Hubo 5 - Ndebele Bible (iBhayibhili Elingcwele) 1978

Umkhuleko wokucela ukuvikelwa ezitheni

1Zwana amazwi ami, Nkosi;

ulalele ukububula kwami.

2Zwana ilizwi lokukhala kwami,

Nkosi yami, Nkulunkulu wami;

ngikhuleka kuwe, Nkosi,

3ekuseni uyalizwa ilizwi lami;

ekuseni ngiyalungisa umnikelo wami, ngilindele wena.

4Ngoba wena kawusuye uNkulunkulu othanda okubi;

omubi kayikuhlala lawe.

5Abazikhukhumezayo kabazukuma phambi kwakho;

uyabazonda bonke abenza okubi.

6Uyababhubhisa abaqamba amanga.

INkosi iyabenyanya abachitha igazi labalenkohliso.

7Kodwa mina ngizakungena endlini yakho

ngobukhulu besihawu sakho,

ngikhothame ngokuhlonipha, ngikhangele ethempelini lakho elingcwele.

8Nkosi, ngikhokhela ngokulunga kwakho

ngenxa yezitha zami,

uyenze indlela yakho iqonde phambi kwami.

9Ngoba kalikho iqiniso emilonyeni yazo,

inhliziyo zazo ziyibubi impela;

imiphimbo yazo ililiba elivulekileyo,

ziyakhohlisa ngenlimi zazo.

10Kazithwale icala lazo, Nkulunkulu,

kaziwe ngenxa yamacebo azo;

uzilahle ngenxa yeziphambeko zazo ezinengi,

ngoba zikuvukele.

11Kodwa kabajabule bonke abaphephela kuwe,

bahlabelele kokuphela ngokuthokoza;

ubavikele labo abathanda ibizo lakho ukuba bathokoze kuwe.

12Ngoba wena Nkosi, uyambusisa olungileyo,

uyamvikela ngomusa njengesihlangu.