngikubuyisele ngendlela oweza ngayo.

30Lokhu kuzakuba yisibonakaliso kini; lonyaka lizakudla okuzikhulelayo; ngomnyaka wesibili lidle umkhukhuzela wakho, kuthi ngomnyaka wesithathu lihlanyele, livune, lihlanyele izivini lidle izithelo zazo.

31Abaseleyo koJuda bazagxumeka impande phansi, bathele izithelo ngaphezulu;

32ngoba kuzaphuma eJerusalema abayingcosana, lentabeni yaseZiyone ixuku labaseleyo. Ukutshisekela kweNkosi yamabandla kuzakwenza lokhu.

33Ngakhoke iNkosi ithi ngenkosi yaseAsiriya:

Kayiyikungena kulumuzi, loba itshoke umtshoko khona,

ingabe ize kuwo ilesihlangu,

yakhe umduli wokuvimbezela kuwo.

34Ngendlela eyeza ngayo izabuyela ngayo futhi,

kayiyikungena emzini lo, kutsho iNkosi.

35Ngizawuvikela lumuzi ngiwusize,

ngenxa yami langenxa yenceku yami uDavida.

36Kwasuka isithunywa seNkosi, sabulala amaAsiriya azinkulungwane ezilikhulu lamatshumi aficaminwembili lanhlanu ezihonqweni zawo. Kwathi abantu bevuka ekuseni kakhulu babona bonke laba sebeyizidumbu kuphela.

37USenakeribi inkosi yaseAsiriya wasesuka ebuyela ekhaya, wahlala eNineve.

38Kwathi lapho ekhonza endlini kaNisiroki unkulunkulu wakhe, oAdrameleki loSharezeri amadodana akhe bambulala ngomkhonto, babalekela elizweni laseArarati. UEsarihadoni indodana yakhe waba yinkosi esikhundleni sakhe.