Hubo 80 - Ndebele Bible (iBhayibhili Elingcwele) 1978

Umkhuleko wokusizwa kukaIsrayeli

1Zwana, Malusi kaIsrayeli,

wena okhokhela uJosefa njengomhlambi.

Wena ohlezi esihlalweni sakho sobukhosi ngaphezu kwamakherubi, bonakala ngokukhanya

2phambi kukaEfrayimi loBenjamini loManase,

vusa amandla akho

uze usisize.

3Sibuyise, Nkulunkulu,

usikhanyisele ubuso bakho ukuze sikhululwe.

4Nkosi Nkulunkulu wamabandla, uzathukuthelela

imikhuleko yabantu bakho kuze kube nini na?

5Wena ubafunzile usizi lezinyembezi,

wabanathisa izinyembezi ngesilinganiso esikhulu.

6Wena usenza sibe yinhlekisa yabakhelene lathi,

lezitha zethu zihlekisana ngathi.

7Sibuyise, Nkulunkulu wamabandla,

usikhanyisele ubuso bakho ukuze sikhululwe.

8Walikhupha ivini eGibithe,

wazixotsha izizwe, walihlanyela lona.

9Walicentela indawo, waligxumeka,

lagcwala umhlaba wonke.

10Izintaba zambeswa ngomthunzi walo,

lezihlahla zomkusu zingatsha zalo;

11lakhuphela ingatsha zalo olwandle,

lamahlumela alo emfuleni.

12Uyibhidlizeleni imiduli yalo,

ukuze balikhe bonke abadlula ngendlela na?

13Ingulube yasehlathini iyalihlikiza,

lakho konke okuhlala egangeni kuyalidla.

14Nkulunkulu wamabandla, akubuye futhi,

ukhangele usezulwini,

ubone, unanzelele ivini leli

15eliyisihlahla esahlanyelwa yisandla sakho sokunene.

16Balitshisile ngomlilo, baligamulela phansi;

kungathi bangabhubha ngokubakhangela kwakho lapho ubakhuza!

17Kodwa isandla sakho kasivikele umuntu wesandla sakho sokunene,

umuntu oziqinisele yena.

18Khona singasayikuhlehla kuwe;

sivuselele, ng’khona sizakukhuleka ebizweni lakho.

19Sibuyise, Nkosi Nkulunkulu wamabandla,

usikhanyisele ubuso bakho ukuze sikhululwe.