1 Kor 11 - Ndebele Bible (iBhayibhili Elingcwele) 1978

1Ngilingisani, njengokuba lami ngilingisa uKristu.Isambatho sowesifazana enkonzweni

2Ngiyalibonga ngoba lingikhumbula ezintweni zonke, libambelele ezifundisweni engalinika zona.

3Kodwa ngithanda ukuba lazi ukuthi inhloko yawo wonke amadoda nguKristu, lenhloko yowesifazana yindoda yakhe, lenhloko kaKristu nguNkulunkulu.

4Uba indoda ikhuleka loba itshumayela, ikhanda layo limbomboziwe, ilithela ihlazo ikhanda layo.

5Kodwa ilowo lalowo owesifazana osuka akhuleke ingabe atshumayele, ikhanda lakhe lingambomboziwanga, ulithela ihlazo ikhanda lakhe; ngoba lokhu kufanana lokuthi ikhanda lakhe liphuciwe.

6Uba owesifazana engagubuzeli, kagele. Kodwa uba kulihlazo kowesifazana ukugela ingabe ukuphuca, kagubuzele.

7Indoda kayifanele ukumbomboza ikhanda, ngoba ingumfanekiso lodumo lukaNkulunkulu; kodwa owesifazana uludumo lwendoda.Gen 1:26, 27

8Ngoba indoda kayivelanga kowesifazana, kodwa owesifazana wavela endodeni.Gen 2:18–23

9Indoda kayidalelwanga owesifazana, kodwa owesifazana wadelelwa indoda.

10Ngakhoke owesifazana kufanele athwale ekhanda lakhe uphawu lwamandla ngenxa yezithunywa.

11Kantike eNkosini owesifazana kasilutho ngaphandle kwendoda, lendoda kayisilutho ngaphandle kowesifazana;

12ngoba njengalokho owesifazana wavela endodeni, ngokunjalo indoda izalwa ngowesifazana; lakho konke kuvela kuNkulunkulu.

13Ziboneleni lina ngokwenu; kufanele yini ukuba owesifazana akhuleke kuNkulunkulu engambombozanga ikhanda lakhe na?

14Imvelo uqobo lwayo kayilifundisi yini ukuthi uba indoda ilenwele ezinde, kulihlazo kuyo,

15kodwa uba owesifazana elenwele ezinde, kakusudumo kuye na? Ngoba uphiwe inwele ukuba zibe yisimbombozo sakhe.

16Kodwa uba umuntu ethanda ukuphika inkani, kasilawo umkhuba onjalo thina, lamabandla kaNkulunkulu kawalawo.

17Kodwa nxa ngililaya ngalokhu, kangilibongi ngoba libuthana kungesikho ngokuhle kodwa ngokubi.

18Okokuqala, nxa libuthana ebandleni, ngizwa kuthiwa kukhona ukwahlukana phakathi kwenu; nganxanye ngiyakukholwa lokhu.

19Ngoba kufanele ukuba kube khona ukwahlukana phakathi kwenu ukuze labo abaqinisileyo babonakale.

20Ngakhoke nxa libuthana ndawonye, kakusikho ukudla isidlo seNkosi lokho;

21ngoba ekudleni kwenu, ilowo lalowo uqalela abanye ukudla okwakhe, omunye ulambile, lomunye udakiwe.

22Kanti kalilazo izindlu zokudlela lezokunathela na? Kumbe lidelela ibandla likaNkulunkulu, liyangise abangabayanga kulo na? Ngizakuthini kini na? Ngilibonge na? Atshi! Kangilibongi.

Indlela yokuphatha isidlo seNkosi(Mat 26:26–29; Mark 14:22–25; Luka 22:14–20)

23Ngoba mina ngakwamukela eNkosini lokho, engalinika khona, ukuthi iNkosi uJesu, ngalobobusuku eyanikelwa ngabo, yasithatha isinkwa,

24isibongile yasihlephuna, yathi: Lokhu kungumzimba wami ohletshunelwa lina; lokhu kwenzeni ukuba lingikhumbule.

25Ngokunjalo yathatha inkezo sebedlile, yathi: Inkezo le iyisivumelwano esitsha egazini lami; lokhu kwenzeni ngezikhathi zonke eliyinatha ngazo ukuba lingikhumbule.Eks 24:6–8; Jer 31:31–34

26Ngoba nxa lisidla lesisinkwa, liyinatha linkezo, litshumayela ukufa kweNkosi ize ifike.

27Ngakhoke lowo odla lesisinkwa, anathe inkezo yeNkosi ngokungafanelanga, ulecala lokona umzimba legazi leNkosi.

28Umuntu ake azihlole, andubana adle lesisinkwa, anathe linkezo.

29Ngoba odlayo anathe ngokungaqedisisi umzimba weNkosi uzidlela azinathele ukulahlwa.

30Ngenxa yalokhu banengi kini ababuthakathaka labagulayo, labanye sebefile.

31Kodwa uba besizihlolisisile thina, besingayikuthonisiswa.

32Kodwa nxa sithonisiswa, siyatshaywa yiNkosi, ukuze singalahlwa kanye lomhlaba.

33Ngakhoke, bazalwane, nxa libuthana ukuba lidle, kalibomelelana.

34Uba omunye elambile kabokudla ekhaya ukuze lingabuthaneli ukulahlwa. Okuseleyoke ngizakukulungisa mhla ngifikayo.