1AmaFilistiya esewuthumbile umtshokotsho wesivumelwano sikaNkulunkulu awususa eEbenezeri awusa eAshidodi.
2AmaFilistiya awuthatha umtshokotsho kaNkulunkulu, awungenisa endlini kaDagoni, awubeka phansi kwakhe uDagoni.
3Kwathi abantu baseAshidodi bevuka kusasa ekuseni bafumanisa uDagoni esewele phansi ngobuso phambi komtshokotsho weNkosi. Bamthatha uDagoni, bambuyisela endaweni yakhe.
4Kodwa lapho bevuka kusasa ekuseni uDagoni wayesewele phansi futhi ngobuso phambi komtshokotsho weNkosi, ikhanda likaDagoni kanye lezandla zakhe zombili kwakuqamukile kusembundwini womnyango, kwasala umzimba wakhe kuphela.
5Ngalokhuke abapristi bakaDagoni labo bonke abangena endlini kaDagoni kabanyatheli embundwini womnyango kaDagoni eAshidodi kuze kube lamuhla.
6INkosi yabaphatha kalukhuni abantu baseAshidodi, yabahlupha kakhulu, yabehlisela amathumba, eAshidodi lendaweni zakhona.
7Abantu baseAshidodi sebebona ukuthi izinto zinjalo, bathi: Umtshokotsho kaNkulunkulu kaIsrayeli kawungahlali kithi, ngoba isandla sakhe sinzima kithi lakuDagoni unkulunkulu wethu.
8Basebebiza zonke izikhulu zamaFilistiya, bazibuthanisa bathi: Sizakwenza njani ngomtshokotsho kaNkulunkulu kaIsrayeli na? Zaphendula zathi: Umtshokotsho kaNkulunkulu kaIsrayeli kawulethwe eGathi. Basebewuletha khona umtshokotsho kaNkulunkulu kaIsrayeli.
9Sebewulethile khona, isandla seNkosi sehlisela kulowomuzi umonakalo omkhulu, satshaya abantu bomuzi, abancinyane labadala, baphunywa ngamathumba.
10Basebewuthumela eEkroni umtshokotsho kaNkulunkulu. Kodwa kwathi lapho umtshokotsho kaNkulunkulu ufika eEkroni, abaseEkroni bakhala bathi: Basilethele umtshokotsho kaNkulunkulu wakoIsrayeli ukuba usibulale labakithi.
11Basebebiza zonke izikhulu zamaFilistiya, bathi: Susani umtshokotsho kaNkulunkulu wakoIsrayeli ubuyele endaweni yawo, ukuba ungasibulali labantu bakithi. Kwakukhona ukufa lomonakalo omkhulu emzini wonke, ngoba isandla sikaNkulunkulu sasinzima kakhulu.
12Lalabo abangafanga baphunywa ngamathumba; ukukhala kwenyukela ezulwini.
Who We AreWhat We EelieveWhat We Do
2025 by iamachristian.org,Inc All rights reserved.
