Nani 2 - Ndebele Bible (iBhayibhili Elingcwele) 1978

Izihonqo lezikhulu zezizwe

1INkosi yathi kuMose loAroni:

2Abantu bakoIsrayeli bazakumisa amathente abo, kube yilabo lalabo ngaphansi kophawu lwabo, phansi kwezibonakaliso zezindlu zaboyise; bazakumisa bekhangelane lethente lokuhlangana inxa zonke.

3Labo abazakumisa ngasempumalanga, bazakuba ngabesigaba sakoJuda ngaphansi kophawu lwezihonqo zesizwe sabo, isikhulu sabakoJuda sibe nguNashoni indodana kaAminadaba;

4ibandla lakhe elabalwayo lalizinkulungwane ezingamatshumi ayisikhombisa lane, lamakhulu ayisithupha.

5Labo abazakumisa eceleni kwabakoJuda ngabesizwe sakoIsakari, isikhulu saso sibe nguNethaneli indodana kaZuwari;

6ibandla lakhe elabalwayo lalizinkulungwane ezingamatshumi amahlanu lane, lamakhulu amane.

7Besekulandela isizwe sakoZebuluni, isikhulu saso sibe nguEliyabi indodana kaHeloni;

8ibandla lakhe elabalwayo lalizinkulungwane ezingamatshumi amahlanu lesikhombisa, lamakhulu amane.

9Bonke abezihonqo zakoJuda, ngamabandla abo, abayizinkulungwane ezilikhulu lamatshumi aficaminwembili, lamakhulu amane, bazasuka kuqala ekusukeni kwabantu.

10Ngaseningizimu kuzakumisa isigaba sabakoRubeni ngaphansi kophawu lwezihonqo zesizwe sabo, isikhulu sabo sibe nguElizuri indodana kaShedewuri;

11ibandla lakhe elabalwayo lalizinkulungwane ezingamatshumi amane lesithupha, lamakhulu amahlanu.

12Labo abazakumisa eceleni kwabakoRubeni ngabesizwe sakoSimeyoni, isikhulu sabo sibe nguShelumiyeli indodana kaZurishadayi;

13ibandla lakhe elabalwayo lalizinkulungwane ezingamatshumi amahlanu lesificamunwemunye, lamakhulu amathathu.

14Besekulandela isizwe sakoGadi, isikhulu saso sibe nguEliyasafi indodana kaRehuweli;

15ibandla lakhe elabalwayo lalizinkulungwane ezingamatshumi amane lanhlanu, lamakhulu ayisithupha, lamatshumi amahlanu.

16Bonke abezihonqo zakoRubeni, ngamabandla abo, abayizinkulungwane ezilikhulu lamatshumi amahlanu lanye, lamakhulu amane, lamatshumi amahlanu, bazakuba ngabesibili ekusukeni kwabantu.

17Emva kwalokhu kuzakusuka ithente lokuhlangana, lezihonqo zamaLevi zibe phakathi kwezihonqo; bonke abantu bazalandelana ekuhambeni kwabo njengokumisa kwabo, kube yilowo lalowo endaweni yakhe ngaphansi kophawu lwakhe.

18Ngasentshonalanga kuzakumisa isigaba sabakoEfrayimi ngaphansi kophawu lwezihonqo zesizwe sabo, isikhulu sabo sibe nguElishama indodana kaAmihudi;

19ibandla lakhe elabalwayo lalizinkulungwane ezingamatshumi amane, lamakhulu amahlanu.

20Labo abazamisa eceleni kwabakoEfrayimi ngabesizwe sakoManase, isikhulu sabo sibe nguGamaliyeli indodana kaPedazuri;

21ibandla lakhe elabalwayo lalizinkulungwane ezingamatshumi amathathu lambili, lamakhulu amabili.

22Besekulandela isizwe sakoBenjamini, isikhulu saso sibe nguAbidani indodana kaGideyoni;

23ibandla lakhe elabalwayo lalizinkulungwane ezingamatshumi amathathu lanhlanu, lamakhulu amane.

24Bonke abezihonqo zakoEfrayimi, ngamabandla abo, abayizinkulungwane ezilikhulu lesificaminwembili, lekhulu, bazakuba ngabesithathu ekusukeni kwabantu.

25Ngasenyakatho kuzakumisa isigaba sabakoDani ngaphansi kophawu lwezihonqo zesizwe sabo, isikhulu sabo sibe nguAhiyezeri indodana kaAmishadayi;

26ibandla lakhe elabalwayo lalizinkulungwane ezingamatshumi ayisithupha lambili, lamakhulu ayisikhombisa.

27Labo abazakumisa eceleni kwabakoDani bazakuba ngabesizwe sakoAsheri, isikhulu sabo sibe nguPagiyeli indodana kaOkirani;

28ibandla lakhe elabalwayo lalizinkulungwane ezingamatshumi amane lanye, lamakhulu amahlanu.

29Besekulandela isizwe sakoNafitali, isikhulu saso sibe nguAhira indodana kaEnani;

30ibandla lakhe elabalwayo lalizinkulungwane ezingamatshumi amahlanu lantathu, lamakhulu amane.

31Bonke abezihonqo zakoDani abayizinkulungwane ezilikhulu lamatshumi amahlanu lesikhombisa, lamakhulu ayisithupha, bazakuba ngabokucina ekusukeni kwabantu bephethe izimpawu zabo.

32Yibo labo abakoIsrayeli ababalwayo ngezindlu zaboyise; bonke ababalwayo ezihonqweni zabo ngamabandla abo babezinkulungwane ezingamakhulu ayisithupha lantathu, lamakhulu amahlanu, lamatshumi amahlanu.

33Kodwa amaLevi kawabalwanga phakathi kwabakoIsrayeli, njengokutsho kweNkosi kuMose.

34Benza njalo abantu bakoIsrayeli. Njengakho konke iNkosi eyayimlaye khona uMose, bamisa phansi kwezimpawu zabo; futhi basuka kanjalo, kwaba yilowo lalowo losendo lwakhe langendlu kayise.